"ރެމާލް"ގެ ނަމުން ނަން ދީފައިވާ ތޫފާން ބަންގްލަދޭޝްއަށް އަރައިފިއެވެ.
އޭ ހާދިސާއާ ގުޅިގެން އެތައް ސަތޭކް ބަޔަކު މިހާރު ވަނީ ރައްކާތެރި ހިސާބުތަކަށް ގެންގޮސްފައެވެ.
އެ ގައުމުގެ ވެރިރަށް ޑާކާގައި ރޭ ބޭއްވި ނޫސްވެރިންގެ ބައްދަލުވުމެއްގައި ބަންގްލަދޭޝްގެ މޫސުމާ ބެހޭ މާހިރު ޝަމީމް އަހުސަން ވިދާޅުވީ ބަންގްލަދޭޝްގެ ދެކުނު ޑިސްޓްރިކްޓް ކެޕުޕާރާގެ އައްސޭރިފަށުން ތޫފާން ހުރަސްކުރަން ފެށީ ބަންގްލަދޭޝް ގަޑިން ރޭ 8:00 ޖަހާ އެހާކަންހާއިރު ކަމަށެވެ.
"ރެމާލް" ކަނޑުގެ އައްސޭރިފަށަށް އަރަމުން ދިޔައީ ގަޑިއަކު 120 ކިލޯމީޓަރު ނުވަތަ ގަޑިއަކު 75 މޭލު ބާރުމިނުގައި ކަމަށް ވެސް އޭނާ ވިދާޅުވިއެވެ.
"ރެމާލް" ކަނޑުގެ އައްސޭރިފަށަށް އަރަމުން ދިޔައީ ގަޑިއަކު 120 ކިލޯމީޓަރު ނުވަތަ ގަޑިއަކު 75 މޭލު ބާރުމިނުގައި -- ފޮޓޯ/އަލް ޖަޒީރާ
ނުރައްކާތެރިކަމުގެ ސިގްނަލް 10 އަށް އުފުލާފައިވާއިރު، އެއީ އޭގެ އެންމެ މަތީ ދަރަޖައެވެ.
ބަންގްލަދޭޝްގެ މިނިސްޓްރީ އޮފް ޑިޒާސްޓާ މެނޭޖްމަންޓް އެންޑް ރިލީފްގެ ސެކްރެޓަރީ ކަމްރުލް ހަސަން ވިދާޅުވީ ރައްކާތެރި ނޫން ގެތަކުން މީހުން ބަދަލުވާން އަންގާފައިވާ ކަމަށެވެ. އެގޮތުން، އައްސޭރިފަށުގެ ގެދޮރު ދޫކޮށް މިހާތަނަށް 800،000 މީހުން ސަރުކާރުގެ ވަގުތީ ހިޔާތަކަށް ވަނީ ބަދަލުކޮށްފައެވެ.
ނަމަވެސް، ރައްކާތެރި ހިސާބުތަކަށް ދަތުރުކުރަން އުޅުމުގެ ތެރޭގައި 50 އަށް ވުރެ ގިނަ ފަސިންޖަރުން އުފުލާ ފެރީއެއް އަޑިއަށްގޮސްފައިވާ ކަމަށް ފުލުހުން ވަނީ ބުނެފައެވެ.
ބަންގްލަދޭޝްގައި ފާއިތުވި 10 އަހަރު ތެރޭގައި ތޫފާންތަކުގައި ލައްކައެއްހާ މީހުން ވަނީ މަރުވެފައެވެ. މިދިޔަ އަހަރުގެ މެއި މަހު ތޫފާން "މޮޗާ" ވެގެން ދިޔައީ 2007 ވަނަ އަހަރުގެ ނޮވެމްބަރު މަހު އެރި "ސިދުރު" ތޫފާނަށް ފަހު ބަންގްލަދޭޝްއަށް އައި އެންމެ ބާރުގަދަ ތޫފާނަށެވެ.
ތޫފާން "ރެމާލް" ދެން ދަތުރުކުރާނީ އިންޑިއާއާ ދިމާއަށް ކަމަށް އިންޑިއާގެ މޫސުމާބެހޭ އިދާރާއިން ލަފާކުރެއެވެ.