ވިހިވަނަ ރައްޔިތުންގެ މަޖިލީހުގައި ދާއިމީ ކޮމިޓީތައް އެކުލަވައިލި ގޮތާ މެދު ރުހޭ ކަމަށާއި ނަމަވެސް ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ)އިން ދެވަނަ ޖާގައެއް ނުދިން ކަމަށް މަޖިލީހުގެ މައިނޯރިޓީ ޕާޓީ އެމްޑީޕީން މިއަދު ބުނެފިއެވެ.
އާ މަޖިލީހުގައި ދާއިމީ 18 ކޮމިޓީއެއް ހިމެނެއެވެ.
މިއަދު ބޭއްވި މަޖިލީހުގެ ޖަލްސާގައި އެ 18 ކޮމިޓީގައި ތިއްބަވާނެ މެންބަރުން ކަނޑައަޅާފައިވާ ހުށަހެޅުން ފާސްވީ 88 މެންބަރުންގެ ވޯޓުންނެވެ.
އެމްޑީޕީގެ ޕާލިމެންޓްރީ ގްރޫޕުން މިއަދު ބޭއްވި ނޫސްވެރިންގެ ބައްދަލުމުގައި ޕީޖީ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ، ކޮމިޓީތަކުން އެ ޕާޓީއަށް ޖާގަ ދީފައިވަނީ ޕަސެންޓޭޖް ނިސްބަތުން ބަލާފައި ކޮމިޓީތަކަށް ވާވަރަށް ކަމަށެވެ.
އެގޮތުން މަޖިލީހުގެ ދާއިމީ ކޮންމެ ކޮމިޓީއަކުން އެމްޑީޕީއަށް ވަނީ ޖާގައެއް ލިބިފައެވެ. އަދި ބައެއް ދާއިމީ ކޮމިޓީތަކުން ދެވަނަ ޖާގައެއް ވެސް ލިބިފައިވެއެވެ.
ނަމަވެސް އެ ކޮމިޓީތަކުން އެމްޑީޕީއަށް ދެވަނަ ޖާގައެއް ދިން އިރު، ބައެއް މުހިންމު ކޮމިޓީތަކަށް އެއް ސްލޮޓަށް ވުރެ ގިނަ ސްލޮޓް ލިބޭނެ ކަމަށް ގަބޫލުކުރެވުނު ނަމަވެސް ނުލިބުނު ކަމަށް ނާޒިލް ވިދާޅުވިއެވެ.
"241 ކޮމިޓީގަ އަޅުގަނޑުމެންނަށް އެއް ޖާގަ ލިބިފަ އޮތީ. އޭގެ އިތުރުން މާލިއްޔަތު ކޮމިޓީގައި ވެސް އެންމެ ޖާގައެއް. މިފަދަ މުހިންމު ކޮމިޓީތަކުން އެއް ޖާގަ ލިބިފައި އޮތުމުން އަޅުގަނޑުމެން ބޭނުންވީ ދެވަނަ ޖާގައަކަށް ރިކުއެސްޓު ކުރުމަށް. އެގޮތުން އަޅުގަނޑުމެން ކުރި ރިކުއެސްޓަށް އެބޭފުޅުން ބުނީ ނޫނެކޭ. ނުވާނެކަމަށް އެއްގޮތަކަށް ވެސް،" ނާޒިލް ވިދާޅުވިއެވެ.
މަޖިލީހުގެ މައިނޯރިޓީ ޕާޓީ އެމްޑީޕީގެ ޕާލިމެންޓްރީ ގްރޫޕުން ބޭއްވި ނޫސްވެރިންގެ ބައްދަލުވުން: އެ ޕާޓީން ބުނީ 241 ކޮމިޓީން 2 ވަނަ ޖާގައެއް ނުދިން ނަމަވެސް ކޮމިޓީތައް އެކުލެވުނު ގޮތާމެދު ރުހޭކަމަށް -- ފޮޓޯ/ މަޖިލިސް
ނާޒިލް ވިދާޅުވީ އެމްޑީޕީން ބޭނުންވީ ދާއިމީ ކޮމިޓީތަކުން ދެވަނަ ޖާގައެއް ލިބޭ ކޮމިޓީތައް ގުރުއަތު ނަގަން ކަމަށެވެ.
"އެބޭފުޅުން ބޭނުންވާ ކޮމިޓީއަކުން ދެވަނަ ޖާގަ ދިނުމުގެ ބަދަލުގައި ގުރުއަތުން ޖާގަ ލިބޭ ކޮމިޓީތަކަކީ އެމްޑީޕީން ރުހޭނެ ކޮމިޓީތަކެއް. އޭރުން 241 ކޮމިޓީ ވިޔަސް މާލިއްޔަތު ކޮމިޓީން ވެސް ޖާގަ ލިބުމުގެ ފުރުސަތު ލިބޭނެތީ،" ނާޒިލް ވިދާޅުވިއެވެ.
ކަން މިހެން ހުރި ނަމަވެސް މިއަދު މަޖިލިސް ތަޅުމުން މަޖިލީހުގެ ދާއިމީ 18 ކޮމިޓީގައި މެންބަރުން ތިއްބަވާނެ ގޮތް ފާސްކުރި ގޮތާމެދު އެމްޑީޕީގެ ރުހުން އެބައޮތް ކަމަށް އެ ޕާޓީން ބުންޏެވެ.
މި މަޖިލީހުގައި ސުޕަ މެޖޯރިތީ އޮތީ ޕީއެންސީއަށް ވުމުން، ހުރިހާ ކޮމިޓީތަކުގައި ވެސް ފުރިހަމަ މެޖޯރިޓީއެއް އޮތީ އެ ޕާޓީއަށެވެ.
އެމްޑީޕީއަށް އެއް ޖާގައަށް ވުރެ ގިނަ ޖާގަ ލިބުނު ކޮމިޓީތައް:
- މާލިއްޔަތު ކޮމިޓީ - ދެ ޖާގަ
- އިގްތިސާދީ ކޮމިޓީ - ތިން ޖާގަ
- ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީ - ދެ ޖާގަ
- ޚާރިޖީ ގުޅުންތަކުގެ ކޮމިޓީ - ދެ ޖާގަ
- ޖުޑިޝަރީ ކޮމިޓީ - ދެ ޖާގަ
- ސްޓޭޓް އޯންޑް އެންޓަޕްރައިސަސް ކޮމިޓީ - ދެ ޖާގަ
މި ފެށިގެން ދިޔަ 20 ވަނަ މަޖިލީހުގައި 93 މެންބަރުން ތިބިއިރު މަޖިލީހުގެ ސުޕަމެޖޯރިޓީ ލިބިފައިވަނީ ސަރުކާރު ހިންގާ މައި ޕާޓީ ޕީއެންސީއަށެވެ. އެ ޕާޓީގައި އެކަނި ވެސް 75 މެންބަރުން އެބަތިއްބެވެ.
އެމްޑީޕީއަށް މި ފަހަރުގެ މަޖިލީހުން ކާމިޔާބުކުރެވުނީ އެންމެ 12 ގޮނޑިއެވެ. މިއީ މަޖިލީހުގެ ހަޔާތުގައި އެމްޑީޕީއަށް އެންމެ މަދުން ގޮނޑި ކާމިޔާބުކުރެވުނު ފަހަރުވެސްމެއެވެ.