ނައިޖީރިއާގެ ސްކޫލް އިމާރާތެއް ވެއްޓި 16 ދަރިވަރުން މަރުވެއްޖެއެވެ.
އެ ހާދިސާގައި އިތުރު ކުދިންތަކެއް ވަނީ ޒަޚަމްވެފައެވެ.
އޮފިޝަލުން މިހާތަނަށް ބުނެފައިވާ ގޮތުގައި ވެއްޓިފައި ވަނީ ޕްލެޓޫ ސްޓޭޓްގެ ޖޯސް ނޯތު ޑިސްޓްރިކްޓްގެ ސެއިންޓް އެކަޑަމީ ސްކޫލް އިމާރާތެވެ.
އޭއެފްޕީން ރިޕޯޓުކޮށްފައިވާ ގޮތުގައި މަރުވި ހުރިހާ ކުދިންވެސް ތިބީ ސްކޫލް ޔުނީފޯމްގައެވެ.
އެ ސްކޫލްގެ ބެލެނިވެރިން އަންނަނީ އެ މީހުންގެ ކުދިން ހޯދަމުންނެވެ. ދެ ފަންގިފިލާއަށް ހުރި އެ އިމާރާތް ވެއްޓިފައި ވަނީ ދަރިވަރުން އިމްތިހާނު ހަދަމުން ދަނިކޮށް ކަމަށް އޭއެފްޕީން ރިޕޯޓުކޮށްފައިވެއެވެ.
"ޕްލެޓޫ ސްޓޭޓްގެ ޖޯސް ނޯތު ލޯކަލް ގަވަރުމަންޓް އޭރިއާގެ ބޫސާ ބުޖީގައި ހުންނަ ސެއިންޓް އެކަޑަމީގެ ދެބުރީގެ އިމާރާތެއް މިއަދު ހެނދުނު ވެއްޓި އެތައް ދަރިވަރުންނެއް މަރުވެއްޖެ." ނޭޝަނަލް އިމަޖެންސީ މެނޭޖްމަންޓް އެޖެންސީން ނެރުނު ބަޔާނެއްގައިވެއެވެ.
އިމާރާތް ވެއްޓެން މެދުވެރިވި ސަބަބު ސާފެއްނޫނެވެ. ނަމަވެސް އެ ސަރަހައްދުގައި ދިރިއުޅޭ މީހުން ބުނާގޮތުގައި އެ ސަރަހައްދަށް ވަނީ މެދުނުކެނޑި ތިން ދުވަސް ވަންދެން ބޯކޮށް ވަރޭވެހިފައެވެ.
އެފްރިކާގެ އެންމެ އާބާދީ ބޮޑު ނައިޖީރިއާގައި އިމާރާތް ވެއްޓުމަކީ އާންމު ކަމަކަށް ވެފައި ވަނީ އިމާރާތްކުރުމުގެ މިންގަނޑުތައް ތަންފީޒު ކުރުން ލުއިކޮށް، އިހުމާލުވެ، އިމާރާތްކުރުމުގައި ފެންވަރު ދަށް ތަކެތި ބޭނުން ކުރުމުގެ ސަބަބުންނެވެ.