ޗައިނާއާ ބޯޑަރު އޮންނަ އިންޑިއާގެ ލަދާކްގެ ކޯރެއް ހުރަސް ކުރަމުން ދަނިކޮށް އަސްކަރީ ޓޭންކެއް އަޑިއަށް ގޮސް ފަސް ސިފައިން މަރުވެފައިވާ ކަމަށް އިންޑިއާއިން ބުނެފިއެވެ.
އިންޑިއާ ސިފައިންގެ ކޮމާންޑް ސެންޓަރުން ނެރުނު ބަޔާނެއްގައި ބުނެފައިވަނީ، ހޮނިހިރު ދުވަހުގެ ވަގުތެއްގައި ޓޭންކް އަޑިއަށް ދިޔައީ އަސްކަރީ ތަމްރީނު ހަރަކާތެއްގެ ތެރޭގައި ޝިޔޮކް ކޯރުގެ ފެންގަނޑު ކުއްލިއަކަށް ބޮޑުވުމުން ކަމަށެވެ. އެ ހާދިސާ ހިނގާފައިވަނީ ލަދާކް ސަރަހައްދުގައި އިންޑިއާއާއި ޗައިނާ ބައިކޮށްލާ ލައިން އޮފް އެކްޗުއަލް ކޮންޓްރޯލް ކައިރީގައި އޮންނަ ސާސެރް ބްރަންގްސާގައެވެ.
އެ ހާދިސާއާ ގުޅިގެން އިންޑިއާގެ ދިފާއީ ވަޒީރު ރަނޖުނާތު ސިންގް ވިދާޅުވީ، މަރުވި ސިފައިން ގައުމަށް ކޮށްދެއްވި ޚިދުމަތް ހަނދާން ނުނެތޭނެ ކަމަށެވެ. ވަޒީރު ވަނީ ހާދިސާގައި މަރުވި ސިފައިންގެ އާއިލާތަކަށް ތައުޒިޔާ ވެސް ދަންނަވައިފައެވެ.
މީގެ ކުރިން 2020 ވަނަ އަހަރުގެ މެއި މަހު ބޯޑަރުގައި ހިނގި ހަމަނުޖެހުންތަކުގައި ވެސް އިންޑިއާގެ 20 ސިފައިންނާއި ޗައިނާގެ ހަތަރު ސިފައިންގެ ފުރާނަ ވަނީ ގެއްލިފައެވެ.
ދެ ގައުމުގެ ދެމެދުގައި އޮތް އަސްކަރީ އެ ހަމަނުޖެހުން ހައްލު ކުރުމަށް އިންޑިއާއި ޗައިނާއިން ވަނީ ސިލްސިލާ މަޝްވަރާތަކެއް ކުރިއަށް ގެންގޮސްފައެވެ.
އިންޑިއާއާއި ޗައިނާގެ ބޯޑަރު މައްސަލަ 1950 ގެ އަހަރުތަކުގެ ތެރޭގައި ފެށިފައިވާއިރު، އެކަމާ ގުޅިގެން ދެ ގައުމުގެ ދެމެދުގައި 1962 ވަނަ އަހަރު ވަނީ ހަނގުރާމައެއް ވެސް ކޮށްފައެވެ.