ޕީޕަލްސް ނެޝަނަލް ފްރަންޓް (ޕީއެންއެފް) އުފެއްދުމުގެ ޖަލްސާ ޣިޔާސުއްދީން ސްކޫލުގައި ބާއްވަނީ އެ ޖަލްސާ ބޭއްވުމުގެ ހުއްދަ ބާތިލުކޮށް، އެކަން އަންގާފައި ވަނިކޮށް ކަމަށް ފުލުހުން މިރޭ ބުނެފިއެވެ.
ޕީއެންއެފްގެ ޖަލްސާ މިރޭ 9:15ގައި ބާއްވަން ޕާޓީގެ ލީޑަރުންނާއި މެންބަރުން ދިޔުމުން ފުލުހުން ވަނީ ސްކޫލަށް ވަނުމަށް ހުރަސް އަޅައިފައެވެ.
އެކަމާ ގުޅިގެން ފުލުހުންގެ ތަރުޖަމާނު އަހްމަދު ޝިފާން މީޑިއާތަކާ ހިއްސާކުރެއްވި މެސެޖެއްގައި ވިދާޅުވީ ޣިޔާސުއްދީން ސްކޫލުގައި މިރޭ ޖަލްސާ ބާއްވަން އެ ސްކޫލުން ފުރަތަމަ ހުއްދަ ދިން ނަމަވެސް ފަހުން އެ ހުއްދަ ބާތިލުކޮށް އެކަން އެ ޕާޓީއަށް އެންގި ކަމަށެވެ.
އެހެންނަަވެސް، އެ ޕާޓީން ޣިޔާސުއްދީން ސްކޫލުގައި ޖަލްސާ ބާއްވަން މަސައްކަތް ކުރުމުން، އެ ޕާޓީއަށް އެޑިއުކޭޝަން މިނިސްޓްރީ މެދުވެރިކޮށް ފުލުހުންގެ އެހީ ހޯދަން އެދުނީ ކަމަށް ޝިފާން ވިދާޅުވިއެވެ.
އެ މެސެޖާއެކު އޭނާ ވަނީ، ޕީއެންއެފް އުފެއްދުމުގައި އިސްކޮށް އުޅުއްވާ ކުރީގެ ސައިންސް މިނިސްޓަރު މުޙައްމަދު މަލީހު ޖަމާލަށް ފޮނުވާފައިވާ މެއިލްއެއްގެ ސްކްރީންޝޮޓެއް ހިއްސާކުރައްވާފައެވެ.
އެ މެއިލްގައި ވަނީ ލޮޖިސްޓިކްސް މައްސަލަތަކެއްގެ ސަބަބުން، މިރޭ ޖަލްސާ ބާއްވަން ޣިޔާސުއްދީންގެ ހޯލް ދެވެން ނެތް ކަމަށެވެ. އެހެންވެ، އެ ހޯލް ކުއްޔަށް ނެގުމަށް ދައްކާފައިވާ ފައިސާ އަނބުރާ ދޭނެ ކަމަށް ބުނެ، ފައިސާ ފޮނުވަންވީ ގޮތުގެ މައުލޫމާތު ހިއްސާކޮށްދިނުމަށް އެ މެއިލްގައި ވަނީ އެދިފައެވެ.
ނަމަވެސް އެ މެއިލް ފޮނުވީ ކޮން އިރަކު ކަމެއް ޝިފާން ހާމައެއް ނުކުރައްވައެވެ.
ޕީއެންއެފްއިން އަންނަނީ އެ ޖަލްސާއަށް ހުރަސް އަޅަނީ ސަރުކާރުން އަޑީގައި އޮވެގެން ކަމަށް ތުހުމަތު ކުރަމުންނެވެ.
ޣިޔާސުއްދީނަށް ވަންނަން ހުއްދަ ދޭން ފުލުހުން ފުރަތަމަ ދެކޮޅު ހެދި ނަމަވެސް ފަހުން އެ ޕާޓީގެ ލީޑަރުންނާއި މެންބަރުން ވަނީ ސްކޫލަށް ވައްދައިފައެވެ. އަދި އެ ޖަލްސާ ފެށުމަށް މިހާރު އަންނަނީ މަސައްކަތް ކުރަމުންނެވެ.