ކޮމްޕިއުޓަރު މެދުވެރިކޮށް ކުރާ ސައިބާ ކްރައިމްގެ އަމަލުތަކަކީ ކުށް ކަމުގައި ކަނޑައެޅުމަށް ގާނޫނުލްއުގޫބާތަށް ގެންނަ އިސްލާހުގެ ބިލާއެކު މުހިންމު އިތުރު ދެ ބިލެއް ރައްޔިތުންގެ މަޖިލީހުން ބަލައިގަނެ މިއަދު ކޮމިޓީއަށް ފޮނުވައިފިއެވެ.
ދެން ބަލައިގެންފައި ވަނީ މަތީ ތައުލީމާއި ތަމުރީނުގެ ގާނޫނަށް އިސްލާހު ގެނައުމުގެ ބިލާއި، ކޮޕީރައިޓާއި އެއާގުޅޭ އެހެނިހެން ހައްގުތަކުގެ ގާނޫނަށް ގެންނަ އިސްލާހުތަކުގެ ބިލެވެ.
ވޯޓުގައި ބައިވެރިވި 81 މެންބަރުންގެ އިއްތިފާގުން ސައިބާ ކްރައިމްގެ ބިލު ވަނީ މަޖިލިސް ތަޅުމުން ބަލައިގަނެ އިތުރަށް ދިރާސާ ކުރުމަށް ޖުޑިޝަރީ ކޮމިޓީއަށް ފޮނުވާފައެވެ. އަދި ދެން ނެގި ދެ ވޯޓުގައި ބައިވެރިވި 82 މެންބަރުންގެ އިއްތިފާގުން މަތީ ތައުލީމާއި ތަމްރީނުގެ ގާނޫނަށް އިސްލާހު ގެނައުމުގެ ބިލާއި ކޮޕީރައިޓް ގާނޫނަށް އިސްލާހު ގެނައުމުގެ ބިލު ވެސް ވަނީ ބަލައިގެންފައެވެ.
އެއާއެކު މަތީ ތައުލީމާ ބެހޭ ބިލު އިތުރަށް ދިރާސާ ކުރުމަށް ގައުމީ ތަރައްގީއާއި ތަރިކައިގެ ކޮމިޓީއަށް ފޮނުވިއިރު، ކޮޕީރައިޓާ ގުޅުން ހުރި ބިލު ފޮނުވީ އިގްތިސާދީ ކޮމިޓީއަށެވެ.
ސަރުކާރުގެ ފަރާތުން މާފުށި ދާއިރާގެ މެންބަރު ހުސައިން ރިޒާ އާދަމް، ސައިބާ ކްރައިމް އަކީ ކުށް ކަމުގައި ކަނޑައަޅާ ގަނޫނުލްއުގޫބާތަށް ހުށަހެޅި އިސްލާހުގައި މައިގަނޑު 10 ކަމެއް ވަނީ ކުށުގެ ގޮތުގައި ހިމަނާފައެވެ. އެއީ:
- ހުއްދަނެތި ކޮމްޕިއުޓަރު ސިސްޓަމަކަށް އެކްސެސްވުން
- އިތުރު ކުށެއް ކުރުމަށް މަގުފަހިކުރުމުގެ ނިޔަތުގައި ހުއްދަނެތި ކޮމްޕިއުޓަރު ސިސްޓަމަކަށް އެކްސެސްވުން
- ހުއްދަނެތި ކޮމްޕިއުޓަރު ޑޭޓާ އިންޓަސެޕްޓުކުރުން
- ހުއްދަނެތި ކޮމްޕިއުޓަރު ޑޭޓާއަށް އިންޓަފިއަކުރުން
- ހުއްދަނެތި ކޮމްޕިއުޓަރު ސިސްޓަމަކަށް އިންޓަފިއަކުރުން
- ނަހަމަގޮތުގައި ޑިވައިސްތައް ބޭނުންކުރުން
- ސައިބާ ވަޔަލަންސްގެ އަމަލުތައް
- ކޮމްޕިއުޓަރާ ގުޅުންހުރި ފޯޖަރީގެ އަމަލުތައް
- ކޮމްޕިއުޓަރާ ގުޅުންހުރި އޮޅުވާލުމުގެ އަމަލުތައް
- ކޮޕީރައިޓާ ގުޅޭ އެއާގުޅުންހުރި އެހެނިހެން ހައްގުތަކަށް އަރައިގަތުމުގެ އަމަލުތައް
ސަރުކާރުގެ ފަރާތުން މާފަންނު ދެކުނު ދާއިރާގެ މެންބަރު އަބްދުﷲ ރިފާއު ހުށަހެޅުއްވި މަތީ ތައުލީމާއި ތަމުރީނުގެ ގާނޫނަށް އިސްލާހު ގެނައުމުގެ ބިލަކީ، މަތީ ތައުލީމުގެ ދޮރު މިހާރަށްވުރެ ބޮޑަށް ހުޅުވާލައި، ވަސީލަތްތަކާއި ގާބިލުކަން ހުރި ފަރާތްތަކަށް ރާއްޖޭގައި ޔުނިވަސިޓީ ތައުލީމު ފޯރުކޮށްދިނުމަށް ފުރުސަތު ފަހިކޮށްދޭނެ ބިލެކެވެ.
ހަމައެއާއެކު ދެން ބަލައިގެންފައިވާ ކޮޕީރައިޓްގެ ގާނޫނަށް އިސްލާހު ގެނައުމުގެ ބިލަކީ ސަރުކާރުގެ ފަރާތުން ނިލަންދޫ ދާއިރާގެ މެންބަރު ފާތިމަތު ސައުދާ ހުށަހެޅުއްވި ބިލެކެވެ.
މި ގާނޫނުގެ ދަށުން އުފެއްދުމެއް ހިމާޔަތް ކުރެވޭނީ، އެ އުފެއްދުމެއް ހުށަހަޅައިދޭ ގޮތަށް ނުވަތަ އުފެއްދުމެއްގައި ހިމެނޭ އެއްޗެއްގެ ސަބަބުން ނުވަތަ އެ އެއްޗެއްގެ ފެންވަރަށް ނުވަތަ މަގުސަދަށް ބަލައިގެން ނޫންކަމަށް ބިލުގައިވެއެވެ.
ހަމައެއާއެކު ބިލުގައިވަނީ ކޮޕީރައިޓުގެ ވެރިފަރާތުން އެހެން ފަރާތަކަށް ހުއްދަދީފައިނުވާ ހިނދެއްގައި އެ އުފެއްދުމެއްގެ އަސްލެއް ނުވަތަ ކޮޕީއެއް އާންމުންނަށް ވިއްކުން ނުވަތަ ކުއްޔަށް ދިނުމަށް ނުވަތަ އާންމުންނަށް ދޫކޮށްގެން ނުވާނެ ކަމަށެވެ.
މި ބިލުގައި ހުށަހަޅާފައިވާ އިތުރު ކަންކަމުގެ ތެރޭގައި ލިޔުމުގެ އަސްލީ އުފެއްދުންތަކާއި، މިއުޒިކީ އަސްލީ އުފެއްދުންތައް އަދި އަސްލީ ފަންނުވެރި އުފެއްދުންތައް ކަމަށް ގާނޫނުގައިވާ މާއްދާއަށް ނަންބަރެއް އިތުރުކޮށް އޭގައި އޯޑިއޯ ވިޝުއަލް މަސައްކަތްތައް ހިމެނުމެވެ.
އަދި، އޯޑިއޯ ރެކޯޑިންއާއި، ސެޓްލައިޓް، އިންޓަނެޓް، އަދި ކޭބަލް މެދުވެރިކޮށްކުރެވޭ ބްރޯޑްކާސްޓު ހިމެނުމެވެ.
މީގެ އިތުރުން، ގާނޫނުގެ ދަށުން ހިމާޔަތްކޮށްދީފައިވާ ހައްގަކަށް އަރައިގެންފިނަމަ އަދަބުގެ ގޮތުގައި އޭގެ ކުޑަބޮޑު މިނަށް ބަލައި 50،000 ރުފިޔާއާއި 300،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމަށް ވެސް އިސްލާހުގައިވަނީ ހިމަނައިފައެވެ.