އެމްޓީސީސީގެ ޚާއްޞަ އާންމު ޖަލްސާއެއް މި މަހު 11 ވަނަ ދުވަހު ބޭއްވުމަށް ނިންމާފައިވާ ކަމަށް އެ ކުންފުނިން މިއަދު ބުނެފިއެވެ.
އެމްޓީސީސީން ނެރުނު ބަޔާނެއްގައި ބުނީ، ޖަލްސާ ބާއްވާނީ މި މަހުގެ 11 ވާ އަންގާރަ ދުވަހުގެ ހަވީރު 16:00ގައި މޯލްޑިވްސް ސެކިއުރިޓީ ޑިޕޮސިޓަރީގެ ވެބް އެޕްލިކޭޝަން ފަހިވޯޓް މެދުވެރިކޮށް އޮންލައިކޮށް ކަމަށެވެ.
މި ޖަލްސާގައި ބައިވެރިވެވޭނީ ނިމިދިޔަ މަހުގެ 23ގެ ނިޔަލަށް އެ ކުންފުނީގެ ހިއްސާދާރުންގެ ގޮތުގައި ރަޖިސްޓްރީކޮށްފައިވާ ފަރާތްތަކަށް ކަމަށް އެ ބަޔާނުގައިވެއެވެ. އެގޮތުން، ބައިވެރިވާން ބޭނުންވާ ހިއްސާދާރުންނަށް އިންފިނިޓީ ޕޯޓަލް އަދި ކުންފުނީގެ ޝެއާހޯލްޑަރުންގެ އޮންލައިން ޕޯޓަލް މެދުވެރިކޮށް ރަޖިސްޓްރީ ކުރެވޭނެއެވެ.
އެމްޓީސީސީން ބުނީ، މި ޖަލްސާގައި އެ ކުންފުނީގެ އަސާސީ އަދި ގަވާއިދަށް ހުށަހަޅާފައިވާ އިސްލާހުތައް ފާސްކުރަން ހުށަހެޅުމަށް ކުންފުނީގެ ޑިރެކްޓަރުންގެ ބޯޑުން ނިންމާފައިވާ ކަމަށެވެ.
މިދިޔަ އަހަރު ބޭއްވި 2022 ވަނަ އަހަރުގެ އާންމު ޖަލްސާގައި ހިއްސާގެ ފައިދާއަށް ހަތަރު ރުފިޔާ ބެހުމަށް ޑިރެކްޓަރުންގެ ބޯޑުން ފާސްކޮށް އެ އަހަރުގެ އާންމު ޖަލްސާއަށް ހުށަހެޅުމުން، ހިއްސާދާރުންގެ ބޯޑުން އެ އައިޓަމް ފާސްނުވާ ކަމަށް ކަނޑައަޅާފައިވާ ކަމަށް އެ ބަޔާނުގައި ބުނެފައިވެއެވެ.
އެހެންވެ، 2022 ވަނަ އަހަރުގެ ހިއްސާގެ ފައިދާއާ ގުޅޭ ގޮތުން މަޝްވަރާކޮށް، ޑިރެކްޓަރުން ބޯޑުގެ ނިންމެވުމުގެ މަތިން މި އަހަރު ބާއްވާ ޚާއްޞަ އާންމު ޖަލްސާއަށް އެ އަހަރުގެ އައިޓަމް ހުށަހެޅުމަށް ކުންފުނީގެ މިހާރު މެނޭޖްމަންޓުން ނިންމާފައިވާ ކަމަށް އެމްޓީސީސީން ބުނެއެވެ.