މެޓާގެ ސޯޝަލް މީޑިއާ ޕްލެޓްފޯމް ތްރެޑްސް، ލޯންޗްކުރިތާ އެއް އަހަރު ވާން ކައިރިވީއިރު އެކްޓިވް ޔޫޒަރުންގެ އަދަދު 175 މިލިއަނަށް އަރައިފިއެވެ.
މި މަޢުލޫމާތު ހާމަކޮށްފައިވަނީ މެޓާގެ ސީއީއޯ މާކް ޒަކަބާގެވެ.
ތްރެޑްސްއަކީ ކުރިން ޓްވިޓާގެ ނަމުން މަޝްހޫރުވެފައިވާ އެކްސްއަށް ވާދަވެރިއެއްގެ ގޮތުގައި ތަޢާރަފުކުރެވުނު ޕްލެޓްފޯމެކެވެ. މިދިޔަ އަހަރުގެ ޖުލައި މަހުގެ ފަސްވަނަ ދުވަހު އެޕް ސްޓޯތަކަށް ނެރެވުނު މި އެޕްލިކޭޝަން ވަނީ ފާއިތުވި ދުވަސްތަކުގައި ޔޫޒަރުން އިތުރުކުރުމަށް ގިނަގުނަ މަސައްކަތްތަކެއް ކޮށްފައެވެ.
ތްރެޑްސް ފެށުމަށް ފަހު ހަފުތާއެއްހާ ދުވަހުގެ ތެރޭގައި 100 މިލިއަން މީހުން ބޭނުންކުރަން ފެށިއެވެ. މީގެ މައިގަނޑު އެއް ސަބަބަކީ އިންސްޓަގްރާމް ބޭނުންކުރާ މީހުންނަށް ތްރެޑްސް ޕްރޮފައިލް ފަސޭހަކަމާ އެކު ހެދުމުގެ ފުރުސަތު ލިބުމެވެ.
ޒަކަބާގް ވަނީ މިދިޔަ އޭޕްރީލް މަހު ތްރެޑްސްގެ މަންތުލީ އެވްރެޖް ޔޫޒާސް (އެމްއޭޔޫ) 150 މިލިއަނަށް ވުރެ މަތިވެފައިވާ ކަމަށް ބުނެފައެވެ. ނަމަވެސް، މަހަކު އެވްރެޖް ޔޫޒަރުންގެ މި އަދަދު ލިބެނީ ވަރަށް ހަނި ފުރުޞަތެއްގައި ކަމަށް ބައެއް ފަރާތްތަކުން ފާހަގަކުރެވެއެވެ. މި ގޮތުން ދުވާލަކު އެކްޓިވްކޮށް ބޭނުންކުރާ ފަރާތްތަކުގެ އަދަދާއި، ކޮންމެ ޔޫޒަރެއް އެވްރެޖްކޮށް ތްރެޑްސްގައި ހޭދަކުރާ ވަގުތު ފަދަ މުހިންމު މަޢުލޫމާތުތައް ހާމަކޮށްފައެއް ނުވެއެވެ.
ތްރެޑްސް ބައިނަލްއަގުވާމީ ގޮތުން ފުޅާކޮށް، އާ ފީޗާތައް ތަޢާރަފުކުރުމާ އެކު ބޭނުންކުރާ މީހުންގެ އަދަދު އިތުރުވެފައިވީ ނަމަވެސް، މާކެޓް އިންޓެލިޖެންސް ފާމް، ސެންސަރު ޓަވަރުން ބުނާ ގޮތުގައި އެންގޭޖްމަންޓް އިތުރުކުރުމަށް ދަތިތަކެއް ކުރިމަތިވެފައިވެއެވެ.
ސެންސަރު ޓަވަރުގެ ތަފާސްހިސާބުތަކުން ދައްކާ ގޮތުގައި މިދިޔަ މަހު އެވްރެޖްކޮށް ދުވާލަކު ތިން ސެޝަނާއި ހަތް މިނެޓް ތްރެޑްސްގައި ޔޫޒަރުން ހޭދަކޮށްފައިވެއެވެ. މިއީ މިދިޔަ އަހަރުގެ ޖުލައި މަހާ އަޅާބަލާއިރު 79 އިންސައްތަ ދަށް އަދަދެކެވެ.
ތްރެޑްސްއަށް މާދަމާ އެއް އަހަރު ފުރޭއިރު، ތްރެޑްސް ވެފައިވަނީ އެންމެ ކުރުމުއްދަތެއްގައި އެންމެ ގިނަ ޔޫޒަރުން ހަމަކުރި އެއް ޕްލެޓްފޯމަށެވެ.