ރައްޔިތުންގެ މަޖިލީހުގެ މެންބަރުން ހުވާ ކުރައްވާ ދުވަހުން ފެށިގެން ތިން މަސް ދުވަސް ތެރޭގައި މާލީ ބަޔާން ހުށަހަޅަންޖެހޭ ގޮތަށް މަޖިލީހުގެ އާންމު ކޮމިޓީން މިއަދު ފާސްކޮށްފިއެވެ.
މިހާރު އުސޫލު އޮތް ގޮތުން މެންބަރުންގެ މާލީ ބަޔާން ހުށަޅަންޖެހޭނީ މަގާމުގެ ހުވާ ކުރައްވާތާ އަހަރެއް ފަހުންނެވެ.
މިހާރުގެ އުސޫލުގައި، މާލީ ބަޔާނުގައި އަނބިންނާއި ފިރިން އަދި 18 އަހަރު ނުފުރޭ ދަރީން ވެސް ހިމެނޭ ގޮތަށް ފުރިހަމަ ކުރަންޖެހޭ މައުލޫމާތުގެ ތެރޭގައި ހިމެނެނީ:
- ރާއްޖެއާއި ރާއްޖޭން ބޭރުގައި ހުރި މިލްކިއްޔާތުގައިވާ މުދަލާއި ފައިސާގެ ހިސާބުތައް
- ވިޔަފާރީގެ މަސްލަހަތުތަކުގެ މައުލޫމާތު
- އަރަންޏާއި ދަރަނީގެ ހިސާބުތައް
- އެހެން ވަޒީފާއެއް އަދާ ކުރާނަމަ، އެ ވަޒީފާގެ ޒިންމާތައް
އެ ގަވާއިދުގައި ވާގޮތުން މާލީ ބަޔާން ހުށަހަޅަން ޖެހެނީ ކޮންމެ މީލާދީ އަހަރެއްގެ ވެސް އޮގަސްޓު މަހުގެ 31ގެ ކުރިންނެވެ. އެ ގޮތުން، މިހާރު އޮތް 20ވަނަ މަޖިލީހުގެ މެންބަރުންގެ ފުރަތަމަ މާލީ ބަޔާން ވެސް ހުށަހަޅުއްވަން ޖެހޭނީ އަންނަ އަހަރުގެ އޮގަސްޓު މަހުގެ ނިޔަލަށެވެ.
މިއަދު ބޭއްވި އާންމު ކޮމިޓީގެ ބައްދަލުވުމުގައި، މަޖިލީހުގެ ކައުންސެލް ޖެނެރަލް ފާތިމަތު ފިލްޒާ އެ ކަމުގައި ދެއްވި ލަފާ، އިދާރީ މޭޒުން ވަނީ އިއްވާފައެވެ. އޭގައިވަނީ އަލަށް މަޖިލިސް މެންބަރުކަމުގެ ހުވާކުރާ ދުވަހުން ފެށިގެން ތިން މަސް ދުވަހުގެ ތެރޭގައި (އެ މެންބަރެއްގެ އަނބިން/ ފިރިން އަދި ދަރީން ވެސް ހިނެނޭ ގޮތަށް) މުދަލާއި ފައިސާގެ ބަޔާން އަމީންއާންމަށް ހުށަހެޅުމަށެވެ. އެއަށް ފަހު، ކޮންމެ އަހަރަކު އެއް ފަހަރު މާލީ ބަޔާން ހުށަހަޅަންޖެހޭ ގޮތަށް ފިލްޒާ ލަފާދެއްވިއެވެ.
ރައްޔިތުންގެ މަޖިލީހުގެ އާންމު ކޮމިޓީ ބައްދަލުވުން -- ފޮޓޯ/ މަޖިލިސް
މަޖިލީހުގެ އާންމު ކޮމިޓީ ބައްދަލުވުމުގައި މިއަދު މެންބަރުން މަޝްވަރާކުރެއްވީ މާލީ ބަޔާން ހުށަހަޅަންޖެހޭ ގޮތަށް އޮތް މާއްދާއާ ގުޅޭ ގޮތުންނެވެ.
ކޮމިޓީގައި އިންނަވާ ފޭދޫ ދެކުނު ދާއިރާގެ މެންބަރު އިބްރާހީމް ދީދީ ވިދާޅުވީ، ފިލްޒާ ދެއްވި ލަފާގެ މަތީން، ހުވާ ކުރާ ދުވަހުން ފެށިގެން ތިން މަސް ދުވަހުގެ ތެރޭގައި މާލީ ބަޔާން ހުށަހެޅުމަކީ އެންމެ ނަޒާހަތްތެރި ގޮތް ކަމަށެވެ.
މަޖިލީހުގެ ފޭދޫ ދެކުނު ދާއިރާގެ މެންބަރު އިބްރާހީމް ދީދީ -- ފޮޓޯ/ މަޖިލިސް
އެހެން ނަމަވެސް ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ވިދާޅުވި ގޮތުގައި މީގެ ކުރީން ވެސް މެންބަރުން ޚަރަދުތައް ކޮށްފައިވާ ގޮތުގެ ބަޔާނެއް ވަނީ އިލެކްޝަންސް ކޮމިޝަން (އީސީ)އަށް ހުށަހަޅާފައެވެ. އެ ގޮތުން އަނެއްކާ ތިން މަސް ދުވަހުގެ މާލީ ބަޔާނެއް ހުށަހެޅުމުން ވަކި އިތުރު ކަންތައްތަކެއް ފެންނާނެ ކަމެއް ނޫން ކަމަށް އޭނާ ގަބޫލުކުރައްވައެވެ.
ކަނޑިތީމު ދާއިރާގެ މެންބަރު އަމީން ފައިސަލް ވިދާޅުވީ، މަޖިލިސް މެންބަރުން މަގާމުގެ މަންފާ ނަންގަވައިގެން ތިއްބަވާ ކަމުގެ ތުހުމަތު ކުރެވެމުން އައި ނަމަވެސް، އޭގެ ތެރެއިން ގިނަ ބޭފުޅުންނަކީ މަގާމާ ހަވާލުވެވަޑައިގަތުމުގެ ކުރިން ވެސް ވިޔަފާރި ކުރައްވާ ބޭފުޅުން ކަމަށެވެ. ހުވާ ކުރައްވާތާ ތިން މަސް ދުވަހުގެ ތެރޭގައި މާލީ ބަޔާން ހުށަހެޅުމަކީ ރައްޔިތުންގެ މެދުގައި މެންބަރުންނަށް އޮންނަ އިތުބާރު ބޮޑެވެގެންދާނެ ކަމެއްކަން ފާހަގަކުރައްވައި، މި އިސްލާހަށް އޭނާ ތާއީދު ކުރެއްވިއެވެ.
މަޖިލިސް މެންބަރުން ހުވާ ކުރައްވާތާ އަހަރު ދުވަސް ފަހުން މާލީ ބަޔާން ހުށަހަޅަންޖެހޭ ގޮތަށް އޮތް އޮތުމާ ގުޅިގެން، ނުހައްގު މުއްސަނދިކަން ހޯދުމުގެ ފުރުސަތު ފަހިވެފައި އޮތަތީ، ޓްރާންޕޭރެންސީ މޯލްޑިވްސްއިން ވެސް ވަނީ މީގެ ކުރިން ކަންބޮޑުވުން ފާޅުކޮށްފައެވެ.