ވޭތުވެދިޔަ ހަ އަހަރުތެރޭ ޖިންސީ ކުށުގެ މައްސަލަތަކުގެ 2،169 މައްސަލައެއް ފުލުހަށް ހުށަހަޅާފައިވާކަން ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން އެއްކުރި މައުލޫމާތުން ހާމަވެއްޖެއެވެ.
ޖިންސީ ގޯނާކުރުމާއި ރޭޕްގެ މައްސަލަތައް އިތުުރުވެފައިވާތީ ރައްޔިތުންގެ މަޖިލީހުގެ މަޑުއްވަރީ ދާއިރާގެ ކުރީގެ މެމްބަރު، އަދި މިހާރުގެ ލޯކަލް ގަވަނަންސް މިނިސްޓަރު އާދަމް ޝަރީފު 2021 ވަނަ އަހަރު ވަނީ ގަރާރެއް ހުށަހަޅާފައެވެ.
އެ ގަރާރު ދިރާސާ ކުރުމަށްފަހު އެކުލަވައިލި ރިޕޯޓު މިއަދުގެ މަޖިލީހުގައި ހިއުމަން ރައިޓްސް އެންޑް ޖެންޑާ ކޮމިޓީގެ މުގައްރިރު، ހިންނަވަރު ދާއިރާގެ މެންބަރު ޖީހާން މަހުމޫދު ވަނީ ހުށަހަޅާފައެވެ.
އެ ގަރާރު ދިރާސާކުރުމަށް ހިއުމަން ރައިޓްސް ކޮމިޓީން އެއްކުރި މައުލޫމާތުން އެނގުނު ގޮތުގައި ވޭތުވެދިޔަ ހަ އަހަރުތެރޭ ޖިންސީ ކުށުގެ މައްސަލަތަކުގެ 2،169 މައްސަލައެއް ފުލުހަށް ހުށަހަޅާފައިވެއެވެ. އެގޮތުން:
- 2018 ވަނަ އަހަރު: 362 މައްސަލަ
- 2019 ވަނަ އަހަރު: 410 މައްސަލަ
- 2020 ވަނަ އަހަރު: 487 މައްސަލަ
- 2021 ވަނަ އަހަރު: 342 މައްސަލަ
- 2022 ވަނަ އަހަރު: 334 މައްސަލަ
- 2023 ވަނަ އަހަރު: 234 މައްސަލަ
ހަމައެއާއެކު މި މައްސަލާގައި ކޮމިޓީއަށް ފާހަގަކުރެވުނު ކަންކަމުގެ ތެރޭގައި، 2018 ވަނަ އަހަރުން 2023 ވަނަ އަހަރުގެ އޮކްޓޯބަރު މަހުގެ ނިޔަލަށް ޕްރޮސިކިއުޓާ ޖެނެރަލް (ޕީޖީ) އޮފީހުން ކޯޓުތަކަށް 47 މައްސަލައެއް ހުށަހަޅާފައިވެއެވެ.
އެ މުއްދަތުގެ ތެރޭގައި ސާބިތުވެފައިވާކަމަށް ކޯޓުން ކަނޑައަޅާފައި ވަނީ 10 މައްސަލައެކެވެ. ނަމަވެސް އޭގެތެރޭގައި ކުށް ސާބިތު ނުވާ އަށް މައްސަލައެއް ކޯޓު މަރުހަލާގައި އެބައޮތެވެ.
ޖެންޑާ ކޮމިޓީގެ މުގައްރިރު ޖީހާން މަހްމޫދު --- ފޮޓޯ/ މަޖިލިސް
ކޮމިޓީއަށް ފާހަގަކުރެވުނު އިތުރު ކަންކަން:
- ޖިންސީ ގޯނާ ކޮށްގެން ފުލުހުންނަށް ހުށަހަޅާ ގިނަ މައްސަލަތަކަކީ ޖިންސީ ގޯނާއާ ގުޅިގެން ވަކި ކަމެއް ކުރާނެ ކަމަށް ޑިމާންޑުކޮށް ބްލެކްމެއިލްކުރާ މައްސަލަތައް.
- ޖިންސީ ގޯނާގެ މައްސަލަތަކުގައި ހެއްކާއި ގަރީނާ ނެގުމަށް ހަދަންޖެހޭ ޓެސްޓުތައް ހެދޭނެ ވަސީލަތްތައް ގިނަ ރަށްރަށުގައި ނެތުން.
- އަނިޔާ ލިބޭ ފަރާތް ދައުވާކުރަން ފޮނުވުމުގެ ކުރިން ސައިކޮލޮޖިކަލް ރިޕޯޓެއް ނެގުމަށް ބަލާއިރު، އެފަދަ ތަންތަން ރާއްޖޭގައި މަދުވުމުން އެކަށީގެންވާ އަވަސްމިނުގައި ޚިދުމަތް ނުލިބުން.
- ރޭޕް އެވިޑެންސް ކިޓް ސަރުކާރުގެ ގިނަ ސިއްހީ ޚިދުމަތްދޭ މަރުކަޒުތަކަށް ފޯރުކޮށްދީފައި ނުވާކަން.
ކޮމިޓީގެ ހުށަހެޅުންތައް:
- ޖިންސީ ކުށުގެ ޝިކާރައަކަށްވާ ފަރާތްތަކަށް އެހީތެރިކަން ފޯރުކޮށްދިނުމަށް، ކަމާގުޅޭ އިދާރާތަކުގެ މެދުގައި މަސައްކަތްކުރާނެ ހަރުދަނާ ނިޒާމެއް ގާއިމުކުރުން.
- ޖިންސީ ކުށުގެ މައްސަލަތަކުގެ ތަހުގީގު އަވަސްކުރުމަށާއި، އެފަދަ ކުށްތަކުގެ ޝިކާރައަކަށްވާ ފަރާތްތަކަށް ބޭނުންވާ ނަފްސާނީ އެހީތެރިކަން ފޯރުކޮށްދިނުމަށް ޓަކައި އެ ފަދަ ޚިދުމަތްތައް ލިބޭނެ ގޮތްތައް ގާއިމުކުރުން.
- ރޭޕް އެވިޑެންސް ކިޓް ބޭނުންކުރުން ލާޒިމުކުރުމާއި، އެ ކިޓް ބޭނުންކުރުމާ ގުޅޭ އުސޫލުތައް ހެދުން.
- ޖިންސީ ކުށުގެ ގާނޫނަށް ގެނެވުނު ފުރަތަމަ އިސްލާހުގެ ދަށުން އެކުލަވާލަންޖެހޭ ގަވާއިދުތައް އެކުލަވައިލާ، ސަރުކާރުގެ ފަރާތުން ފޯރުކޮށްދޭންޖެހޭ ރޭޕް އެވިޑެންސް ކިޓް 2024ވަނަ އަހަރު ނިމުމުގެ ކުރިން ސަރުކާރުގެ ހުރިހާ ސިއްހީ ޚިދުމަތްދޭ މަރުކަޒުތަކަށް ފޯރުކޮށްދިނުން.
ވޭތުވެ ދިޔަ ހަ އަހަރުތެރޭ ދެ ހާހަށްވުރެ ގިނަ ޖިންސީ ކުށުގެ މައްސަލަ ހުށަހަޅާފައިވާއިރު، އެއް އަހަރުން އަނެއް އަހަރަށް އެ މައްސަލަތައް ހުށަހަޅާ މިންވަރު ވަނީ މަދުވެފައެވެ.
ނަމަވެސް އެ މައްސަލަތައް ކޯޓު މަރުހަލާގައާއި އަދި އެ ނޫން ވެސް މަރުހަލާތަކުގައި އެތައް ދުވަހެއް ހޭދަވާކަމުން މަޖިލީހުގެ ހިއުމަން ރައިޓްސް ކޮމިޓީން ވަނީ ކަންބޮޑުވުން ފާހަގަކުރައްވާފައެވެ.