ތްރެޑްސް އެޕްގެ ސާޗް ފީޗާ އިތުރަށް ފުރިހަމަކޮށް ބޭނުން ޕޯސްޓެއް ސާޗް ކޮށްލެވޭގޮތް ހަދައިފިއެވެ.
މެޓާ ކުންފުނިން ހޯމަ ދުވަހު އިއުލާނު ކުރި ގޮތުގައި އެކުންފުނީގެ އެކްސް އާ ވާދަކުރާ އިންސްޓަގްރާމް ތްރެޑްސް އެޕްގެ ސާޗް އިންޓަފޭސް އިތުރަށް ވަނީ ފުރިހަމަ ކޮށްފައެވެ.
އިންސްޓަގްރާމްގެ ސޯޝަލް ގްރާފް މައްޗަށް ބިނާކޮށް ތައްޔާރުކޮށްފައިވާ މި އެޕަކީ އެލޮން މަސްކްގެ އެކްސްއާ ވާދަކުރުމަށް މެޓާއިން ނެރެފައިވާ އެޕެކެވެ.
މި އައު އަޕްޑޭޓާއެކު ތްރެޑްސް ބޭނުންކުރާ ފަރާތްތަކަށް ވަކި ޕޯސްޓްތަކެއް ހޯދުމަށް ފަސޭހަވާނެއެވެ. މީގެ ތެރޭގައި ޔޫސާ ޕްރޮފައިލްތަކާއި ތާރީޚުތަކުގެ މައްޗަށް ބިނާކޮށް ސާޗް ކުރުމުގެ އިޚްތިޔާރު ލިބޭނެއެވެ.
ތްރެޑްސްގެ ސާޗް ފީޗާ ފުރިހަމަ ކުރިކަމަށް އެ ޕްލެޓްފޯމުން ބުނިކަމުގައި ވިޔަސް، މި އައު ފީޗަ އެކްސްގެ އެޑްވާންސްޑް ސާޗް ހާ އަދިވެސް ފުރިހަމައެއް ނޫނެވެ. އެކްސްގައި ބަހާއި، ކީވޯޑްތަކާއި، ވަކި ޖުމްލަތަކާއި، ހިމަނަން ބޭނުންނުވާ ބަސްތަކާއި، ހޭޝްޓެގްތަކުގެ މައްޗަށް ބިނާކޮށް ސާޗް ކުރެވެއެވެ. ނަމަވެސް މި އަޕްޑޭޓާއެކު ތްރެޑްސްގެ ސާޗް ފީޗާ ބްލޫސްކައިގެ ސާޗް ފީޗާއާ އެއްހަމައަކަށް އަންނާނެއެވެ.
މި އަޕްޑޭޓް އައުމުގެ ކުރިން ތްރެޑްސްގެ ސާޗް ފީޗާ ވަނީ ވަރަށް އާދައިގެ ފެންވަރެއްގައެވެ. ކީވާޑްތަކުގެ މައްޗަށް ބިނާކޮށް ސާޗް ކުރެވުނު ނަމަވެސް އޭގެ ނަތީޖާ ފިލްޓާ ކުރެވެނީ "ޓޮޕް" ނުވަތަ "ރީސެންޓް" އަށް އެކަންޏެވެ.
ތްރެޑްސްގެ އޮފިޝަލް އެކައުންޓުން ހިއްސާކުރި ޕޯސްޓެއްގައި ބުނެފައިވާ ގޮތުން މި އައު ސާޗް ފީޗާ ކުރިއަށް އޮތް ހަފްތާތަކުގައި އެ އެޕްބޭނުންކުރާ ދުނިޔޭގެ ހުރިހާ ޔޫޒަރުންނަށް ލިބޭނެއެވެ.
މީޑިއާ ރިޕޯޓްތައް ބުނާގޮތުގައި މެޓާއިން ފަހަކަށް އައިސް އަވަސް އަވަހަށް އައު ފީޗާތައް ތަޢާރަފުކުރަމުން ދަނީ ބްލޫސްކައި ނަމަކަށް ކިޔާ އަލަށް ފަށައިގަތް ސޯޝަލް ނެޓްވާކިންގ އެޕަކާ ވާދަކުރުމަށެވެ.
ބްލޫސްކައިއަކީ އެކްސްގެ ބަދަލުގައި ބޭނުންކުރެވޭ އެޕެއްގެ ގޮތުގައި އަވަސް ދުވެއްޔެއްގައި މަޤްބޫލުކަން ހޯދަމުންދާ އެޕެކެވެ. ސެޕްޓެމްބަރު މަހު ބްލޫސްކައި ބޭނުންކުރާ މީހުންގެ އަދަދު ނުވަ މިލިއަނަށްވުރެ އިތުރުވިއެވެ. އަދި އެމެރިކާގެ އިންތިޚާބުތަކަށް ފަހު މި އަދަދު އިތުރަށް އުފުލިގެން ގޮސް މިހާރު ވަނީ 24 މިލިއަނާ ގާތްކޮށްފައެވެ.
ބްލޫސްކައިގެ ނުފޫޒު ކުޑަކުރުމަށްޓަކައި މެޓާގެ ތްރެޑްސްއިން ވަނީ އައު ފީޗާތަކެއް ތަޢާރަފުކޮށްފައެވެ. މީގެ ތެރޭގައި ޔޫޒަރުންނަށް އަމިއްލައަށް ޑިފޯލްޓް ފީޑް އިޚްތިޔާރުކުރުމުގެ ފުރުޞަތު ދިނުމާއި، ފީޑްތަކުގެ ދެމެދުގައި ފަސޭހައިން އުޅެވޭނެ ގޮތަށް ޑިޒައިން ބަދަލުކުރުމާއި، އަލްގޮރިދަމް އަޕްޑޭޓްކުރުން ހިމެނެއެވެ.
މީގެ އިތުރުން ބްލޫސްކައިގެ ޔޫސަ ކިއުރޭޓެޑް ރެކޮމެންޑޭޝަން ލިސްޓްތަކާ އެއްގޮތް ފީޗަރެއް ކަމަށްވާ "ސްޓާޓާ ޕެކްސް" އެއް ތަރައްޤީކުރަމުން ދާކަންވެސް ފާހަގަކުރެވިފައިވެއެވެ.