މީގެ ފަހުން ހޮސްޕިޓަލްތައް ޑިޒައިންކޮށް ނިމޭއިރު އެތަނުގައި ޓްރެއިނިން ފެސިލިޓީއެއް ހުންނާނެ ގޮތަށް ޑިޒައިންކޮށް، ހޮސްޕިޓަލްތައް އަޅަން ނިންމާފައި ވާކަމަށް ހެލްތު މިނިސްޓަރު ޑރ. އަބްދުﷲ ޚަލީލް ވިދާޅުވެއްޖެއެވެ.
ނަރުހުންގެ ދުވަސް ފާހަގަކުރުމަށް ރޭ އައްޑޫ އިކުއިޓޯރިއަލް ހޮސްޕިޓަލުގައި ބޭއްވި ޚާއްސަ ރަސްމިއްޔާތެއްގައި ޚަލީލް ވިދާޅުވީ، ނަރުހުންނަކީ ޔުނިވާސިޓީގައި ކިޔެވުމަށް ފަހު ކިޔެވުން ނިމޭނެ ބައެއް ނޫންކަމަށެވެ. ތަކުރާރުކޮށް ފަހުގެ ރިސާޗް ޕޭޕަރުތައް ބަލައި، ފޮތްތައް ކިޔަންޖެހޭ ހާލަތު އަންނާނެ ކަމަށް އޭނާ ވިދާޅުވިއެވެ.
"ޚާއްސަ ގޮތެއްގައި މިކަމަށް އިސްކަން ދޭތީއާ އެއްކޮށް، މިހާރު އަޅުގަނޑުމެން ނިންމާފައި ވާނީ ހޮސްޕިޓަލެއް ވިއަސް، ހޮސްޕިޓަލެއް ޚާއްސަ ގޮތެއްގައި ޑިޒައިން ކުރެވިގެން ދާއިރު، އެތަން ނިމޭއިރުގައި ޓްރެއިނިން ފެސިލިޓީ ހުންނަ ގޮތައް އެތަން ޑިޒައިން ކުރާނީ އިރާދަކުރެއްވިއްޔާ،" މިނިސްޓަރު ވިދާޅުވިއެވެ.
އެގޮތުން އައްޑޫ އިކުއެޓޯރިއަލް ހޮސްޕިޓަލުގެ އާ އިމާރާތުގެ ޑިޒައިނަށް ވެސް ބަދަލު ގެނެސް އެތަނުގައި ސްޓޭޓް އޮފް ދި އާޓް ޓްރެއިނިން ފެސިލިޓީއެއް ގާއިމް ކުރާނެ ކަމުގެ ޔަގީންކަން ޚަލީލް ދެއްވިއެވެ.
ނަރުހުންނަކީ ވަރަށް ގިނަ ދާއިރާތަކުން ކުރިއަށް ދެވޭނެ ބައެއްކަން ފާހަގަކުރައްވައި މިނިސްޓަރު ވިދާޅުވީ، ދުވަސްވީ މީހުންނަށް ޚިދުމަތް ދިނުމުގެ ދާއިރާ ފުޅާކުރަން ޚާއްސަ އިސްކަމެއް މިނިސްޓްރީން ދޭ ކަމަށެވެ. އެކަމަށްޓަކައި ގައުމީ ޔުނިވާސިޓީއާ ވާހަކަ ދައްކައި، ކޯސްތައް ޑިޒައިން ކުރުމުގެ މަސައްކަތް ކުރާކަމަށް މިނިސްޓަރު ވިދާޅުވިއެވެ.
މިހާރު ވެސް ގައުމީ ޔުނިވާސިޓީގެ މެޑިސިން ސްކޫލުގައި ކިޔަވާ ދަރިވަރުން ތަމްރީނު ހަދަނީ ދަރުމަވަންތަ ހޮސްޕިޓަލުގައެވެ. މެޑިސިން ސްކޫލު ދަރިވަރުންގެ ކިޔެވުން ދަރުމަވަންތަ ހޮސްޕިޓަލުން ބަދަލުކުރަން ދާދި ފަހުން ނިންމުމާ ގުޅިގެން ދަރިވަރުން ނުރުހުން ފާޅުކުރިއެވެ.
ދަރިވަރުންގެ ޔޫނިއަނުން މިކަމުގައި ހުރި ކަންބޮޑުވުންތައް ރައީސް ޑރ. މުހައްމަދު މުއިއްޒާ ބައްދަލުކޮށް ދެންނެވުމުން ރައީސް ވަނީ، ދަރިވަރުންގެ ޔޫނިއަނުން އެދުނު ގޮތަށް އެ ޔުނިވާސިޓީގެ ސްކޫލް އޮފް މެޑިސިންގައި ތަޢުލީމު ޙާޞިލްކުރާ ދަރިވަރުންގެ ކިޔެވުން މިހާރެކޭ ވެސް އެއްގޮތަށް ދަރުމަވަންތަ ހޮސްޕިޓަލުގައި ކުރިއަށްގެންދެވޭނެ އިންތިޒާމު ހަމަޖައްސަވައި ދެއްވައިފައެވެ.
މި މައްސަލައަށް ދާއިމީ ހައްލެއް ހޯދުމަށް، މެޑިސިން ސްކޫލެއް ހުޅުމާލޭގައި ބިނާކުރުމުގެ މަސައްކަތް ކުރަމުން އަންނަކަމަށް ސަރުކާރުން ވަނީ ބުނެފައެވެ.