ރައްޔިތުންގެ މަޖިލިސް އުފެދުނީންސުރެ މިއަދާ ހަމައަށް މި ވޭތުވެ ދިޔަ 92 އަހަރުތެރޭ އެންމެ ގިނަ މަސައްކަތްތައް ކުރެވުނީ ނިމިގެން މިދާ 19 ވަނަ މަޖިލީހުގައި ކަމަށް ރައްޔިތުންގެ މަޖިލީހުގެ ރައީސް މުޙައްމަދު އަސްލަމް މިއަދު ވިދާޅުވެއްޖެއެވެ.
ބުދަ ދުވަހު ނިމޭ މި ދައުރުގެ އެންމެ ފަހު ޖަލްސާ އޮތީ މިއަދެވެ.
ޖަލްސާގެ ރިޔާސަތުގައި އިންނަވައި، ދައުރުގެ އެންމެ ފަހު ޖަލްސާ ނިންމަވައިލެއްވުމަށް ވާހަކަދައްކަވަމުން އަސްލަމް ވަނީ މި ދައުރުގައި ކުރެވުނު މަސައްކަތްތަކުގެ ތަފުސީލު ހިއްސާކުރައްވާފައެވެ.
އަސްލަމް ވިދާޅުވީ، މިއީ އޭނާގެ މަޖިލިސް ހަޔާތުގައި ނިންމާލި ހަތަރު ވަނަ ދައުރު ކަމަށެވެ. އަދި ކުރިއަށް އޮތް 20 ވަނަ މަޖިލީހުގައި އެމަނިކުފާނު ނެތް ނަމަވެސް މި ދައުރު ނިންމާލީ އުފަލާއި ފަޚުރުވެރިކަމާއެކު ކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ މި ދައުރުގައި 530 ޖަލްސާއަކާއި، 3،784 ކޮމިޓީ ބައްދަލުވުމެއް ބާއްވާފައިވާ ކަމަށެވެ. އަދި މި ދައުރުގައި 178 ބިލާއި، 73 ގަރާރުގެ މަސައްކަތް ކުރި ކަމަށާއި ސަރުކާރުން ހުށަހެޅި 152 މައްސަލައަކާއި، ރިޔާސަތުން ހުށަހެޅި 104 މައްސަލައެއްގެ އިތުރުން މެންބަރުން ހުށަހެޅި 48 މައްސަލައެއް ބަލައި އެ މަސައްކަތް ކޮށްފައިވާ ކަމަށް އެމަނިކުފާނު ވިދާޅުވިއެވެ.
19 ވަނަ ރައްޔިތުންގެ މަޖިލީހުގެ ރައީސް މުހައްމަދު އަސްލަމް-- ފޮޓޯ/ މަޖިލިސް އިދާރާ
މީގެ އިތުރުން ވެސް ދައުލަތުގެ ބަޖެޓުތައް ފާސްކުރުން ފަދަ ގިނަ މަސައްކަތްތަކެއް މި ދައުރުގައި ކޮށްފައިވާ ކަމަށް އަސްލަމް ވިދާޅުވިއެވެ.
އެކަމަށްޓަކައި އަސްލަމް ވަނީ މަޖިލިސް އިދާރާގެ މުވައްޒަފުންނާއި، މެންބަރުންނާއި، ކޮމިޓީތަކުގެ މުގައްރިރުންނަށް އެ ފަރާތްތަކުން ކުރި ބުރަ މަސައްކަތަށް ޝުކުރު އަދާ ކުރައްވާފައެވެ. ވަކިން ޚާއްސަކޮށް އަސްލަމް ވަނީ އޭނާގެ ދާއިރާ ކަމަށްވާ ހިތަދޫ އުތުރު ދާއިރާގެ ރައްޔިތުންނަށް ޝުކުރު އަދާކުރައްވާފައެވެ.
"ވިހި ވަނަ ރައްޔިތުންގެ މަޖިލީހުގައި އަޅުގަނޑަށް ހުރުމުގެ ނަސީބު ނުލިބުނު ކަމުގައިވީނަމަވެސް ސިޔާސީ ކަންކަމުގައާއި، އަޅުގަނޑު ދެން ވެސް އިންސާނީ ހައްގުތައް ކަށަވަރުކޮށް، މި ގައުމުގައި ހެޔޮ ވެރިކަމެއް އަށަގެންނެވުމަށާއި އަދި ޑިމޮކްރަސީގެ ހަމަތައް ގާއިމްކުރަން މަސައްކަތްކުރާނެކަން ދަންނަވަން،" އަސްލަމް ވިދާޅުވިއެވެ.
"އަޅުގަނޑުގެ ދުއާއަކީ އަޅުގަނޑުމެންގެ މި ލޮބުވެތި ވަތަނަށް ނަސްރާއި ނަސީބާއި ކާމިޔާބު މިންވަރު ކުރެއްވުން. އަބަދުވެސް މި ރާއްޖެއަށް ކުރިއެރުމާއި ފާގަތިކަން މިންވަރު ކުރެއްވުން."
މި ބަސްކޮޅާއެކު އަސްލަމް ވަނީ 19 ވަނަ ރައްޔިތުންގެ މަޖިލީހުގެ އެންމެ ފަހުގެ ޖަލްސާ ނިންމަވައިލައްވައިފައެވެ.
ރާއްޖޭގައި އެންމެ ފުރަތަމަ ގާނޫނުއަސާސީއެއް އެކުލަވައިލައި، އެއާއެކު ގާނޫނު ހަދާ މަޖިލީހެއް އުފެއްދީ 1932ގައެވެ.