ކްރިމިނަލް ކޯޓުގެ އިމާރާތަށް ފެން ފައިބާ، އެ އިމާރާތުގެ ކަރަންޓުގެ ނިޒާމަށް ފެނުގެ އަސަރުކޮށް، ކޯޓު ރޫމުގެ ހާލަތު ގޯސްވުމުގެ ސަބަބުން މާދަމާއިން ފެށިގެން ސިވިލް ކޯޓުގެ ހުޅުމާލެ ޑިވިޝަންގެ ގޮތުގައި ބޭނުން ކުރަމުން ދިޔަ އިމާރާތުގައި ކްރިމިނަލް ކޯޓުގެ ޝަރީއަތްތައް ކުރިއަށް ގެންދިއުމަށް ހަމަޖައްސައިފިއެވެ.
މިދިޔަ އަހަރުގެ ފެބުރުވަރީ މަހުގެ 22 ވަނަ ދުވަހު ޖުޑިޝަލް ސާވިސް ކޮމިޝަން (ޖޭއެސްސީ)އިން އެ ކޯޓުގެ އިމާރާތުން ފެން ފައިބާތީ ކޯޓު އިމާރާތުގެ ބައެއް ބޭނުން ނުކުރަން ވަނީ އަންގައިފައެވެ.
އޭގެ ފަހުން ކޯޓުގެ އިމާރާތަށް ފެން ފައިބާ ކަރަންޓު ނިޒާމަށް ފެނުގެ އަސަރުކުރުމުގެ ސަބަބުން، ކޯޓުގެ ޝަރީއަތްތައް ކުރިއަށް ގެންގޮސްފައިވަނީ ޝަރީއަތްކުރާ އެންމެ މާލަމެއްގައި ކަމަށް ކްރިމިނަލް ކޯޓުން ބުންޏެވެ.
ކްރިމިނަލް ކޯޓުން އެކްސްގައި ކުރި ޕޯސްޓެއްގައި ބުނީ، އެ އިމާރާތުގައި ހުރި ޝަރީއަތްކުރާ ތިން މާލަމުގައި، ކްރިމިނަލް ކޯޓުގެ B2, B3, B5, B8, B10 އަދި B11 މި ހަ ސެކްޝަންގެ އަޑުއެހުންތައް ބޭއްވޭނެ އިންތިޒާމުތައް މިހާރު ހަމަޖެހިފައިވާ ކަމަށެވެ.
އެގޮތުން މާދަމާއިން ފެށިގެން، ސިވިލް ކޯޓުގެ ހުޅުމާލެ ޑިވިޝަންގެ ގޮތުގައި ބޭނުން ކުރަމުން ދިޔަ އިމާރާތުގައި، ކްރިމިނަލް ކޯޓުގެ ޝަރީޢަތްތައް ކުރިއަށް ގެންދިއުމަށް ހަމަޖެހިފައިވާ ކަމަށް އެ ކޯޓުން ބުންޏެވެ.
"ވަގުތީ ގޮތުން މި ގެނެވުނު ބަދަލާއި ގުޅިގެން ކޯޓުގެ ބައެއް ސެކްޝަންތައް ހުޅުމާލެ ބަދަލުކުރުމުން، މާލޭގައި ހުރި ކޯޓުގެ އިމާރާތުން ޝަރީޢަތްކުރާ ތިން މާލަން ހުސްކުރެވިފައިވޭ. އެހެންކަމުން، މި ވަގުތު ހުޅުމާލެ މާލަންތަކާއެކު ޖުމްލަ ހަ މާލަން ޝަރީއަތްކުރުމަށް ލިބިފައިވޭ،" ކްރިމިނަލް ކޯޓުން ބުންޏެވެ.
ބާވުމުގެ ސަބަބުން ކްރިމިނަލް ކޯޓުގެ އެތެރޭގައި ހުރި ތަނބެއްގެ ބައެއް ވެއްޓިފައި -- ފޮޓޯ/ ފަނޑިޔާރުންގެ ވައިބާ ގުރޫޕް
އެ ކޯޓުން ބުނީ، ޝަރީއަތްކުރުމަށް މިހާރު ލިބިފައިވާ ހަ މާލަން، 11 ގާޒީންގެ މެދުގައި އެކި ދުވަސްތަކަށް ބަހާލައިގެން ޝަރީއަތްތައް ކުރިއަށް ގެންދިއުމަށް ހަމަޖެހިފައިވާ ކަމަށެވެ.
އެގޮތުން ދުވަސްވީ މައްސަލަތަކާއި ޝަރީއަތް ނިމެންދެން ބަންދުގައި ތިބި މީހުންގެ މައްސަލަތަކުގެ ޝަރީއަތްތައް ކުރިއަށް ގެންދިއުމަށް އިސްކަންދޭން ނިންމާފައިވާ ކަމަށް ވެސް އެ ކޯޓުން ބުންޏެވެ.
"މި އިންތިޒާމުތައް ހަމަޖެއްސުމަށް މަސައްކަތްކޮށްދެއްވި ހުރިހާ ފަރާތްތަކަށް ޝުކުރު އަދާކުރަން،" ކްރިމިނަލް ކޯޓުން ބުންޏެވެ.
ކްރިމިނަލް ކޯޓުން ބުނީ ވޭތުވެ ދިޔަ ދޮޅު އަހަރެއްހައި ދުވަސްތެރޭ ކޯޓުގެ އެންމެ މާލަމެއްގައި ޝަރީއަތްތައް ކުރިއަށް ގެންދެވުނު ނަމަވެސް، އެ މުއްދަތުގެ ތެރޭގައި 2،934 މީހުންގެ ބަންދާމެދު ގޮތެއް ނިންމައި، 2،193 ތަފާތު އެކި ކޯޓު އަމުރުތައް ދޫކޮށްފައިވާ ކަމަށެވެ. އަދި 520 ޤަޟިއްޔާ ކޯޓުން ނިންމާފައިވާ ކަމަށް ވެސް އެ ކޯޓުން ބުންޏެވެ.
ކްރިމިނަލް ކޯޓުގެ އިމާރާތް ބާވުމުގެ ސަބަބުން ފެން ފައިބާތީ މީގެ ކުރިން އެކި ޝަރީއަތްތައް ކުރިއަށް ނުގެންދެވި ކެންސަލް ކޮށްފައިވެއެވެ. މީގެ ކުރިން އެ އިމާރާތް ބާވުމުން ތަނބުތައް ވެއްޓުން ފަދަ ހާދިސާތައް ވެސް ހިނގާފައިވެއެވެ.