ރައްޔިތުންގެ މަޖިލީހުގެ މެންބަރުން މަޖިލީހުގައި އަމިއްލަ މަސްލަހަތަށް ވަކާލާތުކުރާތީ ޓްރާންސްޕޭރެންސީ މޯލްޑިވްސްއިން އެ ކަމުގެ ކަންބޮޑުވުން މިއަދު ފާޅުކޮށްފިއެވެ.
މަޖިލިސް މެންބަރުންގެ މާލީ ބަޔާން ހާމަނުކުރާތީ ޓްރާންސްޕޭރެންސީން އިއްޔެ ވެސް ވަނީ ކަންބޮޑުވުން ފާޅުކޮށްފައެވެ. ނަމަވެސް، އެ ޖަމިއްޔާއިން މަޖިލިސް މެންބަރުންގެ މާލީ ބަޔާން ހާމަކުރުމަށް ގޮވާލާފައިވަނީ އުސޫލު ރަނގަޅަށް ސާފުނުކޮށް ކަމަށް މަޖިލީހުގެ އިދާރާއިން ބުންޏެވެ.
މިހާރު އަމަލުކުރާ ގަވާއިދުތަކުގެ ދަށުން ރައްޔިތުންގެ މަޖިލީހުގެ މެންބަރުން އިންތިޚާބުވެ، މަގާމާއި ހަވާލުވާއިރު، މާލީ ބަޔާން ހުށަހަޅާކަށް ނުޖެހެއެވެ. މިހާރު ކަނޑައެޅިފައިވާ އުސޫލުގެ މަތިން މެންބަރުންގެ އެންމެ ފުރަތަމަ މާލީ ބަޔާން މަޖިލީހަށް ހުށަހަޅަންޖެހެނީ މަގާމާ ހަވާލުވެވަޑައިގަތުމަށް ފަހު ދޮޅު އަހަރު ފަހުންނެވެ.
ހަމަ މި މައްސަލައިގައި ޓްރާންސްޕޭރެންސީން މިއަދު ނެރުނު ބަޔާނުގައިވަނީ، މެންބަރުން މަޖިލީހުގައި އާންމު މަސްލަހަތަށްވުރެ އަމިއްލަ މަސްލަހަތަށް ވަކާލާތު ކުރުމަކީ އެ ޖަމިއްޔާއިން ނުހަނު ކަންބޮޑުވާ ކަމެއް ކަމަށެވެ.
އެ ގޮތުން މަޖިލީހުގައި ތިއްބަވާ 93 މެންބަރުންގެ ތެރެއިން 67 މެންބަރުންގެ އެސެޓާއި ދަރަނިތަކާއި އެހެން މަސްދަރުތަކުން ލިބޭ އާމްދަނީއާއި، މަސްލަހަތު ފުށުއަރާ ކަންކަމުގެ މައުލޫމާތު އެއްވެސް މިންވަރަކަށް އެނގިފައިނުވާކަން ވެސް އެ ބަޔާނުގައި ފާހަގަކޮށްފައިވެއެވެ.
މާލީ ބަޔާން ހުށަހެޅުމަށް އޮންނަ މި ދިގު މުއްދަތުގެ ސަބަބުން، އެ މުއްދަތުގެ ތެރޭގައި މަޖިލިސް މެންބަރުންގެ މުއްސަނދިކަން ކަށަވަރުކުރަން އުނދަގޫވެ، އެއްވެސް މުއްސަނދިކަމަކީ ނުހައްގު މުއްސަނދިކަމެއްތޯ ނުވަތަ ނޫންތޯ ކަނޑައެޅުމަށް ދަތިތަކެއް ކުރިމަތިވާ ކަމަށް ޓްރާންސްޕޭރެންސީން ބުނެއެވެ.
ޓްރާންސްޕޭރެންސީން އިތުރަށް ބުނީ، އެ ޖަމިއްޔާއިން ބައިނަލްއަގުވާމީ އެންމެ ރަނގަޅު އުސޫލުތަކާއި މިންގަނޑުތަކާއި އެއްގޮތަށް މިހާރު އޮތް މާލީ ބަޔާން ހުށަހެޅުމުގެ ނިޒާމު ހަރުދަނާ ކުރުމަށް ވަކާލާތު ކުރަމުންދާ ކަމަށެވެ.
މި ގޮތުން މާލީ އަދި އެހެނިހެން މަސްލަހަތުތައް ހާމަކުރުމުގެ ބިލު ޑްރާފްޓުކޮށް 2022ވަނަ އަހަރުގެ ފެބްރުއަރީގައި 19ވަނަ ރައްޔިތުންގެ މަޖިލީހަށް ވާނީ ހުށަހަޅާފައި ކަމަށް ވެސް އެ ޖަމިއްޔާއިން ބުނެއެވެ. މި ބިލަކީ މެންބަރުން ހުށަހަޅާ މާލީ ބަޔާންތައް ވެރިފައިކުރެވޭނެ ނިޒާމެއް އެކުލެވި، މާލީ ބަޔާން ހުށަނާޅާ މެންބަރުންނަށް ފިޔަވަޅު އެޅޭ ގޮތަށް ތައްޔާރުކުރެވިފައިވާ ބިލެކެވެ. އަދި، 19ވަނަ މަޖިލިސް ނިމިގެން ދިޔައިރު މި ބިލު އޮތީ ކޮމިޓީ މަރުހަލާގައިކަން ޓްރާންސްޕޭރެންސީން ފާހަގަކުރިއެވެ.
ހަރުދަނާ ގާނޫނުތަކެއް ނެތުމުން، ރައްޔިތުންގެ މަޖިލީހުގެ މެންބަރުން މަގާމާ ހަވާލުވެވަޑައިގަންނަވާއިރު މާލީ ބަޔާންތައް އަމިއްލަ އިސްނެގުމުގެ މަތީން ހާމަކޮށް، ކޮރަޕްޝަނާ ދެކޮޅަށް ކުރާ މަސައްކަތުގައި އާންމުންގެ އިތުބާރު އިތުރުކުރުމަށް ރައްޔިތުންގެ މަޖިލީހުގެ މެންބަރުންނަށް އެ ޖަމިއްޔާއިންވަނީ ގޮވާލާފައެވެ.
މި މައްސަލައިގައި މަޖިލިސް އިދާރާއިން ބުނީ، ނިމިދިޔަ 19ވަނަ ރައްޔިތުންގެ މަޖިލީހުގެ މެންބަރުންގެ ފާއިތުވި ހަތަރު އަހަރުގެ މާލީ ބަޔާން ރައްޔިތުންގެ މަޖިލީހުގެ ވެބްސައިޓުގައި ޝާއިއުކޮށްފައި ހުންނާނެ ކަމަށެވެ.