ކުޅުދުށްފުށީ ރީޖަނަލް ހޮސްޕިޓަލުގެ ސީއީއޯގެ މަގާމަށް, ނަރުހެއްގެ ގޮތުގައި 25 އަހަރު މަސައްކަތްކޮށްފައިވާ ނާޒިމާ އަލީ ހަމައްސައިފިއެވެ.
ކުޅުދުއްފުށި ހޮސްޕިޓަލުން ވަނީ ނާޒިމާއަށް މަރުހަބާ ކިޔައި، އޭނާގެ ހިންގެވުމުގެ ދަށުން އެ ހޮސްޕިޓަލަށް ކުރިއެރުން އަންނާނެ ކަމަށް އުންމީދު ކުރާ ކަމަށް ބުނެފައެވެ.
ނާޒިމާ މިއަދު 'ސަން'އަށް މައުލޫމާތު ދެއްވަމުން ވިދާޅުވީ، ރައީސް ޑރ. މުޙައްމަދު މުއިއްޒު ކުޅުދުއްފުށީ ހޮސްޕިޓަލުގެ ހިންގުން އޭނާއާ ހަވާލުކުރެއްވުމަކީ އޭނާއަށް ލިބޭ ވަރަށް ބޮޑު ފަޚުރެއް ކަމަށެވެ.
ނާޒިމާ ވިދާޅުވީ މިހާތަނަށް އޭނާއަށް ސިއްހީ ދާއިރާގައި ލިބިފައި ހުރި ތަޢުލީމާއި ތަޖުރިބާގެ އަލީގައި، ހޮސްޕިޓަލަށް ރަނގަޅު ބަދަލުތަކެއް ގެނެސް، އެ ތަނުން ޚިދުމަތް ފޯރުކޮށްދިނުމުގައި މިހާރަށް ވުރެ ލުއި ފަސޭހަ ގޮތްތަކެއް ހަމަޖެއްސުމަށް އުންމީދު ކުރައްވާ ކަމަށެވެ.
އޭނާ ވަނީ ނާސިން އެންޑް މެނޭޖްމަންޓުގެ ދާއިރާއިން މަތީ ތަޢުލީމު ހާސިލުކުރައްވައި، އައިޖީއެމްއެޗް ހޮސްޕިޓަލުގައި 20 އަހަރު ހިމެނޭ ގޮތަށް، ޖުމްލަ 25 އަހަރު ނަރުހެއްގެ ގޮތުގައި ޚިދުމަތް ކުރައްވައިފައެވެ.