އެޗްބީއޯއިން މިހާތަނަށް އެޅުވި އެންމެ ބޮޑު ޝޯ "ގޭމް އޮފް ތުރޯންސް"ގެ ސްޕިން އޮފް "ހައުސް އޮފް ދަ ޑްރެގަން"ގެ ދެވަނަ ސީޒަންގެ ފުރިހަމަ ޓްރެއިލަރެއް އާންމުކޮށްފިއެވެ.
ގޭމް އޮފް ތުރޯންސްގެ ދުނިޔެއަށް ބިނާކޮށް އުފެއްދި ޕްރީކުއެލް ޝޯ 2022 ވަނަ އަހަރު ދައްކަން ފެށުމާ އެކު އެ ޝޯ ވެގެން ދިޔައީ ގިނަ ބައެއްގެ މެދުގައި މަގުބޫލުކަން ބޮޑުވި ޝޯއަކަށެވެ. އެއާއެކު ޝޯގެ ދެވަނަ ސީޒަނަކަށް ފޭނުން ތިބީ ކެތްމަދުވެފައެވެ.
އެޗްބީއޯއިން އެންމެ ފަހުން ވަނީ އާ ސީޒަނުން ފެންނާނެ ކަންތައްތަކަށް އަލިއަޅުވާލައި ޝޯގެ ޓްރެއިލަރެއް ހާމަކޮށްފައެވެ. ޓްރެއިލަރުން ޝޯގެ ލީޑު ކެރެކްޓަރުން ފެނިގެންދެއެވެ.
އަދި, މުޅި ޓްރެއިލަރުން ގިނަ އަދަދަކަށް ޑްރެގަންތައް ފެނިގެންދާއިރު އާ ސީޒަނުން ބޮޑު ހަނގުރާމައަކަށް ތައްޔާރުވާކަމުގެ އިޝާރާތްތައް ވަނީ ކޮށްފައެވެ. މި ސީޒަނަކީ ޝޯއިން ގިނައިން އެކްޝަން ފެނިގެންދާނެ ސީޒަނެއް ކަމަށް ވެސް ޓްރެއިލަރުން ވަނީ ފެނިގެން ގޮސްފައެވެ.
ޖުމްލަ އަށް އެޕިސޯޑުގެ އާ ސީޒަން އަންނަ މަހުގެ 16ގައި ދައްކަން ފަށާނެއެވެ.
އެހެންވީމާ ޝޯއަށް އިންތިޒާރުކުރާ އެންމެންނަށް މަހެއްގެ ތެރޭގައި ޝޯ ބަލަން ފެށޭނެއެވެ. އެޗްބީއޯއިން ޝޯ ގެނެސްދޭނީ ކޮންމެ ހަފުތާއެއްގައި އެޕިސޯޑެކެވެ. ޝޯގެ އާ ސީޒަންގެ ކާސްޓުންގެ ތެރޭގައި ހިމެނެނީ އެމާ ޑާސީއާއި މެޓް ސްމިތުގެ އިތުރުން އޮލިވިއާ ކުކް އަދި އެވަން މިޗެލްއެވެ. މިއީ ފުރަތަމަ ސީޒަންގެ ލީޑުން ވެސް ފެނިގެން ގޮސްފައިވާ ކާސްޓެވެ.
ހައުސް އޮފް ޑްރެގަންގެ ދެވަނަ ސީޒަން ނެރުމުގެ ކުރީން އެޗްބީއޯއިން ވަނީ ޝޯގެ ތިންވަނަ ސީޒަނެއް ވެސް އުފައްދާނެ ކަމަށް އިއުލާނުކޮށްފައެވެ. ޝޯގެ ތިންވަނަ ސީޒަނެއް އިއުލާނުކޮށްފައިވަނީ މި އަހަރުގެ ޖެނުއަރީ މަހުގެ ތެރޭގައެވެ.