ކުޑަކުދިންގެ ރައްކާތެރިކަން ކަށަވަރުކުރުމަށް ޓަކައި ރާއްޖޭގައި މިހާރު އެޅިފައިވާ ފިޔަވަޅުތައް، ހަރުދަނާ ކުރުމަކީ އަވަހަށް، މި ހިނދުން މި ހިނދަށް ވެސް ކުރަންޖެހޭ ވަރަށް މުހިންމު ކަމެއް ކަމަށް އެމްޑީއޭގެ ރައީސް އަދި ދ. މީދޫ ދާއިރާގެ މަޖިލިސް މެމްބަރު އަހްމަދު ސިޔާމް މުޙައްމަދު މިއަދު ވިދާޅުވެއްޖެއެވެ.
ކުޑަކުދިންގެ މުނާސަބަތުގައި ދެއްވި ޚިތާބުގައި ސިޔާމް ވިދާޅުވީ މިއަދު މި ދުވަސް ފާހަގަކުރަމުން އަންނައިރު، ކުޑަކުދިންނަށް ކުރިމަތިވަމުން އަންނަ ނަފްސާނީ އަދި ޖިސްމާނީ އަނިޔާތައް އިތުރުވަމުން އައުމަކީ ކަންބޮޑުވާ ކަމެއް ކަމަށެވެ.
ޚާއްސަކޮށް ކުޑަކުދިންނަށް ކުރާ ޖިންސީ ގޯނާގެ މައްސަލަތަކަކީ ވަރަށް ސީރިއަސް މައްސަލަތަކެއްގެ ގޮތުގައި ބަލައި، އެންމެ ހަރުކަށި އަދަބު ދިނުމަށް ވެސް ސިޔާމް ވަނީ ގޮވައިލައްވައިފައެވެ.
އެމްޑީއޭގެ ރައީސް އަދި ދ. މީދޫ ދާއިރާގެ މަޖިލިސް މެމްބަރު އަހްމަދު ސިޔާމް މުޙައްމަދު ތުއްތު ކުއްޖަކާއެކު -- ސަން ފޮޓޯ/ އަމަން ލަތީފް
އަދި ކުޑަކުދިންގެ ރައްކާތެރިކަމަށް އެޅިފައިވާ ފިޔަވަޅުތައް އިތުރަށް ހަރުދަނާ ކުރުމަކީ ވެސް މި ހިނދުން މި ހިނދަށް ކުރަންޖެހޭ މުހިންމު ކަމެއް ކަމަށް ވެސް ވިދާޅުވިއެވެ.
އެ މަނިކުފާނު ވިދާޅުވީ ކުޑަކުދިންނަކީ މުސްތަގުބަލުގެ މޫނު ބަލާ ލޯގަނޑު ކަމަށެވެ.
އެހެންކަމުން ކުޑަކުދިން ރައްކާތެރިކަމާއެކު ހެޔޮ ގޮތުގައި ތަރުބިއްޔަތު ކުރުމަކީ މުސްތަގްބަަލަށް ޓަކައި ބޮޑު އިސްކަމެއް ދީގެން ކުރަންޖެހޭ ކަމެއް ކަމަށް ސިޔާމް ފާހަގަކުރެއްވިއެވެ. އަދި މި މަސައްކަތް ބިނާވެފައި އޮންނަން ވާނީ ދީނީ އަދި ގައުމީ ސިފަތަކުގެ މައްޗަށް ކަމަށް ވެސް ވިދާޅުވިއެވެ.
ހަމައެއާއެކު އެ މަނިކުފާނުގެ ޚިތާބުގައިވަނީ މިއަދު ފަލަސްޠީނުގެ ޣައްޒާގެ ކުޑަކުދިން ތަހައްމަލުކުރަމުން އަންނަ ހިތާމައާއި ހިތްދަތިކަމަަށް ވެސް އަޅުވައިލައްވައި، އިސްރާއީލުގެ އަނިޔާވެރި އަމަލުތައް ހަރުކަށި އިބާރާތުން ކުށްވެރި ކުރައްވައިފައެވެ.
އެމްޑީއޭގެ ރައީސް އަދި ދ. މީދޫ ދާއިރާގެ މަޖިލިސް މެމްބަރު އަހްމަދު ސިޔާމް މުޙައްމަދު ތުއްތު ކުއްޖަކާއެކު -- ސަން ފޮޓޯ/ އަމަން ލަތީފް
ސިޔާމް ވިދާޅުވީ، އެ މަނިކުފާނުގެ އިލްތިމާސަކީ ކުޑަކުދިން ރައްކާތެރިކަމާއެކު ބަލަހައްޓައި ހަރުދަނާ ތަރުބިއްޔަތެއްގެ މަތީގައި އެ ކުދިން ބޮޑުކުރުން ކަމަށެވެ. އަދި އެ ކަމަށް ހުރިހާ ފަރުދުން ވެސް އެކުގައި މަސައްކަތްކުރުން ކަމަށެވެ. މީގެ އިތުރުން އެ ކުދިންނަކީ އިސްލާމްދީނަށް ލޯބިކުރާ ދިވެހި ބަހަށް ލޯބިކުރާ، ރިވެތި އަޚްލާގެއްގެ ކުދިންތަކެއްގެ ގޮތުގައި ހެދުމަށް މަސައްކަތް ކުރުން ކަމަށެވެ.
މިއަދު ފާހަގަކުރަމުން އަންނަ ކުޑަކުދިންގެ ދުވަހާ ގުޅިގެން ސަރުކާރުން ވެސް ވަނީ ކުދިންނަށް ޚާއްސަ ގިނަ ކަންތައްތަކެއް މިއަދަށް އިންތިޒާމުކޮށްފައެވެ. ރާއްޖޭގައި ކުޑަކުދިންނަށް ޚާއްސަ ދުވަހެއް ގައުމީ ފެންވަރުގައި ފާހަގަކުރަން ފެށީ 1979 ވަނަ އަހަރެވެ.