ޝާހްރުކް ޚާނާއި ދަރިފުޅު ސުހާނާ ޚާން އެކީގައި ފުރަތަމަ ފަހަރަށް ކުޅޭ ފިލްމު "ދަ ކިންގް"ގެ ނުބައިބައި ރޯލުން އެކްޓަރު އަބީޝެކް ބައްޗަން ފެންނާނެކަމަށް ރިޕޯޓުތައް ބުނެފިއެވެ.
ފިލްމީ ޚަބަރުތައް ގެނެސްދޭ ތަފާތު އެކި މީޑިއާތަކުން މިކަން ކަށަވަރުކޮށްދީފައިވީ ނަމަވެސް އަބީޝެކްގެ ފަރާތުން މި ޚަބަރު ކަށަވަރުކޮށްދީފައެއް ނުވެއެވެ. ބައެއް މީޑިއާ ރިޕޯޓުތަކުން ބުނެފައިވާ ގޮތުގައި އަބީޝެކަށް ފިލްމުން ފުރުސަތު ލިބުމާ ގުޅިގެން އަމީތާބް ބައްޗަން ވެސް ވަނީ އެކްޓަރަށް މަރުހަބާ ކިޔާފައެވެ.
ފިލްމުގައި އަބީޝެކް ކުޅޭނެ ރޯލާ ބެހޭ ތަފުސީލުތައް ވެސް ސިއްރުކުރެވިފައިވާއިރު "ދަ ކިންގް"ގައި ޝާހާއި އަބީޝެކްގެ ވަރަށް ވަރުގަދަ ކުރިމަތިލުންތަކެއް ފެންނާނެ ކަމަށް ރިޕޯޓުތައް ބުނެއެވެ.
ޝާހާއި އަބީޝެކް އެކީގައި ފުރަތަމަ ފަހަރަށް މަސައްކަތްކުރި ފިލްމު "ކަބީ އަލްވިދަނާ ކެހެނާ" އަދި "ހެޕީ ނިއު އިއާ"އަށް ފަހު ދެ ތަރިންނަށް އެކީގައި މަސައްކަތް ކުރުމުގެ ފުރުސަތު ލިބިފައެއް ނުވެއެވެ. ފިލްމު "ދަ ކިންގް" ވެގެންދާނީ އަބީޝެކާއި ޝާހު އެކީގައި މަސައްކަތް ކުރާނެ ތިންވަނަ ފިލްމަށެވެ.
ޝާހު އާއި އަބީޝެކް އެކީގައި މަސައްކަތް ކުރި ފިލްމު "ކަބީ އަލްވިދަނާ ކެހެނާ"ގެ ޕޯސްޓަރެއް--ފޮޓޯ/ބޮލީވުޑްހަންގާމާ
ކުރީގެ ފިލްމުތަކުން އަބީޝެކް ފެނިފައިވަނީ ވަރަށް ސާދާސީދާ މިޒާޖެއްގެ މީހެއްގެ ގޮތުގައި ކަމަށް ވިޔަސް "ދަ ކިންގް"އިން ބެލުންތެރިންގެ އެ ވިސްނުން ވަރަށް ބޮޑަށް ބަދަލުކޮށްލާނެ ކަމަށް ރިޕޯޓުތައް ބުނެއެވެ.
ފިލްމު "ދަ ކިންގް"އަކީ "ކަހާނީ"ފަދަ ފިލްމުތައް ޑައިރެކްޓް ކޮށްފައިވާ ސުޖޯއި ގޯޝް ޑައިރެކްޓަރެއްގެ ގޮތުގައި މަސައްކަތްކުރާ ފިލްމެކެވެ. ޝާހުގެ ކެރިއަރުގައި ބޮޑު ކާމިޔާބީއެއް ލިބުނު ފިލްމު "ޕަތާން"ގެ ޑައިރެކްޓަރު ސިދާތު އާނަންދުގެ ފިލްމު ކުންފުނިން ގެނެސްދޭ މި ފިލްމަކީ ނެޓްފްލިކްސްއިން ގެނެސްދިން "ދަ އާޗީސް"އަށް ފަހު ސުހާނާ ކުޅޭ ފުރަތަމަ ބޮލީވުޑް ފިލްމެވެ.