ބޮލީވުޑްގެ އެކްޓަރު ޖޯން އަބްރަހަމް ލީޑް ރޯލް ކުޅޭ އެކްޝަން ތުރިލާ ފިލްމު "ވެދާ" ކުރިޔަށް އޮތް ޖުލައި މަހު ރިލީޒް ކުރުމަށް ނިންމާފައި އޮތުމަށްފަހު ޖުލައި މަހުގެ ބަދަލުގައި ފިލްމު ރިލީޒްކުރުން އޮގަސްޓު މަހަށް ފަސްކޮށްފިއެވެ.
ވަރަށް ގިނަ ބަޔަކު އިންތިޒާރުކުރާ މި ފިލްމަކީ މިދިޔަ އަހަރު ރިލީޒްކުރި ޖޯންގެ ފިލްމު "ޕަތާން"އަށް ފަހު އެކްޓަރު ލީޑް ރޯލްއިން ބެލުންތެރިންނަށް ފެންނާނެ ދެވަނަ ފިލްމެވެ. މި ފިލްމުގެ ކުރިން ޖޯންގެ އިތުރު އެކްޝަން ތުރިލާ ފިލްމެއް ކަމަށްވާ "ތެހެރާން" ޖުލައި މަހުގެ 19ގައި ސިނަމާތަކަށް ގެންނަން ވަނީ ތާވަލުކޮށްފައެވެ.
ފިލްމު 'ވެދާ'ގެ ޕޯސްޓަރެއް--ފޮޓޯ/ޕިންކްވިލާ
ނިކިލް އަދުވާނީ ޑައިރެކްޓް ކުރާ "ވެދާ" އޮގަސްޓު މަހުގެ 19ގައި ރިލީޒްކުރުމަށް ތާވަލުކުރިއިރު އޮގަސްޓް މަހު ވަރަށް ވަރުގަދަ ދެ ފިލްމެއް ސިނަމާތަކަށް ގެންނަން މާކުރިން ވަނީ ނިންމާފައެވެ.
އެއީ އަޖޭ ދޭވްގަންގެ ފިލްމު "ސިންގްހަމް ރިޓާންސް" އަދި އައްލޫ އަރުޖުންގެ ފިލްމު "ޕުޝްޕާ2"އެވެ. މި ދެ ފިލްމަކީ ވެސް މީގެކުރިން ބޮކްސް އޮފީހުގައި ބޮޑު ކާމިޔާބީއެއް ހޯދާފައިވާ ފްރެންޗައިސްތައް ކަމަށް ވުމުން ޖޯންގެ ފިލްމު "ވެދާ"އަށް ބޮކްސް އޮފީހުގައި ވަރަށް ބޮޑު ވާދަވެރިކަމަކާ ކުރިމަތިލާންޖެހޭނެ ކަމަށް ގިނަ ބަޔަކު ވަނީ ބުނެފައެވެ.
ޖޯންގެ އިތުރުން ފިލްމު "ވެދާ"އިން ފެންނާނެ މުހިއްމު ތަރިންގެ ތެރޭ ޒުވާން ބަތަލާ ޝަރްވާނީ، ސައުތު ބަތަލާ ތަމަންނާ ބާޓިއާ އަދި އަބީޝެކް ބެނަޖީ ހިމެނެއެވެ. އިންޑިއާގެ މިނިވަން ދުވަހާ ގުޅުވައިގެން ސިނަމާތަކަށް ގެންނަން ނިންމާފައިވާ މި ފިލްމުގައި ޖޯން ފެންނާނީ އިންސާފު ހޯދުމަށް ހިތްވަރާ އެކު މަސައްކަތް ކުރާ އަންހެނަކަށް ފަސްޖެހުމަކާ ނުލައި އެހީތެރިވާ ޖެހިލުން ކުޑަ މީހެއްގެ ގޮތުގައެވެ.