ޕްރޮސެސިން ކެޕޭސިޓީ އިތުރުކުރެވުމުން މަސް ބޭރުކޮށްގެން ރާއްޖެއަށް ލިބޭ އާމްދަނީ 190 މިލިއަން ޑޮލަރަށް އިތުރުކުރެވޭނެ ކަމަށް ފިޝަރީޒް މިނިސްޓަރު އަޙުމަދު ޝިޔާމް މިރޭ ވިދާޅުވެއްޖެއެވެ.
ފިޝަރީސް މިނިސްޓްރީން އަންނަނީ ރާއްޖޭގައި މަސް ޕްރޮސެސް ކުރުމަށް ހުރި ކެޕޭސިޓީ އިތުރުކުރުމަށް ގިނަ މަސައްކަތްތަކެއް ކުރަމުންނެވެ. މިގޮތުން، އެ މިނިސްޓްރީން އަންނަނީ ޅ. ފެލިވަރާއި ފ. ނިލަންދޫގެ އިތުރުން ގދ. ފިޔޯރީގައި މަސް ބަންދު ކުރާ ފެކްޓްރީތައް ގާއިމުކުރުމުގެ މަސައްކަތްތައް ކުރަމުންނެވެ.
އެސްއެސްޓީވީން މިރޭ ގެނެސްދިން ބާރުހަތަރެއް ޕްރޮގްރާމުގައި މިނިސްޓަރު ޝިޔާމް ވިދާޅުވީ، އެ ފެކްޓްރީތަކާއެކު އިތުރު 300 މެޓްރިކްޓަނުގެ މަސް ޕްރޮސެސް ކުރެވޭނެ ކަމަށެވެ. ނަމަވެސް، މިވަގުތު ސަރުކާރުގައި ހުރީ 40 މެޓްރިކްޓަނުގެ ކެޕޭސިޓީއެއް ކަމަށް ޝިޔާމް ވިދާޅުވިއެވެ.
އޭރުން ދިވެހިރާއްޖޭގައި މިހާރު ހުރި ޕްރޮސެސިން ކެޕޭސިޓީއަށް ވުރެ ފަސް ވަރަކަށް ގުނަ އިތުރުވާނެ ކަމަށާއި އަމާޒަކީ ރާއްޖެއިން ބޭރު ކުރާ ހުރިހާ މަހެއް ދަޅަށް ބަދަލު ކުރުން ކަމަށް މިނިސްޓަރު ވިދާޅުވިއެވެ.
ފެލިވަރު މަސް ފެކްޓަރީގެ ތެރޭގައި މުވައްޒަފުން މަސައްކަތް ކުރަނީ: ޕްރޮސެސިން ކެޕޭސިޓީ އިތުރުވުމުން، މަސް ބޭރުކޮށްގެން 190 މިލިއަން ޑޮލަރުގެ އާމްދަނީއެއް ލިބޭނެ ކަމަށް މިނިސްޓަރު ވިދާޅުވި -- ސަން ފޮޓޯ/ ނަޖާހު މަސްއޫދު
އިތުރަށް މިނިސްޓަރު ވިދާޅުވީ، އެ ފެކްޓްރީތަކުން އިތުރުކުރެވޭ ކެޕެސިޓީއާއެކު ގާތްގަނޑަކަށް 81000 މެޓްރިކްޓަނުގެ މަސް ބަންދު ކުރެވޭނެ ކަމަށް ގަބޫލު ކުރެވޭ ކަމަށެވެ.
ރާއްޖެއިން މިހާރު 128،000 ނުވަތަ 130،000 މެޓްރިކްޓަނުގެ މަސް ބާނާކަން ފާހަކުރައްވައި، ޝިޔާމް ވިދާޅުވީ ގާތްގަނޑަކަށް 82،000 ޓަނު މަސް ޕްރޮސެސް ކޮށްގެން ބޭރުކުރެވޭނަމަ ރާއްޖެއަށް މަސް ބޭރުކޮށްގެން ލިބޭ އާމްދަނީ އިތުރުކުރެވޭނެ ކަމަށެވެ.
މަސް ބޭރުކޮށްގެން ލިބޭ އާމްދަނީ މިހުރީ ގާތްގަނޑަކަށް 90 މިލިއަން ޑޮލަރުގައި. އަޅުގަނޑުމެންނަށް އިރާދަކުރެެއްވިއްޔާ މި ޕްރޮސެސިން ކެޕޭސިޓީ އިތުރުކޮށްގެން 180 ނުވަތަ 190 މިލިއަން ޑޮލަރަށް މިއަދަދު އިތުރުކުރެވޭނެ.
މީގެއިތުރުން، ކަޅުބިލަ މަސް ގަނޑުކޮށްގެން ބޭރު ކުރަމުންދާތާ 40 އަހަރުވެފައިވާ ކަމަށާއި ރާއްޖޭގެ ކޯލްޑްސޯޓޯރޭޖް ކެޕެސިޓީ ވަރަށް ދަށް ކަމަށް މިނިސްޓަރު ވިދާޅުވިއެވެ.
މަސްވެރިކަން ރަނގަޅު ދުވަސްވަރުތަކުގައި ވެސް ބާނާ މަސް ދުނިޔޭގެ ބާޒާރުގައި ކޮންމެ އަގެއްގައި ހުއްޓަސް ބޭރު ކުރަން ޖެހޭކަން އޭނާ ވަނީ ފާހަގަކުރައްވާފައެވެ. އެހެންކަމުން އެކަމަށް ހައްލެއް ހޯދުމަށްޓަކައި، ކޯލްޑް ސްޓޯރޭޖްތައް ގާއިމު ކުރުމުގެ މަސައްކަތްތައް ވެސް ކުރަމުން އަންނަ ކަމަށް މިނިސްޓަރު ވިދާޅުވިއެވެ.