ރޭ މަންދު ކޮލެޖުގެ ގްރެޖުއޭޝަން ފާހަގަކުރަމުންދިޔައިރު، ފަލަސްތީނުގެ ޣައްޒާގައި 211،000 މަތީ ތައުލީމު ދަރިވަރުން ތިބީ މަގުމަތީގައެވެ. އެ ކަމުން ހަމަ ގައިމު ވެސް މަންދު ކޮލެޖުގެ ޗެއާމަން އިބްރާހިމް އިސްމާއިލް (އިބުރާ)އަށް ވަރަށް އަސަރުކުރިއެވެ.
އެހެންވެ، އޭނާ ބޭނުންވީ އެ ކޮލެޖުގެ ގްރެޖުއޭޝަން އެ ކުދީންނަށް ޚާއްސަ ކުރާށެވެ.
"އަޅުގަނޑަށް ކުރެވޭނެ މިންވަރަކީ، ކޮލެޖުގެ ޗެއާމަންގެ ހައިސިއްޔަތުން މަންދު ކޮލެޖުގެ 2024 ގެ ގްރެޖުއޭޝަން އަޅުގަނޑު ތަހުސީސްކުރަން ބޭނުމީ ފަލަސްތީނުގައި މި އަހަރު ގްރެޖުއޭޓު ނުވާނެ ދަރިވަރުންނަށް. މި ގްރެޖުއޭޝަން އަކީ އެ ދަރިވަރުންގެ ހައްގުގައި ބޭއްވޭ ގްރެޖުއޭޝަނެއް،" އޭނާ ވިދާޅުވިއެވެ.
"ސިމްބޮލިކްކޮށް ނަމަވެސް މިއީ އަޅުގަނޑުމެންނަށް ކުރެވޭ ވަރުގެ ކަމެއް،"
މީގެ ކުރިން ރައްޔިތުންގެ ޚާއްސަ މަޖިލީހުގެ މެންބަރުކަން ވެސް ކުރެއްވި އިބުރާއަކީ ސިޔާސީ ކަންކަމުގައި މީގެ ކުރިން ވަރަށް ބޮޑަށް މަސްއޫލުވެ އުޅުއްވި ބޭފުޅެކެވެ. އެމްޑީޕީގެ ފުރަތަމަ ރައީސަަކީ ވެސް އޭނާއެވެ.
އެކަމަކު، ރޭ އޭނާއަށް ދައްކަން ޖެހުނީ ސިޔާސީ ވާހަކައެއް ނޫނެވެ. އެއީ، ޢިލްމީ ވާހަކައެއް ކަމަށް އޭނާ ގަބޫލުކުރައްވައެވެ.
އިބުރާ އެދިވަޑައިގަތީ މަންދު ކޮލެޖުން ގްރެޖުއޭޓުވާ ދަރިވަރުން 'ވަޅުގައި އޮތް ބޮކަށް' ނުވާށެވެ.
"މި ކޮލެޖުން ގްރެޖުއޭޓްވާ ދަރިވަރުންނަށް އަޅުގަނޑު އިލްތިމާސްކުރަނީ ތިޔަ ކުދިންގެ ރަށާއި ފަޅުގެ ކަނޑިންމައާ ހަމައަށް ދުނިޔެ ނިންމައިނުލާށޭ. އޭގެ ބޭރުގައި ދުނިޔެއެއް އޮވޭ. އަޅުގަނޑުމެންނަކީ އެންމެ ތިން ލައްކަ މީހުންނޭ ދުނިޔޭގައި ތިބި ހަތް ބިލިއަން މީހުންގެ ތެރެއިން،" އިބުރާ އިލްތިމާސްކުރެއްވިއެވެ.
"އެހެން މީހުން ދުނިޔޭގައި އެބަ އުޅޭ އެކި ގޮތްގޮތަށް، އެކި ހާލުގައި. އެއީ ވެސް އޮތް ތަނެއްކަން އަޅުގަނޑުމެން އެބަޖެހޭ ދަންނަން. ވަޅުގައި އޮތް ބޮކަށް އަޅުގަނޑުމެން ވެގެން ނުވާނޭ. ވަޅުގައި އޮތް ބޮކަށް ނުފެންނާނެތާ ވަޅުގެ ވަށައި ފާރު ނޫން އެހެން އެއްޗެއް،"
މަންދު ކޮލެޖުގެ ގްރެޖުއޭޝަންގައި ރޭ އިބުރާ ވާހަކަދައްކަނީ: އޭނާ ވަނީ ފަލަސްތީނުގެ ހައްގުގައި ތެދުވާން ގޮވާލާފައި --
އޭނާ ވަނީ ދުނިޔޭގައި އެކިއެކި ކަންކަން ހިނގަމުންދާއިރު، އެ ކަންކަމާ މެދު ވިސްނައި ފިކުރުކުރަން އެދިވަޑައިގެންފައެވެ.
އިބުރާ ވަނީ އެމެރިކާއާ އެކު ރާއްޖެއިން ބާއްވަމުންދާ ގުޅުމާ ގުޅިގެން ވެސް ކަންބޮޑުވުން ފާޅުކުރައްވައިފައެވެ. އެގޮތުން، އެމެރިކާއިން ހަތިޔާރު ދީގެންނާއި އެ ނޫން ގޮތްގޮތުން އިސްރާއީލަށް ވާގިވެރިވެގެން އެ ވަރުގެ ގަތުލުއާންމެއް ހިންގާއިރު، ދިވެހި ސިފައިން، އެމެރިކާ ސިފައިންނާ އެކު ތަމުރީނު ހެދުމަކީ ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވިއެވެ.
"ދިވެހި ދައުލަތުން ޖެހޭ އެމެރިކާއަށް އަންގަން، ދިވެހިރާއްޖޭގެ ރައްޔިތުން ގަބޫލު ކަމެއް ނޫންކަން ތިޔަކުރަނީ. އެއްގޮތަށް ވުރެ ގިނަ ގޮތުން،" އެމެރިކާއަށް ފާޑުވިދާޅުވަމުން އިބުރާ ފާހަގަކުރެއްވިއެވެ.
"އެ އަނިޔާ ދިނުމާއި، އެ ހަތިޔާރު ދިނުމާއި، އެ ހުރިހާ ކަމެއް ކޮށްދޭ މީހުންނާ އެކީގައި އެއް ތަށި މަތީ ސައިބޯކަށް އަޅުގަނޑުމެންނަކަށް މިއަދަކު ނުތިބެވޭނެ. ތިބެގެން ނުވާނެ،"
މަންދު ކޮލެޖުން ރޭ ގްރެޖުއޭޓުވީ ދަރިވަރުންގެ ކިބައިން ވެސް އިބުރާ އެދިވަޑައިގަތީ އެ ފަދަ ކަންކަމުގައި އަޑު އުފުލާށެވެ. އެއީ، ސިޔާސީ ކަންކަމެއް ނޫނެވެ. އެއީ ޢިލްމީ ކަމެއް ގޮތުގައި އޭނާ ގަބޫލުކުރައްވައެވެ.
"ޢިލްމާ އެކުގައި އަންނާނެ މަސްއޫލިއްޔަތު. ޢިލްމު ނެތް މީހެއްގެ މަސްއޫލިއްތަށް ވުރެ ޢިލްމު ލިބިފައި އޮތް މީހެއްގެ މަސްއޫލިއްޔަތު ބޮޑުވާނެ،" އޭނާ ވިދާޅުވިއެވެ.
މިދިޔަ އަހަރުގެ އޮކްޓޫބަރު މަހުގެ ހަތްވަނަ ދުވަހުން ފެށިގެން އިސްރާއީލުގެ ފައުޖުތަކުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް 34،971 މީހަކު ވަނީ ޝަހީދުކޮށްލައިފައެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.
ހަމަލާތައް ހުއްޓުވަން ބައިނަލްއަގުވާމީ މުޖުތަމައު ވަނީ ނުކުޅެދިފައެވެ.