މާލޭގައި ހަށިވިއްކުމުގެ ވިޔަފާރިކުރާ ސްޕާއަކުން އިއްޔެ ރޭ ހައްޔަރުކުރި ތައިލެންޑަށް ނިސްބަތްވާ ތިން އަންހެނުންގެ މައްޗަށް 15 ދުވަސް ޖަހައި، ދިވެހި ފިރިހެން މީހާ ޝަރުތުތަކާއެކު ދޫކޮށްލައިފިއެވެ.
އެމީހުން ހައްޔަރު ކުރީ މާލޭގައި ސްޕާއެއްގެ ގޮތުގައި ހިންގަމުންދާ ތަނެއްގައި އަންހެނުންތަކެއް ހަށި ވިއްކާ ކަމަށް ފުލުހުންނަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގެ ދަށުންނެވެ.
ފުލުހުން މިރޭ މީޑިއާތަކާއި ހިއްސާކުރި މެސެޖެއްގައި ބުނީ، މި މައްސަލައާ ގުޅިގެން ހައްޔަރު ކުރި މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ދިވެހި ފިރިހެން މިހާ ޝަރުތުތަކާއެކު ދޫކޮށްލާފައިވާ ކަމަށެވެ. ނަމަވެސް، ތައިލެންޑު ތިން އަންހެނުން 15 ދުވަހަށް ބަންދު ކުރުމަށް އެ ކޯޓުން އަމުރުކޮށްފައިވާ ކަމަށް ފުލުހުން ބުނެއެވެ.
ރާއްޖޭގައި ހަށިވިއްކުމުގެ ވިޔަފާރި ފުޅާވެފައިވާއިރު، މާލޭގެ އިތުރުން އެހެން ސަރަހައްދުތަކުން ވެސް ހަށިވިއްކުމުގެ ތުހުމަތުގައި މިފަހުން މީހުން ހައްޔަރުކޮށްފައިވެއެވެ.
މިދިޔަ ފެބްރުއަރީ މަހު ހޯމް މިނިސްޓަރު އަލީ އިހުސާން ވަނީ، މާލޭ ސަރަހައްދުން އެކަނި ވެސް އެކިއެކި ނަންނަމުގައި ހަށިވިއްކުމުގެ ވިޔަފާރިކުރާ 111 ތަނެއް ފާހަގަކުރެވިފައިވާ ކަމަށް ވިދާޅުވެފައެވެ. އޭގެ ތެރެއިން ބައެއް ތަންތަނަށް ޓޫރިސްޓު ވިސާގައި ބިދޭސީން ގެނެސްގެން، އެ މީހުން ލައްވައި ހަށިވިއްކުމުގެ ވިޔަފާރި ހިންގާ ކަމަށް އޭނާ ވިދާޅުވެފައިވެއެވެ.