އަނެއްކާ ވެސް މާލޭގެ ގެއެއްގައި މަރުވެފައި އޮތް މީހަކު މިއަދު ފެނިއްޖެއެވެ.
ފުލުހުން ބުނީ، މާފަންނުގެ ގެއެއްގެ ގްރައުންޑް ފްލޯގައި ފިރިހެނަކު މަރުވެފައި އޮތް ކަމުގެ ރިޕޯޓު ލިބުނީ 14:20 އެހާކަންހާއިރު ކަމަށެވެ.
އެ މީހާ ފެނިފައިވަނީ މާފަންނު ރަބީއުވިލާ ގެއިންނެވެ. ފުލުހުން އަންނަނީ ސީންގައި ހަރަކާތްތެރިވަމުންނެވެ.
ފާހަގަކޮށްލެވޭ ގޮތުގައި ރަބީއުވިލާ ގެއަކީ މީގެ ކުރިން އަލިފާނުގެ ހާދިސާއެއް ވެސް ހިނގި ގެއެކެވެ. އެ ގެ ތަޅާލުމުގެ މަސައްކަތް ވަރަށް އަވަހަށް ފަށާނެ ކަމަށް މިދިޔަ މަހު 11 ގައި ސަރުކާރުން އޮތީ ބުނެފައެވެ.
މި މައްސަލައާ ގުޅޭ އެއްވެސް އިތުރު ތަފުސީލެއް މިހާތަނަށް ފުލުހުން ހިއްސާކޮށްފައެއް ނުވެއެވެ. ފުލުހުން ބުނީ، ހާދިސާއާ ގުޅޭ އިތުރު މައުލޫމާތު ލިބެމުން އަންނަ ވަރަކުން ހިއްސާކުރާނެ ކަމަށެވެ.
ފާހަގަކޮށްލެވޭ ގޮތުގައި މިދިޔަ ބުދަ ދުވަހު ވެސް ހުޅުމާލޭގައި ވޭނެއް ތެރޭގައި މަރުވެފައި އޮތް މީހަކު ފެނިފައިވެއެވެ. އެ ދުވަހު މަރުވެފައި އޮއްވައި ފެނުނީ ބަންގްލަދޭޝްއަށް ނިސްބަތްވާ ފިރިހެނެކެވެ. އެ މީހާގެ މަރުގައި ތުހުމަތުކުރެވޭ ކަންތައްތަކެއް ނެތް ކަމަށް ފުލުހުން މީގެ ކުރިން ވަނީ ބުނެފައެވެ.
އަދި، އޭގެ ކުރިން މި މަހު 13 ވީ މިދިޔަ ހޯމަ ދުވަހު ބަނޑޭރިކޮށީގެ އެޕާޓްމަންޓެއްގައި މަރުވެފައި އޮތް ދިވެހި ފިރިހެނެއް ވެސް ވަނީ ފެނިފައެވެ. އެ ދުވަހު މަރުވެފައި އޮއްވައި ފެނުނީ 30 އަހަރުގެ ދިވެހި ފިރިހެނެކެވެ.
އެ މީހާގެ މަރުގެ މައްސަލަ އިތުރަށް ބަލަން، އެ މީހާގެ އޮޓޯޕްސީއެއް ހެދުމުގެ މަސައްކަތް ފުލުހުން އަންނަނީ ކުރަމުންނެވެ.