ދޫނި ރޯގާގެ އެޗް5އެން2 ސްޓްރެއިން ޖެހުނު މީހަކު މެކްސިކޯއިން މަރުވެއްޖެ ކަމަށް ދުނިޔޭގެ ސިއްހީ ޖަމުއިއްޔާ (ޑަބްލިޔުއެޗްއޯ) އިން ބުނެފިއެވެ.
ޑަބްލިޔުއެޗްއޯއިން ބުނީ މިއީ އެ ސްޓްރެއިން އިންސާނެއްގެ ފަރާތުން ފެނި، ބަލީގައި މީހާ މަރުވި ފުރަތަމަ ކޭސް ކަމަށެވެ.
އެ ޖަމިއްޔާއިން ނެރުނު ބަޔާނެއްގައި ބުނީ، ޖެކްސަން ކިޔާ އުމުރުން 59 އަހަރުގެ އެމީހާއަކީ ކުރިންވެސް ސިއްހީ މައްސަލަތަކެއް ހުންނަ މީހެއް ކަމަށާއި ދޫނި ރޯގާ ޖެހިގެން ޖެކްސަން އޮތީ މެކްސިކޯ ސިޓީގެ ހޮސްޕިޓަލުގައި އެޑްމިޓްކޮށްފައި ކަމަށެވެ. އަދި އޭނާ މަރުވީ ހުން އައިސް ނޭވާ ކުރުވެ، ބޭރަށް ހިންގައި، މޭނުބައިކުރާތީ އުޅުމަށްފަހު، އޭޕްރިލް މަހުގެ 24 ވަނަ ދުވަހު ކަމަށް ޑަބްލިއުއެޗްއޯއިން ބުނެއެވެ.
މެކްސިކޯގެ ސިއްހީ ވުޒާރާއިން ބުނީ ޖެކްސަން އަކީ ކިޑްނީ ބައްޔާއި ހަކުރު ބައްޔާއި ލޭ މައްޗަށް ދިއުމުގެ މައްސަލަ ވެސް ހުރި މީހެއް ކަމަށެވެ.
ދޫނި ރޯގާގެ މި ސްޓްރެއިން އާންމުންގެ ތެރޭގައި ފެތުރުމުގެ ބިރެތް ނެތް ކަމަށާއި ޖެކްސަންއާ ދިމާވި އެންމެން ޓެސްޓްކުރިއިރު އެންމެން ވެސް ބައްޔަށް ނެގެޓިވް ކަމަށް އެ ވުޒާއިން އިތުރަށް ބުންޏެވެ.
ޑަބްލިޔުއެޗްއޯއިން ބުނީ ޖެކްސަންއަށް ދޫނި ރޯގާ ޖެހުނު ގޮތެއް އެނގެން ނެތް ކަމަށާއި ނަމަވެސް، މެކްސިކޯގެ ޕޯލްޓްރީ ފާމްތަކުން ދޫނި ރޯގާގެ ކޭސްތައް ކުރިންވެސް ފެނިފައިވާކަމަށެވެ.
ސައިންސްވެރިން ބުނީ އެ ކޭސްއަކީ އެމެރިކާގައި ފެތުރެމުންދާ އެޗް5އެން1 ދޫނި ރޯގާއާއި ގުޅުން ހުރި ކޭސްއެއް ނޫން ކަމަށެވެ. އެމެރިކާގައި ފެތުރެމުންދާ އެ ވައިރަސް މިހާތަނަށް ތިން މީހަކަށް ވަނީ ޖެހިފައެވެ.
ދޫނި ރޯގާ ގިނައިން ޖެހިފައިވަނީ ސީލް، ރެކޫން، ސާރިދޯޅަ ފަދަ ޖަނަވާރުތަކަށް ކަމަށާއި އާންމުގޮތެއްގައި އެ ބަލި ޖެހެނީ ބަލިޖެހިފައިވާ ޖަނަވާރެއްގެ ޒަރިއްޔާއިން ކަމަށްވެސް ސައިންސްވެރިން ބުނެއެވެ.