ތަކުރާރުކޮށް މަންމައަށް އަނިޔާކުރި މީހަކަށް ކުށް ސާބިތުވުމުން އަށް މަހާއި 12 ދުވަހަށް ޖަލަށްލާން ކްރިމިނަލް ކޯޓުން އިއްޔެ ހުކުމްކޮށްފިއެވެ.
މަންމައަށް އަނިޔާކޮށްގެން އަނިޔާއެއް ދިނުމުގެ ކުށުގެ ދައުވާ ދައުލަތުން އުފުލީ ކ. މާލެ، ހ. ގާޑަންބިއުޓީ، އިބްރާހިމް އިކްރާމާ ދެކޮޅަށެވެ.
އޭނާގެ މައްޗަށް ދައުވާކުރީ ފެބްރުއަރީ 24، 2023 ވަނަ ދުވަހު 14:00 އެހާއިރު، އޭނާގެ މަންމަ އޭނާ ނިދާ ކޮޓަރީގައި އޮއްވާ މަރުގެ ބިރުދައްކައިގެން ދެ އަތުގައި ޖަހައި އަނިޔާކޮށްފައިވާތީއެވެ. އަދި، އެ ދުވަހުގެ އިތުރުން ފަސް ދުވަހު އިކްރާމް އޭނާގެ މަންމައަށް ތަކުރާރުކޮށް އެކި ގޮތްގޮތަށް އަނިޔާކޮށްފައިވާ ކަމަށް ދައުވާގައިވަނީ ބުނެފައެވެ.
އޭގެ ފަހުން ޖޫން 19، 2023 ގައި އޭނާ ވަނީ މަންމަގެ އަތުގައި ފައިން ޖަހާ އަނިޔާކޮށްފައެވެ. އޭގެ ފަހުން އެ މަހު 23 ގައި ވެސް މަންމައަށް 500 އެމްއެލްގެ ފެން ފުޅިއަކުން ވެސް ހަމަލާދީފައިވެއެވެ.
މީގެ އިތުރުން، އޭގެ ފަހުން އެ އަހަރުގެ ޖުލައި މަހުގެ ހަތަރުވަނަ ދުވަހު ވެސް ދެ ފޫޓު ހުންނަވަރުގެ ހޮޅިބުރިއަކުން މަންމައަށް އިކްރާމް ހަމަލާދީ، އަނިޔާކޮށްފައިވާ ކަމަށް ދައުވާގައި ބުނެފައިވެއެވެ.
އޭނާ ވަނީ ތަކުރާރުކޮށް މަންމައަށް އެފަދައިން އަނިޔާކުރި ކަމަށް އަދި އުފުލާފައިވާ ކުށުގެ ދައުވާއަށް އިއުތިރާފުވެފައެވެ.
އެހެންވެ، އިކްރާމްގެ އިއުތިރާފުން އޭނާގެ މައްޗަށް ކުށް ސާބިތުވާ ކަމަށް ކަނޑައަޅައި އިއްޔެ ކްރިމިނަލް ކޯޓުންވަނީ އަށް މަހާއި 12 ދުވަހުގެ ޖަލު ހުކުމެއް އިއްވައިފައެވެ. ގާނޫނުލްއުގޫބާތުގައި އެ ކުށަށް ކަނޑައަޅާފައިވާ އަސާސީ އަދަބަކީ އެއީއެވެ.
ކްރިމިނަލް ކޯޓުގައި މި މައްސަލަ ބެއްލެވީ ގާޒީ އާމިނަތު އަޒްލީފާއެވެ.