އޮކްޓޫބަރު ހަތް ވަނަ ދުވަހު އިސްރާއީލުން ފަލަސްތީނުގެ ޣައްޒާގައި ހަނގުރާމަ ފެށިފަހުން އިނގިރޭސިވިލާތުން އިސްރާއީލަށް ހަތިޔާރު އެތެރެކުރުމަށް 100 އަށްވުރެ ގިނަ ލައިސެންސް ދޫކޮށްފިއެވެ.
ހަނގުރާމަ ފެށިފަހުން ދޫކޮށްފައިވާ ޖުމްލަ 108 ލައިސަންސްގެ ތެރެއިން 37 ލައިސެންސަކީ އަސްކަރީ ލައިސެންސެވެ. އަދި 63 ލައިސެންސަކީ ނޮން އަސްކަރީ ލައިސަންސް ކަމަށާއި އޭގެ ތެރޭގައި އިސްރާއީލް ޑިފެންސް ފޯސަސް (އައިޑީއެފް) އިން ބޭނުން ކުރުމަށް ޓެލެކޮމިއުނިކޭޝަން އިކުއިޕްމަންޓް ލައިސެންސެވެސް ހިމެނޭ ކަމަށް މިޑްލް އީސްޓް މޮނިޓާއިން ރިޕޯޓުކުރެއެވެ.
ހަނގުރާމައިގެ ކުރިން ދޫކޮށްފައިވާ ލައިސެންސް ހިމެނޭ ގޮތަށް އިސްރާއީލަށް ހަތިޔާރު އެތެރެކުރުމަށް މުޅި ޖުމްލަ 345 ލައިސެންސް އިނގިރޭސިވިލާތުން މިހާތަނަށް ދޫކޮށްފައިވެއެވެ.
އިނިގިރޭސިވިލާތުގެ ޑިޕާޓްމަންޓް ފޯ ބިޒްނަސް އެންޑް ޓްރޭޑުން އެ ހިސާބުތައް އާންމުކޮށްފައިވާއިރު، އެ ލައިސެންސްތަކަކީ އިސްތިސްނާ ހާލަތަކުގައި ދޫކޮށްފައިވާ ލައިސެންސްތަކެއް ކަމަށާއި އެއީ ރައްޔިންތުންގެ މަޖިލީހާއި އާންމު މަޖިލީހުގެ މަސްލަހަތު ހިމެނޭ ކަމެއް ކަމަށް ވެސް އެ ޑިޕާޓްމަންޓުން ބުނެއެވެ.
އިސްރާއީލުން ޣައްޒާއަށް ދެމުންގެންދާ އުދުވާނީ ހަމަލާތައް ފެށިފަހުން އެއްވެސް ލައިސެންސެއް ބާތިލުކޮށްފައެއް ނުވެއެވެ.
ހަތިޔާރު ފޯރުކޮށްދިނުމަށް ދެކޮޅަށް ހިންގާ ކެމްޕޭން، ކެމްޕޭން އެގެއިންސްޓް އާމްސް ޓްރޭޑް (ސީއޭއޭޓީ) ގެ މީޑިއާ ކޯޑިނޭޓަރު އެމިލީ އެޕަލް ވަނީ ފޯރުކޮށްދޭ ހަތިޔާރުތަކުގެ ތަފްސީލު ހާމަނުކޮށް ހަމައެކަނި އަދަދުތައް ހާމަކުރާތީ އެކަމަށް ވަރަށް ބޮޑަށް ފާޑުކިޔާފައެވެ.
ޑިސެމްބަރު، އޭޕްރީލް އަދި މެއި މަހު ނިންމި ވަކިވަކި ތިން ނިންމުމެއްގައި އިނގިރޭސިވިލާތުގެ ވަޒީރުން ވަނީ އިސްރާއީލަށް ހަތިޔާރު އެކްސްޕޯޓްކުރުން ހުއްޓާލުމަށް ގޮވާލައި ގޮވާލުންތަކާ ދެކޮޅު ހައްދަވާފައެވެ.
ވަޒީރުން ވިދާޅުވާ ގޮތުގައި ހަތިޔާރު ފޯރުކޮށްދިނުމަށް ނިންމި ނިންމުތަކަކީ ގާނޫނީ ލަފައާ އެއްގޮތަށް ނިންމައިފައިވާ ނިންމުންތަކެއް ކަމަށެވެ.
ބައިނަލްއަގްވާމީ ގިނަ ޖަމާއަތްތަކާއި އިނގިރޭސިވިލާތުގެ ކެމްޕޭން ގްރޫޕްތަކުން ވަނީ ފަލަސްތީނުގެ އެތައް ބަޔަކު މަރުވެފައިވާ ޣައްޒާގައި އިސްރާއީލުން އަސްކަރީ ސާމާނު ބޭނުންކުރުމަކީ ބައިނަލްއަގްވާމީ އިންސާނީ ގާނޫނުތަކާ ހިލާފުވުމުގެ ނުރައްކާ އޮތް ކަމެއް ކަމަށް ބުނެފައެވެ.
އެއީ ހަތިޔާރު އެކްސްޕޯޓް ކުރުމުގެ ލައިސަންސް ސަސްޕެންޑް ކުރުމާ މެދު ގޮތެއް ނިންމުމުގައި އިނގިރޭސިވިލާތުން ކަނޑައަޅާފައިވާ ގާނޫނީ މިންގަނޑުގައި ބެލުމަށް މުހިންމު ކަމެއް ކަމަށް ވެސް ކެމްޕޭން ގްރޫޕްތަކުން ބުނެއެވެ.
އިނގިރޭސިވިލާތުން އިސްރާއީލަށް ހަތިޔާރު ފޯރުކޮށްދިނުމަށް ފާސްކޮށްފައިވާ ލައިސެންސްގެ އަގު 2022 ވަނަ އަހަރު ވަނީ 42 މިލިއަން ޕައުންޑަށް އަރައިފައެވެ.
އިނގިރޭސި ސަރުކާރުން ވަނީ 2008 ވަނަ އަހަރުން ފެށިގެން 570 މިލިއަން ޕައުންޑަށް ވުރެ ގިނަ އަގުހުރި ހަތިޔާރާއި އަސްކަރީ ކޮމްޕޯނެންޓްތައް އިސްރާއީލަށް ވިއްކައިފައެވެ.