ޓެކްސީ ޑްރައިވަރަކު ދަތުރެއް ނެގުމަށް ފަހު، ރުޅި އައިސްގެން ކާރުން ދަތުރުވެރިން ބޭލި މައްސަލައެއް ތަހުގީގުކުރުމަށް ފަހު އަމަލުކުރަންޖެހޭ ގަވާއިދުތަކާ އެއްގޮތްވާ ގޮތުގެ މަތިން އަޅަންޖެހޭ ފިޔަވަޅުތައް އަޅަމުން އަންނަ ކަމަށް ފުލުހުން ބުނެފިއެވެ.
އެ ކާރުން ދަތުރު ނެގި ފަރާތް ވަނީ ސޯޝަލް މީޑިއާގައި އެ ވާހަކަ ހިއްސާކޮށްފައެވެ.
ސޯޝަލް މީޑިއާގައި އެ މީހާ ކުރި ޕޯސްޓެއްގައި ބުނެފައި ވަނީ، ހުޅުމާލޭގައި އޭނާގެ ދަރިފުޅުގެ ފެތުމުގެ މުބާރާތެއް ނިންމާފައި އަނބުރާ މާލެ އައުމަށް ޓެކްސީ ދަތުރެއް ނެގި ކަމަށެވެ. ޓެކްސީއަށް އެރުމުން އެތައް ބޭކާރު ވާހަކައެއް ޓެކްސީ ޑްރައިވަރު ދެއްކި ކަމަށާއި އަޚުލާގީ މިންގަނޑަށް ނުފެތޭ ވާހަކަތައްވެސް ދެއްކި ކަމަށް އެ މީހާ ބުންޏެވެ.
އެއަށްފަހު ޓެކްސީއަށް އިތުރު މީހަކު އެރުވިޔަސް ހެޔޮތޯ ސުވާލުކުރުމުން އެކަމަށް ހުއްދަ ދިން ކަމަށް އޭނާ ބުންޏެވެ.
"އެކަމަކު އެމީހާ އަތުން އަގު ނަގަންވާނީ އަހަރެން ފައިބާ ހިސާބުން އެމީހާ އެކަނި ކުރާ ދަތުރަށް އެކަނި. އެގޮތަށް އެއްބަސްވެ އެރުވިޔަސް އެންމެ ރަނގަޅު ކަމަށް ބުނިން. ނަމަވެސް އެކަމާ އެއްބަސްނުވެ އެއީ ތިމަންނަޔާ ދަތުރުނަގާ މީހާއާ ދެމެދު ގޮތްނިންމާ ކަމެއްނޫންހޭ ކިޔާ ދެކޮޅުހަދާ ރުޅިގަދަ ކުރަންފެށި،" އެ ކާރުގައި ދަތުރު ކުރި މީހާ ބުންޏެވެ.
އެކަމާ ރުޅިގަދަވެ ޓެކްސީ ޑްރައިވަރު އޭނާއާއި އޭނާގެ ދަރިފުޅު ގޮވައިގެން މުޅި ހުޅުމާލެ ވަށައި ބުރުޖެހި ކަމަށާއި އެއަށް އަރާނެ އިތުރު ފަރާތެއް ނުވުމުން އެ މީހުން އަނބުރާ އެ ކާރަށް އެރި ތަނަށް ބާލާފައި ދިޔަ ކަމަށް އެ މީހާ ބުންޏެވެ.
"ތިމަންނަ ކިތަންމެ ނުބައޭ ބުންޏަސް އަދި ބޮޑު ވަރަކަށް މަރާލިޔަސް ތި މީހުން ނެގިތަނަށް ތިމީހުން ބޭލުން ނޫން ގޮތެއްނެތްކަމަށް ބުނެ ހުޅުމާލެއިން އެ ޓެކްސީއަށް އެރިތަނަށް ބާލާފަ ގޮއްސި،" އެ ޕޯސްޓުގައި އެ މީހާ ބުނެފައިވެއެވެ.
މި ހާދިސާއާ ގުޅިގެން މޯލްޑިވްސް ޕޮލިސް ސާވިސްގެ ސްޕޯކްސްޕާސަން ސުޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ، ހުޅުމާލެ ޕޮލިސް ސްޓޭޝަނުން އެ މައްސަލަ މިހާރު ތަހުގީގުކުރަމުން އަންނަ ކަމަށެވެ. އަދި އެކަމާ ގުޅިގެން އަމަލުކުރަންޖެހޭ ގަވާއިދުތަކާ އެއްގޮތްވާ ގޮތުގެ މަތިން އަޅަންވާ ފިޔަވަޅުތައް ފުލުހުންގެ އިދާރާއިން އަޅާނެ ކަމަށް ވެސް ޝިފާން ވިދާޅުވިއެވެ.
މި ހާދިސާއާ ގުޅިގެން އާންމުންގެ ގިނަ ބަޔަކު ވެސް ވަނީ ހިތްހަމަނުޖެހުން ފާޅުކޮށްފައެވެ. އެގޮތުން އެއީ ޓެކްސީ ޑްރައިވަރެއްގެ ފަރާތުން ފެންނަށް ނުޖެހޭ، ވަރަށް ވުރެ ދަށުދަރަޖައިގެ އަމަލެއް ކަމަށާއި ޓެކްސީ ޚިދުމަތަކީ ޓެކްސީ ކުރާ ފަރާތާއި އެ ޚިދުމަތް ހޯދާ ފަރާތްތަކަށް ނުހަނު މުހިއްމު ބޭނުންތެރި ކަމެއް ކަމަށް ވާއިރު އިހުތިރާމާއި ގަދަރު ދެމެހެއްޓުމަށް ވަނީ ގޮވާލާފައެވެ.