ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރުކަން ކުރައްވާ ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ތޯރިގް (ޓޮމް) ޕާޓީގެ ޕީޖީ ގްރޫޕުގެ ޑެޕިއުޓީ ލީޑަރުކަމުން މިއަދު އިސްތިއުފާދެއްވައިފިއެވެ.
އޭނާ މަގާމުން އިސްތިއުފާ ދެއްވި ސަބަބެއް އެނގިފައެއް ނުވެއެވެ.
އެކަމަކު، ޕީއެންސީގައި ހިމެނިވަޑައިގަންނަވާ ބައެއް މަޖިލީސް މެންބަރުން ވަނީ ތޯރިގް ޑެޕިއުޓީ ޕީޖީ ލީޑަރުކަމުން އިސްތިއުފާދެއްވިކަން 'ސަން'އަށް ކަށަވަރުކޮށްދެއްވައިފައެވެ.
ފޯނަށް ޖަވާބުނުދެއްވާތީ މި ކަމާ ގުޅިގެން މިހާތަނަށް ތޯރިގްގެ ބަހެއް ލިބިފައެއް ނުވެއެވެ.
ޕީއެންސީގެ އިސް ބޭފުޅަކު ވިދާޅުވި ގޮތުގައި ތޯރިގް ޕާޓީގެ ޑެޕިއުޓީ ޕީޖީ ލީޑަރުކަމުގެ މަގާމުން އިސްތިއުފާ ދެއްވީ ސިޔާސީ ސަބަބަކާ ހުރެއެއް ނޫނެވެ. އެކަމަކު، ސީދާ ސަބަބެއް އޭނާ ވެސް ވިދާޅެއް ނުވެއެވެ.
ރައީސް ޑރ. މުހައްމަދު މުއިއްޒުގެ ހުށަހެޅުއްވުމާ އެއްގޮތަށް ޕީއެންސީގެ ޑެޕިއުޓީ ޕީޖީ ލީޑަރުކަމަށް ތޯރިގާއި ހުޅުދޫ ދާއިރާގެ މެންބަރު މުހައްމަދު ޝާހިދު އަދި، ވިލިމާލެ ދާއިރާގެ މެންބަރު މުހައްމަދު އިސްމާއީލް ހަމަޖައްސަން ޕީއެންސީގެ ޕީޖީ ގްރޫޕުން ނިންމީ މޭ މަހުގެ 22 ގައެވެ.
ފާހަގަކޮށްލެވޭ ގޮތުގައި ތޯރިގަކީ މި ހިނގާ ވިހިވަނަ މަޖިލީހުގައި ހިމެނިވަޑައިގަންނަވާ އެންމެ ސީނިއާ އެއް މެންބަރެވެ. ރައްޔިތުންގެ މަޖިލީހުގެ ރައީސާއި ނައިބު ރައީސް ނެތް ހާލަތްތަކުގައި ރިޔާސަތު ބަލަހައްޓަވާ ފަސް މެންބަރުންގެ ތެރޭގައި ވެސް އޭނާ ހިމެނިވަޑައިގަންނަވައެވެ.
އޭނާ އެންމެ ފުރަތަމަ މަހިބަދޫ ދާއިރާއަށް އިންތިޚާބުވީ 2014 ވަނަ އަހަރު 17 ވަނަ މަޖިލީހަށެވެ.
މީގެ އިތުރުން، ގައުމީ ޓީމަށް ވެސް ކުރިން ކުޅުއްވި ތޯރިގް އަންނަނީ ދިވެހިރާއްޖޭގެ ފުޓްބޯޅަ އެސޯސިއޭޝަން (އެފްއޭއެމް)ގެ ރައީސްކަމުގެ މަގާމަށް ވަޑައިގަންނަވަން ވެސް ކެމްޕޭން ކުރައްވަމުންނެވެ. އެ ކެމްޕޭން ކުރައްވާތާ މިހާރު ގިނަ ދުވަސްތަކެއްވެއްޖެއެވެ.