ދިވެހިރާއްޖޭގެ ފިލްމު އެސޯސިއޭޝަން (އެމްއެފްއޭ)ގެ ހުސްވެފައިވާ ޗެއާޕާސަންގެ މަގާމަށް ކުރިމަތިލުމުގެ ފުރުސަތު އިއްޔެ ހުޅުވާލައިފިއެވެ.
އެމްއެފްއޭއިން ނެރުނު ބަޔާނެއްގައި ބުނެފައިވަނީ އިއްޔެއިން ފެށިގެން އެސޯސިއޭޝަންގެ ޗެއާޕާސަންގެ މަގާމަށް ކުރިމަތިލުމުގެ ފުރުސަތު ހުޅުވާލާފައިވާ ކަމަށެވެ.
ޗެއާޕާސަންގެ މަގާމަށް ކުރިމަތިލުމުގެ ފުރުސަތު މި މަހުގެ ހަވަނަ ދުވަސްވާ ހޯމަ ދުވަހުގެ 1800ގެ ނިޔަލަށް ހުޅުވާލާފައި ހުންނާނެ ކަމަށް ބަޔާނުގައި ބުނެފައިވެއެވެ.
ޗެއާޕާސަންއެއް ހޮވުމަށް ބާއްވާ ބައި އިލެކްޝަން ކުރިއަށް ގެންދާނީ މި މަހުގެ 16 ވަނަ ދުވަހުއެވެ.
ފިލްމު އެސޯސީއޭޝަންގެ ޗެއާޕާސަންގެ މަގާމު ހުސްވެފައިވަނީ އެ މަގާމުގައި ކުރީން ހުންނެވި މުހައްމަދު ނަޝީދު ނިޔާވުމާ ގުޅިގެންނެވެ. އޭނާ އެ މަގާމަށް އިންތިޚާބުވެފައިވަނީ މިދިޔަ ފެބްރުއަރީ މަހުގެ 16 ވަނަ ދުވަހު ބޭއްވި އެމްއެފްއޭ އާންމު އިންތިޚާބު ކާމިޔާބު ކުރުމަށް ފަހުގައެވެ.
ވޯޓު މެދުވެރިކޮށް ޗެއާޕާސަންގެ މަގާމަށް ނަޝީދު ހޮވުނީ އަހުމަދު ނައީމު (އެމޯ)އާ ވާދަކޮށެވެ. ނަޝީދު އިންތިޚާބު ކާމިޔާބު ކުރީ 43 ވޯޓާއެކުގައެވެ. އެމޯއަށް ލިބިފައިވަނީ 23 ވޯޓެވެ.
ވައިސް ޗެއާޕާސަންގެ މަގާމަށް ހޮވިފައިވަނީ ފިލްމީ ތަރި ޝީލާ ނަޖީބެވެ. އެ އިންތިޚާބުގައި އެމްއެފްއޭގެ އިތުރު ބޯޑު މެންބަރުން ވެސް ވަނީ ހޮވާފައެވެ. ބޯޑު މެންބަރުންގެ ގޮތުގައި ހޮވާފައިވަނީ މުހައްމަދު އަފްރާހް އަދި ފާތިމަތު ޒުހައިރާއެވެ.
މޯލްޑިވްސް ފިލްމު އެސޯސިއޭޝަންގެ އިންތިޚާބު ކޮމިޓީގެ ޗެއާގެ ގޮތުގައި ހުންނާނީ އަލީ ޝާނީޒެވެ. އަދި، ޗެއާޕާސަންގެ މަގާމަށް ކުރިމަތިލާން ބޭނުންވާ ފަރާތްތަކުން ޝާނީޒަށް ގުޅައިގެން މަގާމަށް ކުރިމަތިލެވޭނެއެވެ. އޭގެ އިތުރުން، އޮންލައިންކޮށް ފޯމު ފުރައިގެން ވެސް މަގާމަށް ކުރިމަތި ލެވޭނެއެވެ.