މިއަދު ކުޑަކުދިންގެ ދުވަސް ފާހަގަކުރާއިރު، ޣައްޒާގެ ހާލުގައި ޖެހިފައިވާ ކުޑަކުދިންނަށް ވެސް ރައްކާތެރިކަމާއި ހިމާޔަތް ލިބެންޖެހޭކަމަށް ޔުނިސެފް މޯލްޑިވްސްއިން މިއަދު ބުނެފިއެވެ.
ޔުނިސެފް މޯލްޑިވްސްއިން ކުޑަކުދިންގެ މުނާސަބަތުގައި މިއަދު ނެރުނު ބަޔާނެއްގައި ވަނީ، ހަނގުރާމައިގެ މައިދާނުގައި އުޅޭ އެ ކުދިންގެ މަތިން ކޮންމެ ދުވަހަކު ހަނދާންކުރަންޖެހޭ ކަމަށެވެ.
އަދި އެތައް ކުޑަކުދިންނެއް ޝަހީދުވެފައިވާއިރު، އެ ކުދިންނަށް ލިބެންޖެހޭ ތައުލީމު ވެސް ނުލިބޭކަން ޔުނިސެފް މޯލްޑިވްސްއިން ފާހަގަކޮށްފައިވެއެވެ.
ޣައްޒާގެ ހަނގުރާމަ ފެށުނީއްސުރެ ޔުނިސެފުން ވަނީ، ތަކުރާރުކޮށް، ހަނގުރާމަ ހުއްޓާލުމަށް ގޮވާލައި އާދާވާތްތެރިކަން ނިމުމަކަށް ގެންނަން ގޮވައިލާފައިކަން އެ ޖަމިއްޔާއިން ފާހަގަކުރިއެވެ.
އަދި ކުޑަކުދިންނަށް ޒަރޫރީ ޚިދުމަތްތަކާއި ރައްކާތެރިކަން ލިބޭނެ ގޮތް ހެދުމަށް އަމަލީ ފިޔަވަޅުތައް އެޅުމަށް ދުނިޔޭގެ ލީޑަރުންނަށް ޔުނިސެފުން ވަނީ ގޮވައިލާފައެވެ.
ޔުނިސެފުން ބުނީ، މި ޤައުމީ ކުޑަކުދިންގެ ދުވަހު ޔުނިސެފުން ސަރުކާރާއި ގުޅިގެން މި ދުވަސް ފާހަގަކުރާ ކަމަށެވެ. އަދި ރާއްޖެއިން ކުޑަކުދިން ރައްކާތެރިކުރުމާއި، ކުރިއަރެމަށާއި، އުނގަންނައި ދިނުމުގައި ކުރިއެރުން ހޯދާފައިވާކަން ޔުނިސެފުން ފާހަގަކުރިއެވެ.
ކުޑަކުދިންގެ ރައްކާތެރިކަން ކަށަވަރު ކުރުމަށް ޔުނިސެފުން އެހެން ޖަމިއްޔާތަކާ ގުޅިގެން މަސައްކަތް ކުރާނެ ކަމަށް އެ ޖަމިއްޔާއިން ބުންޏެވެ. އަދި ނުކުޅެދުންތެރިކަން ހުންނަ ކުދިން ހިމެނޭހެން ކޮންމެ ކުއްޖަކު ހައްގުތައް ހާސިލްކުރުމަށާއި، އެކަން ކުރުމަށް ހުރި ގޮންޖެހުންތަކަށް ހައްލެއް ހޯދުމަށް މަސައްކަތް ކުރުމަށް ދެމިތިބޭނެކަމަށް ޔުނިސެފުން ވަނީ ބުނެފައެވެ.