ބަލިވެއިން އަންހެނަކަށް އޭނާގެ އާއިލާގެ މެންބަރުން އަނިޔާކުރާ ކަމަށް ބުނާ މައްސަލައެއް ފުލުހުން ތަހުގީގު ކުރަން ފަށައިފިއެވެ.
އެ މައްސަލަ ފެންމަތިވެފައިވަނީ ސޯޝަލް މީޑިއާގައެވެ. އެގޮތުން ފޭސްބުކްގައި މީހަކު ހިއްސާކޮށްފައިވާ ޕޯސްޓެއްގައިވަނީ، އޭނާގެ ބައްޕަ އާއި 18 އަހަރު ނުވާ ކޮއްކޮއާއި އާއިލާގެ އިތުރު މީހުންގެ ފަރާތުން ވެސް އަނިޔާ ލިބޭ ކަމަށާއި އެމީހުން އޭނާގެ ބަނޑާއި ބޮލުގައި ޖަހާ ކަމަށެވެ.
އެ ޕޯސްޓުގައި އޭނާ ވަނީ ހަށިގަނޑުގެ އެކި ތަންތަނުން ޒަޚަމްތައް ފެންނަ ފޮޓޯތަކެއް ހިއްސާކޮށްފައެވެ.
އެ އަނިޔާއަށް އިންސާފު ހޯދައިދިނުމަށް ފޭސްބުކްގައި ކުރި ޕޯސްޓް އެކްސްގައި ޝެއާކޮށް، މީހަކު ވަނީ ފުލުހުންގެ ސަމާލުކަމަށް ގެނެސްފައެވެ.
އެ ޕޯސްޓާ ގުޅުވައި ފުލުހުންގެ ތަރުޖަމާނު އަހުމަދު ޝިފާން ވިދާޅުވީ ކަމާ ގުޅުންހުރި މުއައްސަސާތަކާ ގުޅިގެން އެ މައްސަލަ ތަގުގީގުކުރަމުން އަންނަ ކަމަށެވެ. ނަމަވެސް އިތުރު ތަފުސީލެއް ނުދެއްވައެވެ.
ރާއްޖޭގައި ގެވެށި އަނިޔާ ކުރުމަކީ އާންމު މައްސަލައެއް ނަމަވެސް ފުލުހުންނަށާއި އެހެނިހެން އިދާރާތަކަށް ރިޕޯޓުކުރާ މިންވަރު އަދިވެސް މަދެވެ. މިދިޔަ އަހަރު ފުލުހަށް ގެވެށި އަނިޔާގެ 219 މައްސަލައެއް ރިޕޯޓުކޮށްފައިވާއިރު، މިއަހަރުގެ މިހާތަނަށް 91 މައްސަލަ ރިޕޯޓުކޮށްފައިވެއެވެ.