އެމެރިކާގެ ފްލޮރިޑާގައި މަދިރީގެ އާބާދީ ކޮންޓްރޯލް ކުރުމުގެ ގޮތުން ފްލޮރިޑާގެ ބްރޯވާޑް ކައުންޓީން މަދިރި އުފެދޭ ސަރަހައްދުތަކަށް ސްޕްރޭ ކުރުމަށް ޑްރޯން ބޭނުންކުރަން ފަށައިފައެވެ.
ތޮއްޖެހިފައިވާ ފްލޮރިޑާގެ ގިނަ ސަރަހައްދުތަކަކީ މަދިރީގެ އުނދަގުލާހެދި ރައްޔިތުންގެ ޝަކުވާ ބޮޑުވެފައިވާ ސްޓޭޓެކެވެ.
ފްލޮރިޑާގެ އޮފިޝަލުން މީގެކުރިންވަނީ އެކަމަށް ޚާއްސަ ޓީމުތަކެއް މެދުވެރިކޮށް، މަދިރި މަރާ ސްޕްރޭ ޖަހަން މަސައްކަތްކޮށްފައެވެ. އެކަމަކު އެއީ އެންމެ ސަރަހައްދެއް ކަވަރުކުރަން ވެސް އެތައް ދުވަހެއް ނަގާފާނެ އުނދަގޫ މަސައްކަތެއް ކަމަށް އޮފިޝަލުން ފާހަގަކުރެއެވެ.
އެހެންވެ، މިހާރު ޑްރޯންގެ އެހީގައި ސްޕްރޭކުރުމުގެ މަސައްކަތް ކުރިއަށް ގެންދަން ނިންމީ މަސައްކަތްތެރިން ވެސް ނުރައްކަލުން ރައްކާތެރިކޮށް، އަވަސްކޮށް އެކަން ކުރުމުގެ މަޤްޞަދުގައެވެ.
މަދިރި ނައްތާލުމަށް ފްލޮރިޑާގައި ކެމްޕޭނެއްހިންގާ މިއީ ފުރަތަމަ ފަހަރެއް ނޫނެވެ. ފްލޮރިޑާއިން 2013 ވަނަ އަހަރު ވަނީ މަދިރި އުފެދޭ ޒާތުގެ ފެންގަނޑުތައް ހޯދުމަށް ޑްރޯން ބޭނުންކުރުމުގެ މަސައްކަތް ޓެސްޓުކޮށްފައެވެ.
އެމެރިކާގެ ކެލިފޯނިއާގެ ބައެއް ކައުންޓީތަކުން ވެސް ވަނީ މަދިރީގެ އާބާދީ ކޮންޓްރޯލް ކުރަން ޑްރޯން ބޭނުންކުރަން ފަށައިފައެވެ.
ފްލޮރިޑާއިން އުއްމީދު ކުރަނީ މި މަސައްކަތުން، މަދިރިއާއި މަދިރިން ފެތުރޭ ބަލިތަކުން މީހުން ރައްކާތެރިކުރެވޭނެ ކަމަށެވެ.