ދިރުންދެނިވި ސިޔާސަތަކާއެކު ރާއްޖޭގައި އުފެދިފައި އޮތް ހަމަ އެކަނި ސިޔާސީ ޕާޓީއަކީ މޯލްޑިވްސް ޑިވަލޮޕްމެންޓް އެލަޔަސް (އެމްޑީއޭ) ކަމަށް އެ ޕާޓީގެ ޓިކެޓުގައި ކެނދިކުޅުދޫ ދާއިރާއަށް ވާދަކުރެއްވި ޙުސައިން ސާލިމް މުޙައްމަދު މިއަދު ވިދާޅުވެއްޖެއެވެ.
މަޖިލިސް އިންތިޚާބުގައި އެމްޑީއޭއަށް ލިބުނު ކާމިޔާބީ ފާހަގަކުރެއްވުމަށް އެ ޕާޓީގެ ލީޑަރު އަޙުމަދު ސިޔާމް މުޙައްމަދުވަނީ މިއަދު ކުޑަފަރިއަށް ވަޑައިގެން، އެ ރަށުގެ ރައްޔިތުންނާ ބައްދަލު ކުރައްވާފައެވެ.
މި ބައްދަލު ކުރެއްވުމުގައި ވާހަކަދައްކަވަމުން، ސިޔާމްގެ ކޮއްކޯފުޅު ހުސައިން ސާލިމް ވިދާޅުވީ ދިރުންދެނިވި ސިޔާސަތެއް އޮތް ހަމައެކަނި ޕާޓީއަކީ އެމްޑީއޭ ކަމަށެވެ.
އެ ޕާޓީގެ މެންބަރެއްގެ ގޮތުގައި ސިޔާސީ ދާއިރާއަށް ނުކުމެވަޑައިގަތީ، ސިޔާސީވީ ދިރުންދެނިވި ސިޔާސަތުތައް ރައްޔިތުންގެ ގޭތެރެއަށް ގެނެސްދިނުމަށް ޓަކައި ކަމަށެވެ.
އަދި، އެ ޕާޓީން މަސައްކަތް ކުރަމުން އަންނަނީ ގޭތެރޭގެ ތަނަވަސްކަން އިތުރުކުރުމަށް ކަމަށް އޭނާ ވިދާޅުވިއެވެ. ދާއިރާގެ ރައްޔިތުންނަށް ދިރުން ގެނެސްދެެއްވާނެ ކަމަށާއި، އެ މަސައްކަތުގައި ދެމި ހުންނަވާނެކަމުގެ ޔަގީންކަން ވެސް އޭނާވަނީ ދެއްވާފައެވެ.
"ދިވެހިރާއްޖޭގެ ރައްޔިތުންނަށް، ވަކިން ޚާއްސަކޮށް، ނ. އަތޮޅުގެ ކުޑަފަރީ ރައްޔިތުންނާއި، މި ދާއިރާގެ ރައްޔިތުންނާއި، ނ. އަތޮޅުގެ ރައްޔިތުންނަށް އަޅުގަނޑުމެން މި ދިރުން ﷲ ތަޢާލާ ރަޙުމަތްފުޅާ އެކީގައި މަސައްކަތްތެރި ކަމާ އެކީގައި ތި ބޭފުޅުންގެ އަރިހަށް ގެނެސްދޭނަން،" ސާލިމް ވިދާޅުވިއެވެ.
ސާލިމް އިތުރަށް ވިދާޅުވީ އޭނާގެ ބޭބެ، ސިޔާމަށްޓަކައި ފަޚުރުވެރިވާ ކަމަށާއި، ނ. އަތޮޅުގެ ދިރުން ވަނީ ސިޔާމާ އެއްކޮށް ކަމަށެވެ. އަދި، ނ. އަތޮޅަށް ގެނައި ބަދަލު އަދި މިހާތަނަށް މާލެ އަތޮޅު ފިޔަވައި ރާއްޖޭގެ އެއްވެސް އަތޮޅަކަށް ގެނެވިފައެއް ނެތް ކަމަށް ވެސް ވިދާޅުވިއެވެ.
އޭނާވަނީ މަޖިލިސް އިންތިޚާބުގައި ރައްޔިތުން ދިން ތާއީދަށް ދާއިރާގެ ރައްޔިތުންނަށް އަދި ވަކީން ޚާއްސަކޮށް ކުޑަފަރީގެ ރައްޔިތުންނަށް ޝުކުރު އަދާކުރައްވާފައެވެ.
ސާލިމް ވިދާޅުވީ ބޭނުންވަނީ ދާއިރާގައި އަދި މުޅި ރާއްޖޭގައި ވެސް އުމްރާނީ މަސައްކަތްތައް ސަރުކާރުން ކުރާ ގޮތަށް ރައްޔިތުންނަށް ވަޒީފާގެ ފުރުސަތުތައް ލިބެން ކަމަށެވެ. ރައްޔިތުން އެކުގައި ތިބިއްޖެ ނަމަ، އެ މަސައްކަތް ހުއްޓާނުލައި ކުރިޔަށް ގެންދަވާނެ ކަމުގެ ޔަގީންކަން އޭނާވަނީ ދެއްވާފައެވެ.
ހަމަ މި ބައްދަލުކުރެއްވުމުގައި ވާހަކަދައްކަވަމުން، ވެލިދޫ ދާއިރާއަށް އެމްޑީއޭގެ ޓިކެޓުގައި ހޮވިވަޑައިގަތް، މުޙައްމަދު އައްބާސް ވިދާޅުވީ އޭނާގެ މަޖިލީހުގެ ދައުރު ނިމިގެންދާނީ ސިޔާމްގެ ދުރުވިސްނުންފުޅާ ސިޔާސަތާ އެއްގޮތްވާގޮތުގެ މަތީން ކަމަށެވެ.
އެ ސިޔާސަތުތަކުގެ ތެރެއިން ގާބިލްކަން ތަންދިން އެންމެ ފުރިހަމައަށް މަސައްކަތްކުރާނެ ކަމުގެ ޔަގީންކަން އޭނާ ދިނެވެ.
އެމްޑީއޭގެ ގައުމީ މަޖިލީހުގެ 2022 ވަނަ އަހަރުގެ ހަތަރުވަނަ ޖަލްސާގެ ތެރެއިން -- ސަން ފޮޓޯ/ މުހައްމަދު ހައްޔާން
"މި ނ. އަތޮޅުގައި އެންމެ ވަރުގަދަ ސިޔާސީ ޕާޓީއަކަށް މޯލްޑިވްސް ޑިވަލޮޕްމެންޓް އެލަޔަންސް (އެމްޑީއޭ) ހެދުމަށް ޓަކައި އަޅުގަނޑު ކުރަން ޖެހުނު ކޮންމެ މަސައްކަތެއް ޕާޓީގެ ލީޑަޝިޕާއެކު ކުރާނެ ކަމުގެ ފުރިހަމަ ޔަގީންކަން އަރުވަން،" އައްބާސް ވިދާޅުވިއެވެ.
ސިޔާމް މިއަދު ކުޑަފަރީއަށް ވަޑައިގަތުމާ އެކު އެ ރަށުން ވަނީ އޭނާއަށް ހޫނު މަރުހަބާއެއް ދަންނަވާފައެވެ. އެ ރަށުގެ މެޖޯރިޓީ އެމްޑީއޭއަށް އޮންނައިރު، އެ ޕާޓީއަށް ނިސްބަޔް ކުޑަފަރީގެ ރައްޔިތުންގެ އަދަދު 300އަށްވުރެ އިތުރެވެ.