ރާއްޖޭގައި ގާއިމުކުރާ ޑިވެލޮޕްމަންޓު ބޭންކު އުފައްދަން ލައިސަންސް ހޯދުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އަށް މިއަދު ހުށަހަޅައިފިއެވެ.
ޑިވެލޮޕްމެންޓް ބޭންކުތަކަކީ، ގައުމުގައި އިންޑަސްޓްރީތަކާއި، ވިޔަފާރިތައް އުފައްދާ، ކުރިއެރުވުމަށް ބޭނުންވާ މާލީ އެހީތެރިކަން ފޯރުކޮށްދޭ އިދާރާއެކެވެ. އެގޮތުން، ވިޔަފާރިތައް ފަށައިގަތުމަށް ބޭނުންވާ ލޯނާއި އެހެނިހެން މާލީ އެހީތެރިކަން ވެސް ޑިވެލޮޕްމަންޓް ބޭންކުތަކުން ފޯރުކޮށްދޭނެއެވެ.
މިއަދު އިކޮނޮމިކް މިނިސްޓަރު މުޙައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، ޑިވެލޮޕްމަންޓު ބޭންކު ގާއިމުކުރުމަށް އެމްއެމްއޭއިން ހޯދަން ޖެހޭ ހުއްދަތައް ހޯދުމަށް މިއަދު ހުށަހަޅާފައިވާ ކަމަށެވެ.
މިކަމާ ގުޅުން ހުރި އިތުރު މައުލޫމާތު ދެއްވަމުން ދައުލަތުގެ މީޑިއާ ޕީއެސްއެމްގެ ރާއްޖެ މިއަދު ޕްރޮގުރާމުގައި ރޭ މިނިސްޓަރު ވިދާޅުވީ، އެ ބެންކާ ގުޅުން ހުރި ފަންނީ ހުރިހާ ދިރާސާތަކެއްކޮށް، ބޭންކު އުފައްދަން ބޭނުންވާ ކުންފުނި ރަޖިސްޓްރީކޮށް ނިމިފައިވާ ކަމަށެވެ.
އިކޮނޮމިކް މިނިސްޓަރު މުހައްމަދު ސައީދު: ވިދާޅުވީ ޑިވެލޮޕްމަންޓު ބޭންކު އުފައްދަން ލައިސަންސް ހޯދުމަށް އެމްއެމްއޭއަށް ހުށަހަޅަޅާފައިވާ ކަމަށް -- ސަން ފޮޓޯ/ ފަޔާޒު މޫސާ
އެގޮތުން، ޑިވެލޮޕްމަންޓު ބޭންކުގެ ބޯޑަށް ރާއްޖޭން ބޭރުގެ ފަންނީ ބޮޑެތި ބޭންކުތައް ހިންގާފައި ތިއްބެވި ދެ ބޭފުޅުން ނަގާފައިވާ ކަމަށާއި އެކަމަށް ބިޒްނަސް ޕްލޭނެއްގެ އިތުރުން ފިސިބިލިޓީ ސްޓަޑީއެއް ވެސް ހަދައިފައިވާ ކަމަށް ސައީދު ވިދާޅުވިއެވެ.
މިނިސްޓަރު ސައީދު އިތުރަށް ވިދާޅުވީ، ލައިސަންސްގެ މަސައްކަތްތައް ކުރިއަށްދާއިރު، ބެންކު ހިންގާނެ އިމާރާތެއްގެ މަސައްކަތް ވެސް ކުރަމުން އަންނަ ކަމަށާއި އަންނަ މަހުގެ ތެރޭގައި މި ބެންކު ހުޅުވުމަށް މަސައްކަތް ކުރަމުން އަންނަ ކަމަށެވެ.
ނަމަވެސް، މިނިސްޓަރު މީގެކުރިން ވިދާޅުވީ މިމަހުގެ ތެރޭގައި އެ ބެންކު ނިންމޭނެ ކަމަށެވެ. އެގޮތުން، ބެންކު ނިންމުމުގެ ލަސްތަކެއް ދިމާވަނީ ފެންވަރު ރަނގަޅު ބޭފުޅުން ހޯދައިގެން ކުރިއަށްދާތީ ކަން މިނިސްޓަރު ވަނީ ފާހަގަކުރައްވާފައެވެ.
ޑިވެލޮޕްމަންޓު ބޭންކު ހިންގުމަށް ހޯދަނީ ބޭރުގެ ސީއީއޯއެއް ކަމަށްވާއިރު، ބައިނަލްއަގުވާމީ ނޫހެއްގައި ސީއީއޯއެއް ހޯދުމަށް އިއުލާނު ކުރައްވާނެ ކަމަށް މިނިސްޓަރު ރޭ ވަނީ ވިދާޅުވެފައެވެ.
ފާހަގަކޮށްލެވޭ ގޮތުގައި، ރާއްޖޭގައި ޑިވެލޮޕްމަންޓު ބޭންކެއް އުފެއްދުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.