މަނިޕާލް ހޮސްޕިޓަލުގެ އަގުތައް ބޮޑުވުމުގެ ސަބަބުން މި މަހުން ފެށިގެން އެ ހޮސްޕިޓަލުން އާސަންދައިގެ ޚިދުމަތް އާ ޕޭޝަންޓުންނަށް ދިނުން ވަގުތީ ގޮތުން ހުއްޓާލައިފިއެވެ.
މިކަމާ ގުޅިގެން 'ސަން'އަށް މައުލޫމާތު ދެއްވަމުން އާސަންދައިގެ މެނޭޖިން ޑިރެކްޓަރު އައިމިނަތު ޒީނިއާ ވިދާޅުވީ، އެ ޚިދުމަތްތައް ދިނުން ހުއްޓާލީ އަގުތައް ބޮޑުވުމުން ކަމަށެވެ. އަދި އެއީ ވަގުތީގޮތުން ކަމަށާއި، އަގުތައް ހެޔޮކޮށް ޚިދުމަތްތައް ދިނުމާ ގުޅޭގޮތުން މިހާރު ވެސް މަޝްވަރާތައް ކުރާކަމަށް ޒީނިއާ ވިދާޅުވިއެވެ.
"މިހާރު މި އަންނަނީ އެ ހޮސްޕިޓަލުން ދެމުންދާ ޚިދުމަތްތަކުގެ އަގުތައް ބޮޑުކަމުން އެ އަގުތައް މުރާޖާ ކުރަމުން. އެ އަގުތައް އެއަށް ވުރެ އަގުހެޔޮކޮށް ލިބޭތޯ ބެލުމަށްފަހު އެއްބަސްވާ އަގުތަކަށް ފަހު ދެން އަނެއްކާވެސް ޚިދުމަތްތައް ދޭން ފަށާނީ،" ޒީނިއާ ވިދާޅުވިއެވެ.
ނަމަވެސް މަނިޕާލް ހޮސްޕިޓަލުން އާސަންދައިގެ ދަށުން މިވަގުތު ފޮލޯއަޕް ޕޭޝަންޓުންނަށް އެ ޚިދުމަތްތައް ލިބޭކަމަށް ޒީނިއާ ވިދާޅުވިއެވެ. އަދި އެ ޚިދުމަތްތައް ހުއްޓާލީ ހަމައެކަނި އާ ޕޭޝަންޓުންނަށް ކަމަށް ވެސް އޭނާ މައުލޫމާތު ދެއްވިއެވެ.
އެ ޚިދުމަތްތައް އަލުން ފެށޭނެ ދުވަހެއް އޭނާ ވިދާޅެއްނުވެއެވެ.
އާސަންދައިގެ ދަށުން ރާއްޖެއިން ބޭރުން ދިވެހީންނަށް އެންމެ ގިނައިން ޚިދުމަތް ލިބެނީ އިންޑިއާގެ ހޮސްޕިޓަލްތަކުންނެވެ.
އެހެންކަމުން މަނިޕާލް ހޮސްޕިޓަލުން އެ ޚިދުމަތް ދިނުން މެދުކެނޑާލުމުން އާންމުން އަންނަނީ ކަންބޮޑުވުން ފާޅުކުރަމުންނެވެ.