މެޓާގެ ދަށުން ހިންގާ ފޭސްބުކާއި އިންސްޓަގްރާމް އަދި ތްރެޑްސްގައި ކޮމިއުނިޓީ ނޯޓްސް ފީޗަރެއް ތަޢާރަފުކުރާނެކަން އެކުންފުނީގެ ބާނީ މާރކް ޒަކަބާރގް އިޢުލާނުކޮށްފިއެވެ.
މި ފީޗަރަކީ އެކްސް (ކުރީގެ ޓްވިޓާ) އިން އައިޑިއާ ލިބިގެން ތައްޔާރުކުރެވޭ ފީޗަރެއް ކަމަށާއި، މިއީ ފެކްޓް ޗެކްގެ ބަދަލުގައި ބޭނުންކުރެވޭނެ ފީޗަރެއްކަމަށް މެޓާއިން ވަނީ ބުނެފައެވެ.
ޑިވެލޮޕާ އަލެސާންޑްރޯ ޕަލުއްޒީ (@alex193a)ގެ ތްރެޑްސް ޕޯސްޓެއްގައި ބުނެފައިވާ ގޮތުގައި، މި ފީޗާ މިހާރު ވަނީ ބައެއް އައިއޯއެސް ޔޫޒަރުންނަށް ލިބެން ފަށާފައެވެ. އަދި މިއީ އެނޮނިމަސް ފީޗާއެއް ކަމަށް ވެސް މެޓާއިން ވަނީ ހާމަކޮށްފައެވެ.
ޒަކަބާގް ކުރިން ބުނެފައިވާ ގޮތުގައި، މި ފީޗާ އެމެރިކާގައި ފަށައިގަތުމަށްފަހު ކުންފުނީގެ މިހާރުގެ ފެކްޓް ޗެކްކުރުމުގެ ޕްރޮގްރާމުގެ ބަދަލުގައި ބޭނުންކުރެވޭނެއެވެ. ނަމަވެސް މި ފީޗާ ހުރިހާ ޔޫޒަރުންނަށް ލިބޭނެ ތާރީޚެއް އަދި އިޢުލާނުކޮށްފައެއް ނުވެއެވެ.
ކުންފުނިން ޝާއިޢުކޮށްފައިވާ ސަޕޯޓް އާޓިކަލްއެއްގައި ބުނެފައިވާ ގޮތުގައި، ކޮމިއުނިޓީ ނޯޓްސް ފީޗާއަކީ އޮޅުވާލުމުގެ ގޮތުން ޝާއިޢުކުރެވޭ ކޮންޓެންޓާ ގުޅޭގޮތުން އިތުރު މަޢުލޫމާތު ނުވަތަ ތަފާތު ނަޒަރިއްޔާތުން ޚިޔާލު ފާޅުކުރުމުގެ ފުރުޞަތު ދޭ ފީޗަރެކެވެ.
ޕޯސްޓެއް އޮޅުންއަރާ ގޮތަށް ނުވަތަ ސައްޙަނޫން ގޮތަށް ހުރިކަމަށް ފެންނަނަމަ، ކޮންމެ ޔޫޒަރަކަށް ވެސް ނޯޓެއް ލިޔެވިދާނެއެވެ. މި ނޯޓުގައި އަސްލު މަޢުލޫމާތު، އިތުރު ތަފްސީލު ނުވަތަ އަމިއްލަ ވިސްނުން ހިމެނިދާނެއެވެ. މި ނޯޓު ބޭނުންތެރި ކަމަށް ފާހަގަކުރެވިއްޖެނަމަ، އެ ނޯޓު ޝާއިޢުކުރާނެ ކަމަށް ކުންފުނިން ބުނެފައިވެއެވެ.