ބަންގްލަދޭޝްގައި މީހުންގެ ގަޔަށް ހަރުފަ ވިހަލުން އާދަޔާ ހިލާފަށް އިތުރުވުމާ ގުޅިގެން ހުރިހާ ސިއްހީ ހިދުމަތްދޭ ތަންތަނާއި ހޮސްޕިޓަލްތަކުގައި އެކަމަށް ފަރުވާ ދެވެ ގޮތަށް "އެންޓި-ވެނަމް" ބެހެއްޓުމަށް އެ ގައުމުގެ ސިއްހަތާބެހޭ ވުޒާރާއިން އަންގައިފިއެވެ.
ހަރުފަ ދަތްއަޅައިފިނަމަ، އެ މީހަކު ވީހާވެސް އަވަހަކަށް ހޮސްޕިޓަލްތަކަށް ގެންދިއުމަށްވެސް ސިއްހަތާބެހޭ ވަޒީރު ޑރ ސަމަންތާ ލާލް ސެން ވަނީ އާންމުންނަށް އިލްތިމާސް ކުރައްވާފައެވެ.
ބަންގްލަދޭޝްގެ އެކަހެރި ހިސާބުތަކުގައި ހުންނަ ހޮސްޕިޓަލްތަކުން ރިޕޯޓްކޮށްފައިވާ ގޮތުގައި ހަރުފަ ވިހަލައިގެން އެ ހޮސްޕިޓަލްތަކަށް ގެންދާ މީހުންގެ އަދަދު ވަނީ ވަރަށް ބޮޑަށް އިތުރުވެފައެވެ. އެންމެ ގިނައީ ދެކުނު އޭޝިއާއިން އެންމެ އާންމުކޮށް ފެންނަ ރަސެލްސް ވައިޕާ ހަރުފަ ވިހަލައިގެން ގެންނަ މީހުން ކަމަށް ހޮސްޕިޓަލްތަކުން ބުނެއެވެ.
ހަރުފަ ވިހަލުން އިތުރުވެފައިވާތީ، އެ ވާހަކަ ބަންގްލަދޭޝްގެ ސޯޝަލް މީޑިއާގައި މި ފަހަކަށްއައިސް ވަނީ ދައްކަން ފަށައިފައެވެ.
މިދިޔަ އަހަރު އާންމުކޮށްފައިވާ ދިރާސާއަކުން ދައްކާ ގޮތުގައި ބަންގްލަދޭޝްގައި ކޮންމެ އަހަރަކު ހަރުފަ ދަތްއެޅުމުގެ ސަބަބުން ގާތްގަނޑަކަށް 7،000 މީހުން މަރުވެއެވެ. އެކަމުގެ ޝިކާރައަކަށްވާ ގިނަ މީހުން ސަލާމަތްވަނީ އެންޓި ވެނަމްއިން އަވަހަށް ފަރުވާ ދީފިނަމައެވެ.
ރަސެލްސް ވައިޕާ އަކީ މީދާ ފަދަ ތަކެތި ކައި އުޅޭ އެއްޗަކަށް ވާތީ މިއީ މީހުން ދިރިއުޅޭ ހިސާބުތަކާއި ދަނޑުބިންތަކުގެ ކައިރިއަށް ގޮސް ކާނާ ހޯދާ އެއްޗެކެވެ. އޭގެ ހަރުފަ ބަންގްލާދޭޝް އިން ހުސްވެފައިވާ ކަމަށް 2002 ވަނަ އަހަރު އިއުލާނުކުރިއެވެ. ނަމަވެސް ވަނީ ވަރަށް ބޮޑަށް އިތުރުވެފައެވެ.