ޢީދު ބަންދު ނިންމާފައި އެންމެން ދަތުރުކުރާއިރު މިއަދާއި މާދަމާ ވެސް ވިއްސާރަކޮށް ކަނޑުތައް ގަދަވާނެ ކަމަށް މޫސުމާ ބެހޭ ގައުމީ އިދާރާ (މެޓް) އޮފީހުން ލަފާކޮށްފިއެވެ.
ޢީދު ޗުއްޓީއަށް ގިނަ ބަޔަކު ވަނީ ރަށްރަށަށް ދަތުރުކޮށްފައެވެ. ބަންދަށް ފަހު އާދިއްތަ ދުވަހު ސްކޫލުތަކާއި އޮފީސްތައް އަލުން ހުޅުވޭއިރު ގިނަ ބަޔަކު އަންނަނީ ދަތުރުކުރަމުންނެވެ.
މެޓު އޮފީހުން މިއަދު ބުނީ، މިއަދާއި މާދަމާ ވެސް ވިއްސާރަކޮށް، ކަނޑުތައް ގަދަވާނެ ކަމަށް ލަފާކުރެވޭ ކަމަށެވެ.
މި ގޮތުން، ރާއްޖޭގެ އުތުރާއި މެދު ރާއްޖެތެރެއަށް ގުގުރުމާ އެކު ވާރޭވެހޭނެ ކަމަށް އެ އޮފީހުން ވަނީ ލަފާކޮށްފައެވެ. އަދި، ހުޅަނގާއި ހުޅަނގު ދެކުނުން ގަޑިއަކު 10 މޭލާއި 20 މޭލާ ދެމެދުގެ ބާރުމިނަށް ވައިގަދަވާނެ ކަމަށް މެޓު އޮފީހުން ލަފާކުރެއެވެ.
ކަނޑުތައް ވެސް އާދައިގެ ވަރަކަށް ގަދަވާނެ ކަމަށް ލަފާކުރާއިރު، ރާޅުގެ އުސްމިނުގައި ހަތަރު ފޫޓާއި ހަ ފޫޓު ހުންނާނެ ކަމަށް ވަނީ ލަފާކޮށްފައެވެ.
މެޓު އޮފީހުން ބުނީ، ދެކުނުގެ އަތޮޅުތަކަށް ގުގުރުމާ އެކު ވާރޭ ވެހޭނެ ކަމަށް ލަފާކުރެވޭ ކަމަށެވެ. އަދި، ހުޅަނގާއި ހުޅަނގު ދެކުނުން ގަޑިއަކު 15 މޭލުގެ ބާރު މިނަށް ވައިގަދަވާނެ ކަމަށް ވަނީ ލަފާކޮށްފައެވެ.
ދެކުނުގެ އަތޮޅުތަކަށް ވެސް އާދައިގެ ވަރަކަށް ކަނޑުތައް ގަދަވާނެ ކަމަށް ލަފާކުރާއިރު ރާޅުގެ އުސްމިން ހުންނާނެ ކަމަށް ލަފާކޮށްފައިވަނީ ދެ ފޫޓާއި ހަތަރު ފޫޓާ ދެމެދުގައެވެ.
ޢީދު ބަންދުގެ ގޮތުގައި ހަފުތާ ބަންދާ އެކު ނުވަ ދުވަސް ލިބުމުން ގިނަ ބަޔަކު ވަނީ ރަށްރަށަށާއި ރާއްޖެއިން ބޭރަށް ވެސް ދަތުރުކޮށްފައެވެ.