ނިމިދިޔަ ސަރުކާރުން ފެށި "ބިންވެރިޔާ" އަދި "ގެދޮރުވެރިޔާ" ސްކީމާ ގުޅިގެން ހުށަހަޅާ މައްސަލަތަކާއި ކުރަން ޖެހޭ މަސައްކަތްތަކާ ގުޅޭ ގޮތުން ލަފާދިނުމަށް ކޮމިޓީއެއް އެކުލަވާލައިފިއެވެ.
ހައުސިން މިނިސްޓްރީން މިއަދު ނެރުނު ބަޔާނެއްގައިވާ ގޮތުން އެ ކޮމިޓީގެ ޗެއާގެ ގޮތުގައި ހަމަޖައްސާފައިވަނީ، ނިޝާން އިއްޒުއްދީންގެ އިއްޒަތުގެ ވެރިޔާ އަނީސާ އަހުމަދެވެ.
އެ ކޮމިޓީގައި އިތުރަށް ހިމެނެނީ:
- ހ. ހަބަރުގެ، އާމިނަތު އިނާސް
- ގ. ވިޔަވަތި، އަހްމަދު އަލީ މަނިކު
- މ. ދޫނިހުރާ، އަބްދުލް އަޒީޒް ޔޫސުފް
- މ. ޒޭވަރު، މަރިޔަމް ފިޒާނާ ރަޝީދު
އެ ކޮމިޓީގެ ބައްދަލުވުމެއް މިއަދު ބާއްވާފައިވާއިރު، ވައިސް ޗެއާއެއްގެ ގޮތުގައި ހަމަޖައްސާފައިވަނީ އަބްދުލް އަޒީޒް ޔޫސުފެވެ.
އެ ކޮމިޓީގެ ސެކެޓްރިއޭޓް ބެލެހެއްޓުމުގެ މަސައްކަތް ކުރިއަށްގެންދާނީ ހައުސިން މިނިސްޓްރީން ކަމަށް އެ ބަޔާނުގައިވެއެވެ.
ކުރީ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ވަނީ ނިންމައިފައެވެ. މާލޭ މީހުންނަށް ހުޅުމާލޭންނާއި ގުޅީފަޅުންނާއި ގިރާވަރުފަޅުން ވެސް ގޯތި ދޫކުރަން ވަނީ ހަމަޖެހިފައެވެ.
ބިންވެރިޔާ ސްކީމްގެ ދަށުން ގޯތި ދޫކުރުމުގެ ދެވަނަ ފިޔަވަހީގައި 4000 ގޯތި ދޫކުރުމަށް މިދިޔަ ސަރުކާރުން ވަނީ ނިންމާފައެވެ. މި ބައިގައި ގޯތި ދޭނެކަމަށް އިއުލާންކޮށްފައިވަނީ އުތުރު ތިލަފަޅުންނެވެ.
ކުރީ ސަރުކާރުގެ ގެދޮރުވެރިޔާ ސްކީމްގެ ދަށުން ހުޅުމާލޭގައި ތަރައްގީކުރަމުން އަންނަ 4،000 ފުލެޓަށް ކުރިމަތިލީ މީހުންގެ ތެރެއިން ޝަރުތުހަމަވީ ކަމަށް ކަނޑައެޅި ބައެއް މީހުންނަށް ޕޮއިންޓު ދިނުމުގައި މައްސަލަތައް ހުރި ކަމަށް އެންޓި ކޮރަޕްޝަން ކޮމިޝަން (އޭސީސީ)އިން މައްސަލަ ބެލިއެވެ. އޭސީސީން ބުނި ގޮތުގައި އޭގެ ތެރެއިން އެއްވެސް މައްސަލައެއް ނެތް ކަމަށް ފެނިފައިވަނީ 20 އިންސައްތަ ފޯމުގައެވެ.
ރައީސް ޑރ. މުޙައްމަދު މުއިއްޒުވަނީ، ފްލެޓުތައް ދޫކޮށްފައިވަނީ އެ ލިބެންޖެހޭ މީހުންނަށްތޯ އިތުރަށް ޔަގީންކުރުމަށް ޓަކައި، ރައްޔިތުން އިތުބާރުކުރާ ގަދަރުވެރި މީހުންގެ މައްޗަށް އެކުލެވޭ ކޮމިޓީއެއް އެކުލަވައިލާ ލިސްޓުތަކުގެ ސައްހަކަން ކަށަވަރުކުރާނެކަމަށް މީގެ ކުރިން ވިދާޅުވެފައެވެ.