ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީގެ ރަސްމީ އީމެއިލް އެކައުންޓުން އީމެއިލްތަކެއް ޑިލީޓްކުރި ކަމަށް ތުހުމަތުވާ މައްސަލައެއް ފުލުހުން ބަލަން ފަށައިފިއެވެ.
ފުލުހުން މީޑިއާތަކާ ހިއްސާކޮށްފައިވާ މެސެޖެއްގައި ވަނީ ކުރީގެ އެޑިއުކޭޝަން މިނިސްޓަރު ބޭނުން ކުރެއްވި ރަސްމީ އީމެއިލް އެކައުންޓުގައިވާ ހުރިހާ އީމެއިލްތައް މިދިޔަ އަހަރުގެ ތެރޭގައި ޑިލީޓްކޮށްފައިވާ މައްސަލަ ތަހުގީގުކޮށްދިނުމަށް އެދި މިދިޔަ ބުރާސްފަތި ދުވަހު ފުލުހުންގެ ޚިދުމަތަށް ހުށަހަޅާފައި ވާކަމަށެވެ.
އެހެންވެ، އެ މައްސަލަ ތަހުގީގު ކުރަމުން އަންނަ ކަމަށް ފުލުހުން ބުންޏެވެ.
ފުލުހުން ތަރުޖަމާނު އެސިސްޓެންޓް ކޮމިޝަނާ އޮފް ޕޮލިސް، އަހުމަދު ޝިފާން އިތުރަށް ވިދާޅުވި ގޮތުގައި އެ މައްސަލަ ހުށަހަޅައިފައިވަނީ އެޑިއުކޭޝަން މިނިސްޓްރީންނެވެ.
ޑރ. އައިޝަތު މިއަދު ފޭސްބުކްގައި ކުރެއްވި ޕޯސްޓެއްގައި ވަނީ، އޭނާ މިނިސްޓަރު ކަމުގައި ބޭނުންކުރެއްވި އީމެއިލް މިދިޔަ އަހަރުގެ ނޮވެމްބަރު 17ގައި ޑީއެކްޓިވޭޓް ކޮށްފައިވާ ކަމަށެވެ. ނަމަވެސް މިއަދު 3:15ގައި އެ އީމެއިލްއަށް ވަންނަން ކޮންމެވެސް ފަރާތަކުން މަސައްކަތް ކޮށްފައިވާ ކަމަށް އޭނާ ވިދާޅުވިއެވެ.
އެ ޕޯސްޓާއެކު އައިޝަތު ވަނީ އެ އީމެއިލްއަށް އަލުން ސައިން-އިން ވެފައިވާ ކަމުގެ ނޮޓިފިކޭޝަނެއް ދައްކުވައިދޭ ސްކްރީންޝޮޓެއް ހިއްސާކުރައްވައިފައެވެ. އަދި މިދިޔަ އަހަރުގެ ނޮވެމްބަރު 17ގެ ފަހުން އެ އެކައުންޓުން އެއްވެސް ފަރާތަކަށް އީމެއިލްއެއް ލިބިފައި ވާނަމަ އެއީ އޭނާ ފޮނުވި މެއިލް ނޫން ކަމަށް ވެސް އައިޝަތު ވިދާޅުވިއެވެ.