އިނގިރޭސި ޕްރިމިއާ ލީގުގެ އެސްޓަންވިލާއަށް ކުޅެމުންދިޔަ ބްރެޒިލްގެ މިޑްފީލްޑާ ޑަގްލަސް ލުއިޒް އިޓާލިއަން ސެރިއާގެ ޔުވެންޓަސްއަށް ސޮއިކޮށްފިއެވެ.
ރިޕޯޓުތައް ބުނާ ގޮތުގައި ލުއިޒް ޔޫވޭއަށް ސޮއިކޮށްފައިވަނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. މި އެއްބަސްވުމުގެ އަގު 50 މިލިއަން ޔޫރޯއަށް އަރައެވެ.
އުމުރުން 26 އަހަރުގެ ލުއިޒް ވިލާއަށް ސޮއިކޮށްފައިވަނީ 2019 ވަނަ އަހަރު މެންޗެސްޓާ ސިޓީންނެެވެ. އަދި، މިހާތަނަށްވަނީ ވިލާއަށް 204 މެޗު ކުޅެދީ 22 ލަނޑު ޖަހައިދީފައެވެ. އެމެރިކާގައި މިހާރު ކުރިއަށްދާ ކޮމެބޯލް ކޮޕާ އެމެރިކާ މުބާރާތުގައި ވާދަކުރަމުންދާ ބްރެޒިލް ޓީމާ އެކު މި ވަގުތު ހުރި ލުއިޒް ވަނީ ބްރެޒިލަށް ވެސް 22 މެޗު މިހާތަނަށް ކުޅެފައެވެ.
ސޯޝަލް މީޑިއާގައި އާންމުކުރި ވީޑިއޯއެއްގައި ލުއިޒް ބުނީ، ޔޫވޭގެ ކުޅުންތެރިއަކަށްވުމުން ވަރަށް އުފާކުރާ ކަމަށެވެ. އަދި، އަލިއާންޒް ސްޓޭޑިއަމްގައި ކުޅުމަށް ކެތްމަދުވެފައި ހުރި ކަމަށް ވެސް އޭނާ ބުންޏެވެ.
ނިމިދިޔަ ސީޒަންގައި ލުއިޒްވަނީ ވިލާ ޓީމުގައި މުހިންމު ދައުރެއް އަދާކޮށްފައެވެ. އޭނާ ކުޅުނު 35 މެޗުގައިވަނީ ނުވަ ލަނޑު ކާމިޔާބުކޮށްދީ ވިލާ ޗެމްޕިއަންސް ލީގަށް ކޮލިފައިކޮށްދިނުމުގައި އޭނާ ވަނީ ބޮޑު ހިއްސާއެއް އަދާކޮށްފައެވެ.
މިދިޔަ ސީޒަން ވިލާ ނިންމާލީ ޕްރިމިއާ ލިގުގެ ތާވަލުގެ ހަތަރުވަނައިގައި އޮވެގެންނެވެ. ނަމަވެސް، ޕްރޮފިޓް އެންޑް ސަސްޓެއިނަބިލިޓީ ގަވާއިދުގެ ތެރެއަށް ފެތުމަށްޓަކައި ވިލާއަށްވަނީ އެ ޓީމުގެ މުހިންމު އެއް ކުޅުންތެރިއެއް ވިއްކާލަން މަޖުބޫރުވެފައެވެ.
ވިލާއިން މިހާރު ވެސް ވަނީ މި ގަވައިދުގެ ތެރެއަށް ފެތުމަށްޓަކައި އިތުރު ދެ ކުޅުންތެރިޔަކު ވިއްކާލައިފައެވެ.