ޅ. އަތޮޅު ގާއެރިފަރުގައި ވަޅުލާފައި ހުރި ގިނަ އަދަދެއްގެ ބަނގުރާ ފުލުހުން މިއަދު އަތުލައިގެންފިއެވެ.
ފުލުހުން ބުނީ، މި އޮޕަރޭޝަނަކީ އެ ރަށުގައި ބަނގުރާ ވަޅުލާފައިހުރި ކަމަށް ހިންނަވަރު ޕޮލިސް ސްޓޭޝަނަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއް ކަމަށެވެ.
މި އޮޕަރޭޝަން ހިންގާފައިވަނީ އިއްޔެގެ ވަގުތެއްގައެވެ.
މި އޮޕަރޭޝަންގައި އެ ފަޅު ރަށުގައި ބަނގުރާ ވަޅުލާފައި ހުރި ކަމަށް ބުނާ ސަރަހައްދު ބަލައި ފާސްކުރިއިރު 91 ދަޅު ބަނގުރާ އަދި 59 ފުޅި ބަނގުރާ ފެނިފައިވާ ކަމަށް ފުލުހުން މައުލޫމާތުދެއެވެ.
އެކަމަކު، މި މައްސަލައިގެ ތުހުމަތުގައި މިހާތަނަށް މީހަކު ހައްޔަރުކޮށްފައެއް ނުވެއެވެ. ހިންނަވަރު ޕޮލިސް ސްޓޭޝަނުން އަންނަނީ މި މައްސަލަ ތަހުގީގު ކުރަމުންނެވެ.
ފާހަގަކޮށްލެވޭ ގޮތުގައި ގިނަ އަދަދެއްގެ ބަނގުރާ ހިފައިގެން ފަޅު ރަށަކަށް ދަނިކޮށް ވެސް މީގެ ކުރިން 10 މީހަކު ހައްޔަރުކުރިއެވެ. އަދި، ގދ. ހޯނޑެއްދު އާއި އެ ރަށާ ކައިރީގައި އޮންނަ ފަޅުރަށެއްގައި ވަޅުލާފައި ހުރި 82 ކިލޯގެ މަސްތުވާތަކެތި ވެސް ނޮވެމްބަރު 2، 2022 ގައި އަތުލައިގަތެވެ.