މ. ވޭވަށު ސިއްހީ މަރުކަޒުގައި ޑޮކްޓަރެއް ނެތި މަސް ދުވަހަކަށް ވުރެ ގިނަ ދުވަސްވީއިރު ވެސް ކަމާބެހޭ ފަރާތްތަކުން އަޅާ ނުލާތީ އެ ރަށު ރައްޔިތުން ކަންބޮޑުވުން ފާޅުކުރާންފިއެވެ.
މި ކަމާ ގުޅިގެން އެ ރަށު ރައްޔިތުން ސޯޝަލް މީޑިއާގައި ވެސް ދަނީ ނުރުހުން ފާޅުކުރަމުންނެވެ. މިގޮތުން އެ ރަށު ބައެއް ރައްޔިތުން ވަނީ ޑޮކްޓަރެއް ލިބޭނީ ކޮންދުވަހަކުން ކަމާމެދެ ސުވާލުކޮށް ޑޮކްޓަރެއް ނެތުމުން އުފުލަންޖެހޭ ތަކުލީފުތައް ހިއްސާކޮށްފައެވެ.
ވޭވަށުގެ ރައްޔިތެއް "ސަން" އަށް މައުލޫމާތު ދެމުން ބުނީ ސިއްހީ ޚިދުމަތަކީ ގާނޫނު އަސާސީގެ ދަށުން ވެސް ކޮންމެ އިންސާނަކަށް އޮންނަ ޒަރޫރީ އަސާސީ ބޭނުމެއް ކަމަށެވެ. ނަމަވެސް އެ ރަށުގައި ޚިދުމަތް ނުލިބޭތާ ދެތިން މަސް ވަރު ވެދާނެކަމަށެވެ.
"އިހަކަށްދުވަހު ބީރައްޓެހި މަސްދޯންޏެއް މަސްކިރަން އައިސްގެން އުޅެނިކޮށް އެ މީހާގެ އިނގިލި ޗަސްވެގެން ދިޔައިމަ ވެސް ޑޮކްޓަރެއް ނެތޭ ބުނީ،" އޭނާ ބުންޏެވެ.
އޭނާ ބުނީ ސަރުކާރު ދަށުން ހިންގާނަމަ، ޑަކުޓަރަކު ހުންނަން ޖެހޭ ކަމަށެވެ.
އޭނާ ބުނީ ވޭވަށުގެ ސިއްހީ މަރުކަޒުގައި އެއްވެސް ޑޮކްޓަރެއް ނެތް ކަމަށާއި އެއްވެސް ޚިދުމަތެއް ނުލިބޭ ކަމަށެވެ. އަދި ކޮންމެ ކަމަކު ދިޔައަސް އެ ރަށު ސިއްޙީ މަރުކަޒުން ބުނަނީ ޑޮކްޓަރެއް ނެތް ކަމަށެވެ.
އެހެންނަމަވެސް ހޮސްޕިޓަލުގެ މެނޭޖަރާ ސުވާލު ކުރީމަ ބުނީ މިނިސްޓަރީއަށް ދަންނަވާފައިވާ ކަމަށާއި ނަމަވެސް މިނިސްްޓްރީން ބުނީ ޑޮކްޓަރުންގެ ދަތިކަން ހުރުމާއެކު މި ވަގުތު ޑޮކްޓަރަކު ފޮނުވޭކަށް ނެތް ކަމަށެވެ.
"މިހާ ހިސާބުގައި ކަންތައް ހުރީ. އަޅުގަނޑަކީ ބިދޭސީން ގެންގުޅޭ މީހެއް އެ މީހުން ވެސް އެއީ ހަމަ އިންސާނުން. އެއިން ކޮންމެ މީހަކު ބަލިވާއިރަށް އެ މީހުނަކަށް ވެސް ނުދެވޭނެ ފުރައިގެން އެހެން ރަށަކަށެެއް. ކޮބާތޯ ބޭނުމަކީ މިތާ ޑަކުޓަރެއް ނެތި ހޮސްޕިޓަލެއް ބެހެއްޓުމުގެ،" އޭނާ އިތުރަށް ފާހަގަކުރިއެވެ.
އޭނާ އިތުރަށް ބުނީ ސިއްހީ ހިދުމަތް ރަށުން ނުލިބިގެން، ކިރިޔާ ކަމެއް ވާއިރަށް ލޯންޗަށް ބޮޑު އަގު ދީފައި ދަނީ ކައިރިއޮތް މުލަކަށް ނުވަތަ މުއްޔަށް ކަމަށެވެ.
"ކިތަންމެ ކުޑަ ކަަމެއްވިޔަސް މި ޖެހެނީ ފުރައިގެން ދާން. މިއީ ކިހާބޮޑު ތަކުލީފެއްކަން އިނގޭނީ އެކަން ތަހައްމަލު ކުރާ ބަޔަކަށް." މިކަމާ ގުޅިގެން ނުރުހުން ފާޅުކޮށް، އެ ރަށު މީހަކު ސޯޝަލް މީޑިއާގައި ހިއްސާ ކުރި ކޮމެންޓެއްގައިވެއެވެ.
ވޭވަށުން މައުލޫމާތު ދިން މީހާ ބުނީ އާންމުން ތިބީ މިކަމާ ވަރަށް ކަންބޮޑުވެފައި ކަމަށާއި އެތަނަށް އެއްވެ ތަޅުލާ ހިސާބުގައި ކަމަށެވެ.
އެރަށުގެ ރައްޔިތުން އެދެނީ ވީހާ ވެސް އަވަހަކަށް ރަށު ސިއްހީ މަރުކަޒަށް ޑޮކްޓަރެއް ގެނެސް އެކަށީގެންވާ ސިއްހީ ޚިދުމަތް ލިބުމަށެވެ.
މިކަމާ ގުޅިގެން މައުލޫމާތު ސާފުކުރުމަށް އެރަށު ކައުންސިލަށް ގުޅުމުން ބުނީ ކައުންސިލުންނާއި ހެލްތު ސެންޓަރު މެނޭޖްމެންޓާއި ގުޅިގެން މަސައްކަތްކުރަނީ ވީހާ ވެސް އަވަހަކަށް ޑޮކްޓަރެއް ގެނެވޭނެ އިންތިޒާމެއް ހަމަޖައްސައިދިނުމަށް ކަމަށެވެ.
ނަމަވެސް ކައުންސިލުން ބުނީ، ޑޮކުޓަރެއް ހޯދުމުގައި ދަތިތަކެއް ހުރިކަމަށް މިނިސްޓަރީން ކައުންސިލަށް އަންގާފައިވާ ކަމަށެވެ.