ނުވަދިހައިގެ އަހަރުތަކުގައި ބޮލީވުޑްގައި ވިދާލި ތަރިން ކަމަށްވާ ބޮބީ ޑިއޯލާއި ޕްރިތީ ޒިންތާގެ ފިލްމު "ސޯލްޖާ"ގެ ސީކުއަލްއަކަށް ތައްޔާރުވަމުން އަންނަ ކަމަށް ޑައިރެކްޓަރު ރަމޭޝް ތައުރާނީ ބުނެފިއެވެ.
މީގެ 26 އަހަރު ކުރިން ރިލީޒްކުރި ފިލްމު "ސޯލްޖާ"އަކީ ވަރަށް ގިނަ ބައެއްގެ މެދުގައި މަގުބޫލުވި ފިލްމެކެވެ. ޚާއްސަކޮށް ފިލްމުގެ ބަތަލާ ޕްރިތީ ޒިންތާ އާއްމުންގެ މެދުގައި މަގުބޫލުވި މި ފިލްމުގެ ލަވަތަކަކީ ވެސް ވަރަށް ގިނަ ބަޔަކަށް ކަމުދިޔަ ލަވަތަކެކެވެ.
ޕްރިތީ ޒިންތާ ބޮލީވުޑަށް ތައާރަފުވި މި ފިލްމު ރިލީޒްކުރި އަހަރު ބޮކްސް އޮފީހުގައި ބޮޑު ކާމިޔާބީއެއް ހޯދިއިރު ޕްރިތީއާއި ބޮބީގެ ޖޯޑު ވެސް ވަރަށް ގިނަ ބަޔަކަށް ކަމުދިޔައެވެ.
ފިލްމު "ސޯލްޖާ"ގެ ސީކުއަލްއެއް އުފެއްދުމުގެ މަޝްވަރާ މީގެ ކުރިން ވެސް ބޮބީ ޑިއޯލް ވަނީ ޑައިރެކްޓަރު ރަމޭޝް ތައުރާނީއަށް ދީފައެވެ. ދާދި ފަހުން ރިލީޒްކުރި ސީކުއަލް "އިޝްގް ވިޝްގް ރީ ބައުންޑު"ގެ ޑައިރެކްޓަރު ބުނެފައިވާ ގޮތުގައި "ސޯލްޖާ"ގެ ސީކުއަލްގެ މަސައްކަތް އަންނަ އަހަރު ފަށަން އަންނަނީ ތައްޔާރުވަމުންނެވެ.
ފިލްމު "ސޯލްޖާ"ގައި ބަތަލާ ޕްރިތީ ޒިންތާ--ފޮޓޯ/ޕިންޓްރެސްޓް
ފިލްމުގައި ބޮބީއާއި ޕްރިތީ ފެންނާނެކަމުގެ ޔަގީންކަން ދެވޭނީ ފިލްމުގެ ސްކްރިޕްޓް ބިނާކުރެވޭ ގޮތަކުން ކަމަށާއި އެކަން ވަރަށް އަވަހަށް އިއުލާނުކުރާނެ ކަމަށް ތައުރާނީ ވަނީ ބުނެފައެވެ.
ފިލްމު "ސޯލްޖާ"އަކީ ޕްރިތީ ބޮލީވުޑަށް ނުކުންނަން ތައްޔާރުވަމުން އައި ފިލްމު "ކިޔާ ކެހެނާ"އަށް ފަހު ސޮއިކުރި ފިލްމެކެވެ. އެހެންނަމަވެސް ޑައިރެކްޓަރު ތައުރާނީގެ ފިލްމު "ކިޔާ ކެހެނާ" ރިލީޒްކުރުން ފަސްކުރެވުމާ ގުޅިގެން ނިންމީ ފިލްމު "ސޯލްޖާ"އިން ޕްރިތީ ބޮލީވުޑަށް ނެރުމަށެވެ.