އިންޑިއާގެ ބެންގަލޫރުގެ ސައިޓް ކެއާ ހޮސްޕިޓަލުން، ރާއްޖޭގެ ކުންފުންޏަކާއި ކްލިނިކަކާ ގުޅިގެން ކެންސަރަށް ހޭލުންތެރިކުރުމުގެ ގޮތުން ސެމިނާތަކެއް ބާއްވަން ނިންމައިފިއެވެ.
ހިލޭ ބައިވެރިވެވޭ އެ ސެމިނާތަކަކީ ސައިޓްކެއާ ހޮސްޕިޓަލުން ރާއްޖޭގެ ސްޕްލެންޑިކޯ ޕްރައިވެޓް ލިމިޓެޑް ކުންފުންޏާއި އިމޭޖް ސެންޓާ ކްލިނިކާ ގުޅިގެން ބާއްވާ ސެމިނާތަކެކެވެ.
ކެންސަރަށް ހޭލުންތެރިކުރުމަށް ބާއްވާ މި ސެމިނާތައް ތިން ސަރަހައްދެއްގައި ކުރިއަށް ގެންދިއުމަށް ވަނީ ހަމަޖެހިފައެވެ. މިގޮތުން މާލޭ ސިޓީގައި މި ސެޝަން އޮންނާނީ ހޮނިހިރު ދުވަހު، ކަސްޓަމްސް ބިލްޑިންގްގެ އަށް ވަނަ ފަންގިފިލާގައި މީރުބަހުރު މާލަމުގައެވެ.
ކުޅުދުއްފުށީ ހޮސްޕިޓަލުގައި އާދިއްތަ ދުވަހު މި ސެޝަން ބޭއްވުމަށް ހަމަޖެހިފައިވާއިރު، އަންނަ ހަފުތާގެ އަންގާރަ ދުވަހު އަައްޑޫ ސިޓީ އިކުއެޓޯރިއަލް ހޮސްޕިޓަލުގައި ވެސް ސެޝަނެއް ބާއްވާނެއެވެ.
މި ހުރިހާ ސެޝަނެއް ވެސް ކުރިއަށް ދާނީ ހެނދުނު 10:00 އިން 11:00 އަށެވެ.
އެ ސެމިނާތަކުގައި މައުލޫމާތު ދެއްވާނީ ސައިޓްކެއާ ހޮސްޕިޓަލްގެ ސީނިއާ ކޮންސަލްޓެންޓް އެންޑް ޑިރެކްޓަރު ރޭޑިއޭޝަން އެންކޮލޮޖީ ޑރ. ސުރެންދްރާ ޓީ ރެޑީއެވެ.
މި ސެމިނާގައި މައުލޫމާތު ދިނުމަށް ހަމަޖެހިފައިވާ މައުޟޫއަކީ ކޮންޕްރެހެންސިވް ކެންސާ ކެއާ އަދި ރޭޑިއޭޝަން ތެރަޕީއެވެ.
ސްޕްލެންޑިކޯއިން ބުނީ މި ސެމިނާތައް ބޭއްވުމުގެ މަގުސަދަކީ ރޭޑިއޭޝަން ތެރަޕީއާ ގުޅޭ މައުލޫމާތު ދިނުމާއި، ކެންސަރުގެ ބަލި ތަހައްމަލު ކުރަމުންދާ މީހުން ކުރިއަށްދާނެ ގޮތާ ގުޅޭގޮތުން މައުލޫމާތު ދިނުން ކަމަށެވެ.
ސްޕްލެންޑިކޯއިން ބުނީ މި ސެޝަނުން ވަރަށް މުހިންމު މައުލޫމާތުތަކެއް ލިބޭނެ ކަމަށާއި ބައިވެރިންގެ ސުވާލުތަކަށް ޑރ. ސުރެންދްރާ ޖަވާބު ދެއްވާނެ ކަމަށެވެ. އެ ސެޝަންތަކާ ބެހޭ އިތުރު މައުލޫމާތު 7944331 އަށް ގުޅުމުން ލިބޭނެއެވެ.