ފަހަކަށް އައިސް އެކްޝަން ފިލްމުތަކުން ބެލުންތެރިންގެ މަގުބޫލުކަން ހޯދަމުން އަންނަ އެކްޓަރު ސިދާތު މަލްހޯތްރާގެ ކުރިއަށް އޮތް ފިލްމަށް ބަތަލާ ކްރިތީ ސެނޮން ސޮއިކޮށްފައިވާ ކަމަށް ރިޕޯޓުތަކުން ބުނެފިއެވެ.
ސިދާތުއާ އެކު ކްރިތީ ސެނޮން ފުރަތަމަ ފަހަރަށް ސްކްރީނުން ފެންނާނެ މި ފިލްމަކީ މެޑްޑޮކް ފިލްމްސްއިން ލޯބީގެ ވާހަކައެއްގެ މައްޗަށް ބިނާކޮށް އުފައްދާ ފިލްމެކެވެ. މެޑްޑޮކްސް ފިލްމްސްއިން ދާދި ފަހުން ގެނެސްދިން ފިލްމުތަކުގެ ތެރޭ ބަތަލާ ކްރިތީ ސެނޮން މުހިއްމު ރޯލެއް ކުޅެފައިވާ "ތޭރީ ބާތޯންމެ އޭސަ އުލްޖާ ޖިއާ"، "މާޑަ މުބާރަކް" އަދި "ޒަރަ ހަޓްކޭ ޒަރަ ބަޗްކޭ" ހިމެނެއެވެ.
އިންޑިއާގެ ފިލްމީ ޚަބަރުތައް ގެނެސްދޭ ނޫސްތަކުން ބުނެފައިވާ ގޮތުގައި ސިދާތާއި ކްރިތީގެ މި ފިލްމުގެ ޕްރޮޑިއުސަރަކީ ދިނޭޝް ވިޖަންއެވެ. ނަމަވެސް، ފިލްމު ޑައިރެކްޓްކުރާނެ މީހެއްގެ އިތުރުން ފިލްމަށް ކިޔާނެ ނަން ވެސް އަދި އިއުލާނުކޮށްފައެއް ނުވެއެވެ.
މެޑްޑޮކްސް ކުންފުނީގެ ފިލްމު "މިމީ"އިން ނެޝަނަލް އެވޯޑް ހާސިލުކުރި ބަތަލާ ކްރިތީއަކީ ބޮލީވުޑްގެ އެންމެ އުއްމީދީ ތަރިންގެ ތެރޭ ހިމެނޭ ބަތަލާއެކެވެ.
ކްރިތީ ފިލްމު "ތޭރީ ބާތޯންމެ އޭސަ އުލްޖާ ޖިއާ"ގެ މަންޒަރެއްގައި--ފޮޓޯ/ޕިންކްވިލާ
ސިދާތު ދާދި ފަހުން ކުޅެފައިވާ ފިލްމުތަކަށް އާއްމުންގެ ފަރާތުން ލިބެމުން އަންނަ ތަރުހީބާ އެކު މި ޖޯޑު އަލަށް ސްކްރީނުން ފެންނާތީ ދެ ތަރިންގެ ސަޕޯޓަރުންނަށް ވެސް މިއީ ވަރަށް އުފާވެރި ޚަބަރެކެވެ.
މެޑްޑޮކް ފިލްމްސްގެ ޕްރޮޖެކްޓަކަށް ސިދާތު ސޮއިކޮށްފައިވާ ކަމަށް ރިޕޯޓުތަކުން ބުނެފައިވާއިރު ޑައިރެކްޓަރު މުރާދު ހެތާނީއާ އެކު "ސްޕައިޑާ"ގެ ނަމުގައި އުފައްދާ ފިލްމަކަށް އެކްޓަރު ސޮއިކުރި ކަމަށް ވެސް ޚަބަރުތައް ފެތުރުނެވެ. ފިލްމު "ޝޭރްޝާހު"އިން ގިނަ ބައެއްގެ ސަމާލުކަން ހޯދި ސިދާތު އެންމެ ފަހުން ބެލުންތެރިންނަށް ފެނިފައިވަނީ ދަރުމާ ކުންފުނިން ގެނެސްދިން ފިލްމު "ޔޮދާ"އިންނެވެ. މި ފިލްމު މިހާރު އެމޭޒަން ޕްރައިމްއަށް ވަނީ ދޫކޮށްލާފައެވެ.