ރާއްޖޭގައި މަސައްކަތްކުރާ ބިދޭސީންނާ މެދު އިހުމާލުވެ، މުސާރަ ނުދީ ހިފަހައްޓާނަމަ 50،000 ރުފިޔާއިން ޖޫރިމަނާ ކުރުމަށް ތިނަދޫ އުތުރު ދާއިރާގެ ޕީއެންސީ މެންބަރު ސައުދުﷲ ހިލްމީ މިއަދު ދެކޮޅު ހައްދަވައިފިއެވެ.
ސައުދުﷲ މިފަދައިން ދެކޮޅު ހައްދަވާފައި ވަނީ ސަރުކާރުގެ ފަރާތުން ކުޅުދުއްފުށީ އުތުރު ދާއިރާގެ މެންބަރު މުހައްމަދު ދާއޫދު ވަޒީފާއާ ބެހޭ ގާނޫނަށް އިސްލާހެއް ގެނައުމަށް ހުށަހެޅުއްވި ބިލަށް ބަހުސްކުރައްވަމުންނެވެ.
އެ ބިލުގައި އޮންނަނީ ރާއްޖޭގައި މަސައްކަތްކުރާ ބިދޭސީންނާ މެދު އިހުމާލުވެ، މުސާރަ ނުދީ ހިފަހައްޓާނަމަ 50،000 ރުފިޔާއިން ޖޫރިމަނާ ކުރެވޭ ގޮތަށް އިސްލާހެއް ގެނައުމަށެވެ.
ސައުދުﷲ ވިދާޅުވީ، ބިދޭސީ މަސައްކަތްތެރިން ރާއްޖެ ގެނައުމަށް ފަހު، ކޯޓާ ފީ އާއި ވޯކް ޕާމިޓް ފީ ނުދައްކައި އެތައް ލައްކައެއް މިހާރުވެސް އެބައޮތް ކަމަށެވެ. އެކަން މިފަހުން ސަރުކާރުން ނެރުނު ބިދޭސީންގެ ފައިސާ ނުދައްކާ ވިޔަފާރިތަކުގެ ލިސްޓުގައި ވެސް ހިމެނެއެވެ.
ސުވިފްޓް އިންޖީނިއަރިން ކުންފުނީގެ ވެރިޔާ، ސައުދުﷲ ވިދާޅުވީ އެ ޖޫރިމަނާގެ އަދަދާ މެދު ކޮމިޓީ މަރުހަލާގައި ދިރާސާތަކެއްކޮށް ވިސްނާލަން ޖެހޭ ކަމަށެވެ.
50،000 ރުފިޔާއަކީ ކުޑަ އަދަދެއް ނޫން. ފަސް މީހުންގެ ކަމެއް ދިމާވެއްޖެއްޔާ އެއީ 250،000 ރުފިޔާ ދައްކަން ޖެހުން ފަދަ ކަމެއް އެއީ. އެފަދަ ކަންކަން ކޮމިޓީ މަރުހަލާގައި ވިސްނާލާފައި ބަދަލު ކުރަން ޖެހޭ، ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ
ސައުދުﷲ ވިދާޅުވީ، ބިދޭސީންނާ މެދު އިހުމާލުވުމުގައި ސަރުކާރު ކުންފުނިތައް އަދި އެހެން ކުންފުނިތަކުން ވެސް މަސައްކަތްތަކަށް ދޭން ޖެހޭ ފައިސާ ބިދޭސީންނަށް ނުދޭކަން ފާހަގަކުރެވިފައިވާ ކަމަށެވެ. އެގޮތުން ހަތަރު މަސް ފަސް މަސް ވެގެން ދާއިރު ވެސް ބައެއް ބިދޭސީންނަށް މުސާރަ ނުދީ ތިބޭކަން ވަނީ ފާހަގަކުރައްވާފައެވެ.
ހަމައެއާއެކު ގަވާއިދާ ޚިލާފަށް ފިލައިގެން އުޅޭ ބިދޭސީން ޑީޕޯޓު ކުރުމާ ވެސް ސައުދުﷲ ވަނީ ދެކޮޅު ހައްދަވާފައެވެ. އޭނާ ވިދާޅުވީ އެއީ އަދަބެއް ކަމަށް ގަބޫލު ނުކުރައްވާ ކަމަށެވެ. އަދި އޭގެ ނަތީޖާއަކީ މަސައްކަތްތެރިން ފިލައިގެން ދިޔުން ކަމަށް ސައުދު ވިދާޅުވިއެވެ.
ކޮންސްޓްރަކްޝަން ދާއިރާގައި މަސައްކަތް ކޮށްގެން 350 ޑޮލަރު ލިބޭ ބިދޭސީން ފިލައިގެން މަހަށް ދިޔުމުން 2،000 ޑޮލަރު އެބަ ލިބޭ. އެގޮތަށް ބޭނުން މުއްދަތަކަށް އުޅުމަށް ފަހު، ފުރަން ދިޔުމުން ޑީޕޯޓު ކޮށްލުމުގެ ސަބަބުން ދައުލަތާއި ކުންފުނިތަކަށް ވެސް ފައިދާއަށް ވުރެ ލިބޭ ގެއްލުން މާބޮޑު، ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ
ސައުދުﷲ ލަފާކުރެއްވި ގޮތުގައި މިހާރު ވެސް ރާއްޖޭގައި ގާތްގަނޑަކަށް 50،000 އެއްހާ ބިދޭސީން ފިލައިގެން އުޅޭ ކަމަށް ބެލެވެއެވެ. އަދި އެ މީހުން ޑީޕޯޓު ކުރުމުގެ ބަދަލުގައި އިތުރު އަދަބުތަކެއް ހިމަނަން ޖެހޭ ކަމަށް ސައުދުﷲ ވިދާޅުވިއެވެ.
މިހާރު މަޖިލީހަށް ހުށަހަޅާފައި އޮތް ބިލުގެ ބޭނުމަކީ، ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމެވެ. އެ ގޮތުން، މި އިސްލާހަކީ ބިދޭސީން ވަޒީފާއަދާކުރުމާ ގުޅޭގޮތުން ވަޒީފާއާ ބެހޭ ގާނޫނުގައި ކަނޑައަޅާފައިވާ އުސޫލުތައް އިސްލާހުކޮށް، ގާނޫނު ތަންފީޒުކުރުން އިތުރަށް ހަރުދަނާކުރުމަށް ގެނެވޭ އިސްލާހެކެވެ.
އިސްލާހުގައިވަނީ، ވަޒީފާ އަދާކުރުމަށްޓަކައި ރާއްޖެއަށް ބިދޭސީން ގެނެވޭނެ އަދަދާއި ދާއިރާތަކުގެ އިތުރުން އެއް ގައުމަކުން އެންމެ ގިނައިން ބިދޭސީން ގެނެވޭނެ އަދަދު ކަނޑައަޅާނީ ސަރުކާރުގެ ވަޒީރުންގެ މަޖިލީހުގެ ލަފާގެ މަތިން ކަމަށެވެ.
އަދި، އެ އަދަދުތައް ކަނޑައަޅަން ވާނީ ބިދޭސީން ވަޒީފާ އަދާކުރުމުގެ ސަބަބުން ރާއްޖޭގެ ވަޒީފާގެ ބާޒާރަށް ކުރާނެ އަސަރު ދެނެގަތުމަށްޓަކައި ހަދާ އެސެސްމަންޓަކަށް ފަހު ވަޒީރުންގެ މަޖިލީހުގެ ލަފާގެ މަތިން ކަމަށް ވެސް އިސްލާހުގައިވެއެވެ.
މި ސަރުކާރުން ހޯމް މިނިސްޓްރީން މިހާރު އަންނަނީ ގަވައިދާ ޚިލާފަށް އުޅޭ ބިދޭސީން ހޯދުމަށްޓަކައި ކުރަނގި އޮޕަރޭޝަންގެ ނަމުގައި ބިދޭސީންގެ ބަޔޯމެޓްރިކް ޑޭޓާ އެއްކުރުމުގެ މަސައްކަތް ކުރަމުންނެވެ.
ހަމައެއާއެކު ފުލުހުންނާ ގުޅިގެން އިމިގްރޭޝަނުން އަންނަނީ ގަވައިދާ ޚިލާފަށް އުޅޭ ބިދޭސީން އަތުލައިގަތުމުގެ މަސައްކަތް ކުރަމުންނެވެ. އަދި އިމިގްރޭޝަނުން ގެންދަނީ އެފަދަ ބިދޭސީން ޑީޕޯޓްވެސް ކުރަމުންނެވެ.