ރަށްދެބައި މަގުގެ ޕޭމެންޓަށާއި މަގުމައްޗަށް ވާގޮތަށް ގިނަ އަދަދެއްގެ ކުނި އަޅާފައި ހުރުމުން އެކަން ކުރި ބަޔަކު މާލެ ސިޓީ ކައުންސިލުން މިއަދު ހޯދަން ފަށައިފިއެވެ.
އާންމުންގެ މީހަކު އެކްސްގައި ކުރި ޕޯސްޓެއްގައިވަނީ އެ މަގުގައި ކުނި އަޅާފައި ހުރި ވީޑިއޯއެއް އާންމުކޮށް މާލޭ ސިޓީ ކައުންސިލުގެ ސަމާލުކަމަށް އެކަން ގެނެސްފައެވެ. އެ ވީޑިއޯއިން ގިނަ އަދަދެއްގެ ކުނި މަގުމައްޗަށާއި ޕޭމަންޓަށް އަޅާފައި ހުރި މަންޒަރު ފެނެއެވެ.
އެ ޕޯސްޓަށް ޖަވާބުދެއްވަމުން މާލޭ ސިޓީ ކައުންސިލުގެ މޭޔަރު އާދަމް އާޒިމް ވިދާޅުވީ، އެކަން ކުރި ބަޔަކު ހޯދަން މާލޭ ސިޓީ ކައުންސިލުން މިހާރު މަސައްކަތް ކުރަމުން އަންނަ ކަމަށެވެ. އޭނާ ވިދާޅުވީ ރީތި، ފެހި، އަމާން އަދި ސާފު މާލެ ސިޓީއަކަށް މާލެ ހެދުމަށް ވެމްކޯއާއި މާލެ ސިޓީ ކައުންސިލުން ކުރާ މަސައްކަތް ފޫހިކަމެއް ނެތި ގަދަ ހިތްވަރާ އެކު ކުރިއަށް ގެންދާނެ ކަމަށެވެ.
މާލެ ސިޓީ ކައުންސިލުން އަންނަނީ ގަވާއިދާ ޚިލާފަށް މިގޮތަށް މަގުމައްޗަށް ކުނިއަޅާ މީހުން 500 ރުފިޔާއިން ޖޫރިމަނާ ކުރަމުންނެވެ.
އެގޮތުން، މާލެ ސިޓީ ކައުންސިލްގެ މީޑިއާ އޮފިޝަލް އާމިނަތު ޝަތުފާ މީގެ ކުރިން ވިދާޅުވީ މަގުތަކުގައި ކުނި ބަހައްޓައިގެން 180 އަށްވުރެ ގިނަ މީހުން ޖޫރިމަނާކޮށްފައިވާ ކަމަށެވެ. އޭގެ ތެރެއިން، 80 އިންސައްތަ މީހުންނަކީ ބިދޭސީންކަން އޭނާ ފާހަގަކުރެއްވިއެވެ.
ފާހަގަކޮށްލެވޭ ގޮތުގައި ނުގަވާއިދުން މާލޭގެ މަގުތަކުގައި ކުނި ބަހައްޓާ މައްސަލައިގައި ބިދޭސީއަކު ޑީޕޯޓުކޮށްލަން ވެސް މީގެ ކުރިން ނިންމިއެވެ.
މާލޭގެ މޭޔަރު އާދަމް އާޒިމް ވަނީ މާލޭގައި އާންމުކޮށް ކުނި އަޅާފައި ހުންނަކަން ފާހަގަކުރެވޭ ތަންތަން ވެސް އާންމުކޮށްފައެވެ.
އެގޮތަށް މަގުތަކުގައި ކުނި ބަހައްޓާ މީހުންގެ ފޮޓޯ އަދި ވީޑިއޯ މާލެ ސިޓީ ކައުންސިލުގެ ވައިބާ އަދި ވަޓްސްއެޕް ނަންބަރު ކަމަށްވާ 9341144 އަށް ނުވަތަ ކައުންސިލްގެ ވެބްސައިޓު މެދުވެރިކޮށް ފޮނުވަން އާޒިމް ވަނީ އެދިވަޑައިގެންފައެވެ.
ސިޓީ ކައުންސިލުން ވަނީ މަގުމައްޗަށް ކުނި ނޭޅުމަށާއި، ދިރިއުޅޭ ގެދޮރާއި ތިމާވެށި ސާފުކޮށް ބޭއްވުމަށް އިލްތިމާސްކޮށްފައެވެ.