ކުރިއަށް އޮތް ޔުއެފާ ފުޓްބޯޅަ މުބާރާތުގެ ފައިނަލް މެޗު ބަލަން ޖަރުމަނަށް ދިއުމަށް ފުރުސަތު ލިބޭ ޕުރޮމޯޝަނެއް ކޮކާ ކޯލާއިން އިފުތިތާހުކޮށްފިއެވެ.
ޔުއެފާ ފުޓުބޯޅަ މުބާރާތް އޮންނާނީ މިއަންނަ މަހު 14އިން ފެށިގެން ޖުލައި މަހުގެ ނިޔަލަށެވެ. ފުޓްބޯޅައިގެ މި ފޯރިގަދަ ސީޒަނާ ދިމާކޮށް ކޮކާ ކޯލާއިން ވަނީ އެ ކުންފުނީގެ މަޝްހޫރު ފުޓުބޯޅަ ތީމްގެ ޕެކޭޖިން ވެސް ތައާރަފުކޮށްފައެވެ.
ކޮކާކޯލާގެ ޕްރޮމޯޝަންގައި ބައިވެރިވެވޭނީ، ޚާއްސަ ޕެކޭޖިންގައި ބަންދުކޮށްފައިވާ ކޮކާ ކޯލާ ފުޅީގެ މަތިގަނޑު އަދި ދަޅުގެ ޓެބްގެ ދަށުގައިވާ ހަ އަދަދުގެ ކޯޑު '2626'އަށް އެސްއެމްއެސް ކޮށްގެންނެވެ.
އެސްއެމްއެސް ކުރާ މިންވަރަކަށް އިނާމެއް ލިބުމުގެ ފުރުސަތު ވެސް ބޮޑުވާނެކަމަށް އެ ކުންފުނިން ބުންޏެވެ.
މި ޕްރޮމޯޝަން ކުރިއަށްގެންދިއުމަށް ހަމަޖެހިފައިވަނީ މިމަހު އެކަކުން މި އަންނަ މަހުގެ 15ގެ ނިޔަލަށެވެ.
ފައިނަލް ބަލަން ދިއުމުގެ ފުރުސަތު ހަ ނަސީބުވެރިންނަށް ލިބޭއިރު، ކޮންމެ ނަސީބުވެރިޔަކާއެކީގައި އިތުރު މީހަކަށް ދެވޭނެ ކަމަށް ކޮކާ ކޯލާއިން ބުންޏެވެ. އަދި މިޕުރޮމޯޝަންގައި ކޮންމެ ދެދުވަހުން އެއް ދުވަހަކު ސްމާޓްފޯނާއި އިތުރު އިނާމުތައް ހޯދުމުގެ ފުރުސަތު ވެސް އޮންނާނެ ކަމަށް އެ ކުންފުނިން ބުންޏެވެ.
ފުރަތަމަ ލަކީޑްރޯ ނެގުމަށް ހަމަޖެހިފައިވަނީ މިމަހުގެ 11 ވަނަ ދުވަހުގައެވެ. އަދި އޭގެ ފަހުން ކޮންމެ ދެދުވަހުން އެއް ދުވަހަކު ނަސީބު ވެރިން ހޮވުން، އައިސް ޓީވީއިން ލައިވްކޮއް ކުރިއަށްދާނެ ކަމަށް ކޮކާ ކޯލާއިން ބުންޏެވެ.
ކޮކާ ކޯލާއިން ރާއްޖެ އަދި ލަންކާއަށް ކަނޑައަޅާފައި ހުންނަ ކަންޓްރީ ޑިރެކްޓަރު ކޯޝަލީ ކުސުމަޕަލާ ވިދާޅުވީ ކުރިއަށް އޮތް ޔޫރޯއާ ދިމާކޮށް އެ ކުންފުނިން 'ޔުއެފާ ޔޫރޯ 2024' އާއެކު ގާއިމްކުރި ޕާޓްނާޝިޕަކީ ކުޅިވަރާއި މުނިފޫހިފިލުވުމުގެ ދާއިރާއަށް އެ ކުންފުނިން ދޭ އަހައްމިއްޔަތުކަން ދައްކުވައިދޭ ކަމެއް ކަމަށެވެ.
މި ޕާޓްނާޝިޕްގެ ދަށުން ކޮކާ ކޯލާއިން މަސައްކަތް ކުރާނީ، ރާއްޖޭގައި ތިބި ފުޓްބޯޅަ ސަޕޯޓަރުންނަށް، ކުރިއަށް އޮތް ޔޫރޯ މުބާރާތުގެ ދުވަސްތަކުގައި ތަފާތު ތަޖުރިބާއެއް ގެނެސްދިނުމަށް ކަމަށް ކުސުމަޕަލާ ވިދާޅުވިއެވެ.
ކޮކާކޯލާއަކީ ޔުއެފާ ޔޫރަޕިއަން ފުޓްބޯޅަ ޗެމްޕިއަންޝިޕް ނުވަތަ ޔޫރޯ މުބާރާތުގެ ދުވަސްވީ ޕާޓްނަރެކެވެ.